ମାତିଉ 1

¹ ଇକା ଆଜିନାତ୍‍ ଜିସୁ କ୍ରିସ୍ତଦି ଡକ୍ରାଦାଦ୍‍ସିରି ଦର୍‌କା ଦାଡ଼ି; ୱାନ୍‌ ଦାଉଦଦି କୁଟୁମ୍‌ ମାର୍ହାନ୍‌, ଦାଉଦ ଅବ୍ରାହାମଦି କୁଟୁମ୍‌ ମାର୍ହାନ୍‌

² ଅବ୍ରାହାମ ଇସ୍‍ହାକ୍‍ତି ବୁବାସି । ଇସ୍‌ହାକ୍‌ ଜାକୁବଦି ବୁବାସି । ଜାକୁବ, ଜିହୁଦା ନି ୱାନି ତଡ଼ାନ୍‌କା ବୁବାସି ।

³ ଜିହୁଦା, ପେରସ ନି ସେରହତି ବୁବାସି । ତାମର ୱାରି ଆଇସି । ପେରସ ହେବ୍ରଣତି ବୁବାସି । ହେବ୍ରଣ ଅରାମତି ବୁବାସି ।

⁴ ଅରାମ ଅମିନାଦବତି ବୁବାସି । ଅମିନାଦବ ନହସନତି ବୁବାସି । ନହସନ ସଲମନତି ବୁବାସି ।

⁵ ସଲମନ ବୟଜତି ବୁବାସି । ବୟଜକା ଆଇସି ଦରୁ ରାହବ୍, ବୟଜ ଅବେଦତି ବୁବାସି, ରୁତ ଅବେଦକା ଆଇସି ମାର୍ହାତ୍‌, ଅବେଦ ଜେସିଦି ବୁବାସି ।

⁶ ଜେସି ରାଜା ଦାଉଦତି ବୁବାସି । ଦାଉଦ ସଲମନ୍‍ତି ବୁବାସି, ସଲମନକା ଆଇସି ଆଗ୍‌ଡ଼ି ଉରିୟଦି ଆଡ଼ି ମାର୍ହାତ୍‌ ।

⁷ ସଲମନ୍‍ ରିୟବିୟାମତି ବୁବାସି । ରିୟବିୟାମ ଅବିୟଦି ବୁବାସି । ଅବିୟ ଆସାଦି ବୁବାସି ।

⁸ ଆସା ଜିହସାପଟତି ବୁବାସି । ଜିହସାପଟ ଜରାମତି ବୁବାସି । ଜରାମ ଉଜିୟଦି ବୁବାସି ।

⁹ ଉଜିୟ ଜତାମତି ବୁବାସି । ଜୋତମ ଆହାସତି ବୁବାସି । ଆହାସ ହିଜକିୟଦି ବୁବାସି ।

¹⁰ ହିଜକିୟ ମନସିଦି ବୁବାସି । ମନସି ଅମନତି ବୁବାସି । ଅମନ ଜସିୟଦି ବୁବାସି ।

¹¹ ଜସିୟ, ଜିକନିୟ ମାରି ୱାନି ତଡ଼ାନ୍‌କା ବୁବାସି । ଇକା ଇସ୍ରାଏଲ୍‌ ଲୋକାଙ୍ଗ୍‌ ଗତିମୁରୁଲି କିଜି ବାବିଲନ୍‍ତୁ ଅନିୱାଲେରି ମାଟା ।

¹² ୱାରିଙ୍ଗ୍‌ ବାବିଲନ୍‍ତୁ ଅତି ୱେନ୍‌କା । ଜିକନିୟଦି ମାରିସି ସଲ୍‌ଟିୟେଲ ଜନମ୍‍ଆତାନ୍‍ । ସଲ୍‌ଟିୟେଲ ଜିରୁବ୍‍ବାବେଲତିଙ୍ଗ୍‌ ଜନମ୍‌ କିତାନ୍‌,

