Zabuli 6

1 Go Mndewa Imulungu, sikuunikomhokele kwa ng’hasiliki yako, sikuunikoboze kwa kwihilwa kwako. 2 Unyonele bazi gweye Mndewa Imulungu, kwavija nonyolila, Unihonye gweye Mndewa Imulungu, kwavija nogaya mbaka mmizege. 3 Nogazika ng’hani mmoyo wangu, gweye Mndewa Imulungu kokawa mbaka lini? 4 Go Mndewa Imulungu ubwele, unihoze moyo wangu, unikombole mbuli ya unogelo wako hawishaga. 5 Haduhu munhu yokukumbuka gweye akuno kafa. Nani yodaha kukutogola yahawa ako kuzimu? 6 Nidonha kwa kugula kwangu, kila ikilo noludodeza lusazi lwangu kwa kulila, noudodeza mkeka wangu kwa mahozi gangu. 7 Meso gangu ganangika kwa usungu, nodonha mbuli ya awo onihila. 8 Segeleni kumwangu, mweye msang’hana gehile, kwavija Mndewa Imulungu kahulika kililo changu. 9 Mndewa Imulungu kahulika kililo changu, Mndewa Imulungu katogola kupula kwangu. 10 Iwanhu wose onihila wagwe kinyala na wapate magazo, wabwele kuchugu himahima kwa kinyala.