ଫିଲିପିୟ 1

¹ ଫିଲିପୀ ମଣ୍ଡଲିତେ ଦର୍ମଗୁରୁ, ସେବକିଡ଼୍ ନୁ କ୍ରିଷ୍ଟ ବିଶ୍ୱାସି ସାରେତଡ଼୍‍କ୍, କ୍ରିଷ୍ଟ ଜିସୁନ୍ ଦାସ ପାଉଲ୍ ନୁ ତିମତିନ୍ ଚିଟି,

² ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍‍ ।

³ ବେସ୍‍ଦାମ୍ ନାନ୍ ମିକିଂଙ୍କ୍ ଏର୍କା ମାଡ଼ିତାନ୍, ନା ଇଶ୍ୱର୍‌ତିଙ୍ଗ୍ ଦନ୍ୟବାଦ୍ ଇଦ୍‍ତାନ୍,

⁴ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ାନ୍ ୱେଲେ ୱେଡ଼୍‍କେତେ ପ୍ରାର୍ତନା ମାଡ଼ାଟ୍;

⁵ ବାତେଙ୍କ୍ ମିୟାଦ୍ ବିଶ୍ୱାସ୍ ପ୍ରାୟ ଦିନାକିନେ କେ ନାନ୍ ମିକିଙ୍କ୍ ସୁସମାଚାର୍‍ତାଗ୍ କାମ୍ ମାଡ଼ିତାନ୍ ।

⁶ ଆଦିଙ୍କ୍ ନାନ୍ ଇଦ୍ ବିଷୟ୍‍ତେ ନିଜାମ୍‍ ଯେ, ବେନ୍ ପ୍ରବୁ ମିୟାଗେ ଇଦ୍ ସାୟେ ପାଡ଼୍‍ୟି ଆରାମ୍ ମାଡ଼୍‍ତଣ୍ଡ୍, କ୍ରିଷ୍ଟ ଜିସୁନ୍ ୱାଦାନ୍ ଦିନାତେ ଇଦ୍ ତେରାନ୍ ଯାକ ଅଣ୍ଡ୍‌ ଆଦ୍ ମାଡ଼ିତନ୍ ।

⁷ ମୀଇଡ଼୍ ସାରେଦାମ୍ ନା ହୃଦୟ୍‍ତାଗ୍ ମିନ୍ଦେଡ଼ି; ଆଦିଙ୍କ୍ ମିୟାଦ୍ ବିଷୟ୍‍ତେ ଇଦ୍‍ଲେକାମ୍ ଏର୍କା ମାଡ଼ାନାଦ୍ ନାକିଙ୍କ୍‍ ଟିକ୍ ଆଦ୍‍ତେ । ନାନ୍‍ନେ ସ୍ୱାଦିନ୍ ମାନ୍ଦାନ୍ ୱେଲେ ନୁ ଇଞ୍ଜେ ଇଦ୍ ବନ୍ଦି ଅବସ୍ଥାତେ ସୁସମାଚାର୍ତେ ପ୍ରତିଷ୍ଠା ନୁ ସୁରକ୍ଷା ସେଙ୍ଗେ ପାଡ଼୍‍ୟି ମାଡ଼ାନଙ୍କ୍ ଇଶ୍ୱର୍ ନାକିଂଙ୍କ୍ ବେନ୍ ସୁଯଗ୍ ଇତ୍‍ତନ୍, ମୀଇଡ଼୍ ସାରେତଡ଼୍ ଇଦ୍‍ନ୍ ଅଂଶି ଆସ୍‍ମିନ୍ଦେ ।

⁸ ମିଇ ସାରେତଡ଼୍ ସେଙ୍ଗେ ନାୟାଦ୍ ନାର୍‍ଗେ ସ୍ନେହ ସ୍ୱୟଂ ଜିସୁ କ୍ରିଷ୍ଟନାଗାଙ୍କ୍ ନାନ୍ ପାଏମ୍ ଆତ୍‍ତାନ୍ ଇଞ୍ଜ୍‍ ବେସୁଙ୍କ୍‍ ନାନ୍ କେତିତାନ୍, ଇଦ୍ ନିଜାମ୍ ସତ୍ । ଇଶ୍ୱର୍ ଇଦିନ୍ ସାକ୍ଷି ଆତ୍‍ତେ ।