¹³ ଜିରୁବ୍‍ବାବେଲ ଅବିହୁଦକା ବୁବାସି । ଅବିହୁଦ ଏଲିୟାକିମ୍‍କା ବୁବାସି । ଏଲିୟାକିମ୍‍ ଅଜ୍‍ଜୁରକା ବୁବାସି ।

¹⁴ ଅଜ୍‍ଜୁର ସାଦକକା ବୁବାସି । ସାଦକ ଆକିମ୍‍ତି ବୁବାସି । ଆକିମ୍‍ ଏଲିହୁଦକା ବୁବାସି ।

¹⁵ ଏଲିହୁଦ ଏଲାଜାରକା ବୁବାସି । ଏଲାଜାର ମତାନକା ବୁବାସି । ମତାନ ଜାକୁବରି ବୁବାସି ।

¹⁶ ଜାକୁବ ଜସେପ୍‌କା ବୁବାସି । ଜୋସେପ୍‌ ମରିୟମ୍‌ତି କନ୍‍ଲି । ମରିୟମତି ପଟାଦାନ୍‍ ଜିସୁ ଜନମ୍‍ଆତାନ୍‍ । ଜିସୁ ମସିହ ଦର୍‌ତାନ୍‌ ବା ୱେଙ୍ଗିଁନାନ୍‍ ।

¹⁷ ଇୟାୱାଜା ଅବ୍ରାହାମତି ମାଣାନ୍‌ ଦାଉଦଦି ସାନ୍ଦି ଆତାର୍‌ ପୁରା ସଉଦ କୁଟୁମ୍‌ । ଦାଉଦ ମାଣାନ୍‌ ଗତିମୁରୁଲି ୱାଜା ବାବିଲନ୍‍ତୁ ଇନି ସାନ୍ଦି ସଉଦ କୁଟୁମ୍‌, ମାରି ଗତିମୁରୁଲି ୱାଜା ବାବିଲନ୍‍ତୁ ଇତି ୱେନ୍‍କାରାନ୍‍ କ୍ରିସ୍ତଦି ଜନମ୍‌ ସାନ୍ଦି ଆତାର୍‌ ସଉଦ କୁଟୁମ୍‌ ।

¹⁸ ଇକା ଆଜିନାତ୍‍ ଜିସୁ କ୍ରିସ୍ତଦି ଜନମ୍‌ତି ମାଟା ଜିସୁ କ୍ରିସ୍ତଦି ଆଇସି ମାର୍ହାତ୍‌ ମରିୟମ୍‌ । ଜିସୁକ୍ରିସ୍ତଦି ଜନମ୍‌ ଇୟାୱାଜା ଆତାମାର୍ହାତ୍‍ । ମରିୟମ୍‍ତିଙ୍ଗ୍‍ ଜୋସେପ୍‌ତି ୱାଲେ ପେଡ଼ିଆଦେଙ୍ଗ୍‍ ଲସ୍‌ତା ମାର୍ହାର୍‌ । ମାତର୍‌ ପେଡ଼ିଆନି ଆଗ୍‌ଡ଼ି ୱେଙ୍ଗିଁତାତ୍‌ ଜେ ମରିୟମ୍‌ ପବିତ୍ର ଆତ୍ମାଦାନ୍‌ ଗାର୍ବୁଦୁତେବାତାମାନାତ୍‍ ।

¹⁹ ଜୋସେପ୍‌ ୱିଜୁୱାଲେ ଦାର୍ମୁଦି ପାଣିକିନିକାନ୍‍ ମାର୍‌ର୍ହାନ୍‍ । ମାରି ମରିୟମତିଙ୍ଗ୍‌ ଲୋକା ଆଗ୍‌ଡ଼ି ନିଦା କିଦେଙ୍ଗ୍‌ ୱାନ୍‌ ବଦା କିଏଜିମାର୍ହାନ୍‍ । ୱାନ୍‌ ଲସାତିତାନେଙ୍ଗ୍‍ ରୁକ୍‍ତେଙ୍ଗ୍‍ ନେସ୍‌ଇୱାଜା ଉପାୟ୍‌କିତାନ୍‍ ।

²⁰ ୱାନ୍‌ ଇକା ଅଡ଼୍‍ବିନିୱାଲେ ଅରେନ୍‍ ପ୍ରବୁଦି ଦୁତ୍‍ ୱାନିଙ୍ଗ୍‌ ଲବେରୁ ତରାଇଆଜି ଇର୍ହାତ୍‌, “ଏ ଦାଉଦ କୁଟୁମ୍‌ତି ଜୋସେପ୍‌, ମରିୟମ୍‌ତିଙ୍ଗ୍‍ ନିଜେଦି ଆଡ଼ି ୱାଜା ଇଡ୍‌ଦେଙ୍ଗ୍‌ ତିଲାମା, ଇରିଙ୍ଗ୍‌ ପବିତ୍ର ଆତ୍ମାଦାନ୍‌ ୱାଦ୍‌ ପଟାଦୁ ଆତାମାନାତ୍‌ ।

²¹ ତାନିଙ୍ଗ୍‌ ଅରେନ୍‍ କଡ଼ ଜନମ୍‌ ଆନାନ୍‌ । ମିର୍‌ ୱାନି ଦରୁ ଜିସୁ ଇଡ୍‍ନିଦେର୍‍ । ଇରିଙ୍ଗ୍‌ ୱାନ୍‌ ୱାନି ଲୋକାଙ୍ଗ୍‌ ୱାରି ପାପ୍‌ତାନ୍‌ ରକିୟା କିନାନ୍‌ ।”

²² ବବିସତ୍‍ବକ୍ତାଦି ମାଣାନ୍‌ ପ୍ରବୁ ଆମାକା ଇର୍ହାମାର୍ହାନ୍‌, ଆକା ସତ୍‍ଆଦେଙ୍ଗ୍‍ ଇକା ଗଟାତାତ୍‌ ।

²³ ଆୟା ବବିସତ୍‍ ମାଟା ଆଜିନାତ୍‍, “ଅରେତ୍‌ ରିପା ଗାର୍ବୁଦୁ ତେବାଜି କଡ଼ଦିଙ୍ଗ୍‌ ଜନମ୍‍ସିନାତ୍‍ । ମାରି ଲୋକୁ ଆୟା କଡ଼ଦିଙ୍ଗ୍‌ ଇମାନୁଏଲ ଦର୍‌ତାନ୍‌ ୱେଙ୍ଗ୍‌ଁନାନ୍‌ । ଇମାନୁଏଲଦି ଅର୍ତ ମାପୁରୁ ମା ୱାଲେ ମାନାନ୍‌ ।”

²⁴ ଜୋସେପ୍‌ ସୁସ୍‍କାଣ୍‍କାଣ୍‍ ନିଙ୍ଗିଁଜି ପ୍ରବୁଦି ଦୁତ୍‍ ୱାନିଙ୍ଗ୍‌ ଏଣ୍ତେସ୍‌ ଆଦେସ୍‌ ସିତାତ୍‌, ଆୟାୱାଜା କିତାନ୍‌ । ୱାନ୍‌ ମରିୟମ୍‍ତିଙ୍ଗ୍‍ ପେଡ଼ିଆନାନ୍‌ ।

²⁵ ମାତର୍‌ ମରିୟମ୍‌ କଡ଼ଦିଙ୍ଗ୍‌ ଜନମ୍‌ କିଇ ସାନ୍ଦି ୱାନ୍‌ ତାନି ୱାଲେ ଡର୍‍ଏତାମାର୍ହାନ୍‍ । ମାରି ଜୋସେପ୍‌ ଆୟା କଡ଼ଦି ଦରୁ ଜିସୁ ଇଟ୍‌ତାନ୍‌ ।