⁹ ନାନ୍ ପ୍ରାର୍ତନା ମାଡ଼ିତାନ୍, ବେଦ୍‍ଲେକାମ୍ ମୁନେଙ୍କ୍‍ତାଦ୍ ବୁଦ୍‍ତେ ନୁ ନ୍ୟାୟ ବିଚାର୍‍ତେ ମିୟାଦ୍ ପ୍ରେମ ନାର୍ଗେ ତାଗାଙ୍କ୍ ନାର୍‍ଗେ ଆଦ୍‌ତେ

¹⁰ ନୁ ମୀଇଡ଼୍ ବେଲାନ୍ ଲେକେତ୍ ଶିକ୍ଷା ସାରେ ଏଞ୍ଚ୍‍ ପାର୍‍ଦ୍‍ତିନ୍ । ଆଲେକେ, ମିଡ଼୍ କ୍ରିଷ୍ଟନାଦ୍ ୱାଦାନାଦ୍ ଦିନାତେ ପବିତ୍ର ନୁ ନିନ୍ଦ୍‍ ଇଲ୍‍ୱେନନି ମାନ୍‍ତିଡ଼୍‍

¹¹ ଇଶ୍ୱର୍‌ତାଦ୍ ଗୌରବ୍ ନୁ ପ୍ରସଂଶା ସେଙ୍ଗେ ମିୟାଦ୍ ଜିୱୁଣ୍ଡ୍ ଜିସୁ କ୍ରିଷ୍ଟ ଇସ୍‍ମାନ୍ଦାନ୍ ସାରେଗୁଣତଡ଼୍ ବର୍ତ୍ତି ଆଦ୍‍ତେ ।

¹² ହୋ ଦାଦାନଡ଼ି ନୁ ଏଲାସ୍କିନଡ଼ି ! ନାନ୍ ମିଇକିଂଙ୍କ୍ କେଞ୍ଜ୍‍ପାନଙ୍କ୍ ଇଚ୍ଛା ଯେ, ନା ସେଙ୍ଗେ ବାତେଏ ଗଟେମ୍ ଆତ୍‍ତେ, ଆଦ୍ ସୁସମାଚାର୍‍ତିଙ୍କ୍ ସାରେପାକା ସାହାଯ୍ୟ ମାଡ଼୍‍ତେ ।

¹³ ପେର୍‍କେ, ଇଗେତ୍‍ ସାରେ ପ୍ରାସାଦ୍‌ତଡ଼୍‌ ନୁ ବାଗାତ୍ ସାରେତଡ଼୍ ପୁତ୍‍ତଡ଼୍ ଯେ, କ୍ରିଷ୍ଟନାଦ୍ ଦାସ ଆସ୍‍ମାନ୍‍ନାଙ୍କ୍ ନାନ୍ ଇଞ୍ଜେ ବନ୍ଦି ଲତ୍‍ତାଗେ ମିନ୍ଦେନ୍ ।

¹⁴ ବାତେଙ୍କ୍ ଇତ୍‍କେ ନାନ୍ ବନ୍ଦି ଆତ୍‍ତାଙ୍କ୍ ନାର୍‍ଗେ ଦାଦାନଡ଼ି ନୁ ହେଲାସ୍କ୍ ପ୍ରବୁନ୍ ସେଙ୍ଗେ ନାର୍‍ଗେ ବିଶ୍ୱାସ୍ ଆତ୍‍ତେ, ମେଣ୍ଡେ ଇଦ୍ ପେର୍‍କେ ଜାମ୍‍ମେ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନଙ୍କ୍ ଅଡ଼ାଦ୍‌ ସାହସ ନାର୍‍ଗେ ଆତ୍‍ତେ ।

¹⁵ ଆଦ୍‍ଲେକାମ୍ ଅଡ଼୍‌ଆଗାଙ୍କ୍‌ ବେସ୍‍ତୁଡ଼୍ ଗଲ୍‍କିନଡ଼୍ କପାମ୍ ଆସ୍ ପ୍ରଚାର୍ କାମ୍‍ତାଗେ ଇଞ୍ଜେ କାଇଲ୍‍ତଡ଼୍ । ନୁ ବାଗାତଡ଼୍ ହୃଦୟତାଗ୍ ଆଦ୍ ମାଡ଼ୁତଡ଼୍ ।

¹⁶ ପ୍ରେମତେ ମାୟ୍‍ଦିଙ୍କ୍‍ ଅଡ଼୍‌‍କ୍ ଆଦ୍‍ ମାଡ଼ାନଙ୍କ୍‍ ସାୟେଲାଗିତ୍ । ବାତେଙ୍କ୍‍ଇତ୍‍କେ ଅଡ଼୍‌ ପୁତ୍‍ତଡ଼୍‍ ଯେ, ଇଶ୍ୱର୍ ନାକିଂଙ୍କ୍ ସୁସମାଚାର୍‍ତେ ସୁରକ୍ଷା ଦାୟିତ୍ୱ ଇତ୍‍ତନ୍ ।

¹⁷ ବାଗାତଡ଼୍ ବିଶ୍ୱସ୍ତତେ କ୍ରିଷ୍ଟନ୍ ଗଟ୍ ପ୍ରଚାର୍ ମାଡ଼କଟ୍ ଆଙ୍ଗାଡ଼ାତାଦ୍ ଲେକାମ୍ ଆସ୍ ଆଦ୍ ମାଡ଼ୁତଡ଼୍ । ନାନ୍‍ନେ ବନ୍ଦିଲୋତ୍‍ତାଗେ ମାନ୍ଦାନ୍ ୱେଲେ ନା ମାନ୍‍ତାଗେ ଅଦିକ୍‌ କଷ୍ଟ ଇଦାନଙ୍କ୍ ଅଡ଼୍‌ ଆଦ୍ ମାଡ଼ୁତଡ଼୍ ।

¹⁸ ଆଗେ ବାତେମିକା ଆଞ୍ଜ୍ ଆୟ୍‍ୟ । ସତ୍‍ଉଦେଶ୍ୟ ଆୟି ବା ଆସତ୍ ସାରେ ଆସ୍ ଆୟି, ବେନ୍ ମିକା ଉପାୟ୍‍ତେ କ୍ରିଷ୍ଟନ୍ ଗଟ୍ ପ୍ରଚାର୍ ଆତ୍‍କେ, ଆଗେ ନାୟାଦ୍ ୱେଡ଼୍‍କ୍‍ । ନାନ୍ ୱେଡ଼୍‍କା ମାଡ଼ମାନ୍‍ତାନ୍,

¹⁹ ବାତେଙ୍କ୍ଇତ୍କେ, ନାନ୍ ପୁତ୍‍ତାନ୍ ମିୟାଦ୍ ପ୍ରାର୍ତନା ନୁ ଜିସୁ କ୍ରିଷ୍ଟନ୍ ଆତ୍ମାତେ ସାହାଯ୍ୟ ତଡ଼୍ ନାନ୍ ମୁକ୍ତି ଲାବ୍ ମାଡ଼ିତାନ୍ ।

²⁰ ଜିୱେତାଗ୍ ବା ଡଲାନାଗ୍, ନାୟାଦ୍ ପାଡ଼ିୟିଦାଗ୍ ଗମାଡ଼୍ ମାଡକଟ୍ ସାରେ ସମୟ୍‍ତେ ନୁ ବିଶେଷତେ ଇଦ୍ ଦୁର୍ଦ୍ଦିନତେ ଶକ୍ତିତନ୍ ଆସ୍ ସାରେଲେକାମ୍ ବେଲାନ୍ ନାନ୍‍ନେ କ୍ରିଷ୍ଟଙ୍କ୍ ଗୌରବ୍‍ତେ ମାଡ଼ିତାନ୍, ଇଦ୍ କେ ନାୟାଦ୍ ଅଣ୍ଡୟ୍‌‍କେ ଆଶେ ନୁ ଆକାଂକ୍ଷା ।

²¹ ବାସ୍ତବିକ, ନା ଜିୱେତାଗ୍ କ୍ରିଷ୍ଟକେ ସାର୍‍ରେ । ଆଦିଙ୍କ୍ ନା ପାକେ ଡଲ୍‍ନାଦ୍ ଅଦିକ୍‌ ଲାବ୍ ଆଦ୍‍ତେ ।

²² ଯଦି ଗେଲ୍‍ସି ମାଞ୍ଜ୍ ନାନ୍ ଅଦିକ୍‌ ସାୟେତ୍ ପାଡ଼୍‍ୟି ମାଡ଼େ ପାର୍‍ଦ୍‍ତାନ୍‍, ଆଲେକେ ଜିୱୁନ୍ ବା ଡଲ୍‍ନାଦ୍ ବାତ୍‍ତିଙ୍କ୍ ହେଞ୍ଚିତାନ୍, ନାନ୍ ଟିକ୍ ମାଡ଼େ ପାର୍‍ୱନ୍ ।

²³ ନାନ୍ ରେଣ୍ଡ୍‍ପାକେ ରେଣ୍ଡ୍ ଆକର୍ଷଣତେ ମିନ୍ଦେ । ଇଦ୍ ଜିୱୁନ୍ ୱିଡ଼୍‍ସି କ୍ରିଷ୍ଟନ୍ ତଡ଼୍ ମାନ୍ଦାନଙ୍କ୍ ନାୟାଦ୍ ଗାଟି ଇଚ୍ଛା । ଆଲେକେ ଇଦ୍ ଲେକାମ୍ ।

²⁴ ମିଇ ସେଙ୍ଗେ ନାୟାଦ୍ ଗେଲ୍‍ସି ମାନ୍ଦାନ୍ ଅଦିକ୍‌ ଦର୍‍କାଡ଼୍ ।

²⁵ ନାନ୍ ଇଦ୍ ବିଷୟ୍‍ତେ ନିଜାମ୍, ଆଦିଙ୍କ୍ ନାନ୍ ପୁତ୍‍ତାନ୍, ନାନ୍ ଜିୱୁନ୍ ମାନ୍‍ତାନ୍ । ମିୟାଦ୍ ବିଶ୍ୱାସ୍ତେ ଅଦିକ୍‌ ନୁ ୱେଡ଼୍‍କ୍‍ ସେଙ୍ଗେ ନାନ୍ ମିଇ ସାରେତଡ଼୍ ସାଙ୍ଗେ ମାନ୍‍ତାନ ।

²⁶ ଆଲେକେ, ମୀଇଡ଼୍ ଜିୱେତାଗ୍ କ୍ରିଷ୍ଟନ୍‍ତଡ଼୍ କାଇଲି ମିକା ନା ତଡ଼୍ ଅଦିକ୍‌ ଗର୍ବ ଆଲ୍‍ସେ ପାର୍‍ଦ୍‍ତିଡ଼୍ ।

²⁷ ନାନ୍ ମିଇକିଙ୍କ୍ ଉଡ଼ାନ୍ ସେଙ୍ଗେ ଆଦାନଙ୍କ୍ ସମର୍ତନ୍ ଆଦ୍‍ତେ ବା ଆୟ୍‍ୟ, ଇଞ୍ଜେ ବେଡ଼୍‍ୟାଦ୍‍ ବିଷୟ ଆଦୁତ୍‍ତେ, ମିୟାଦ୍ ଜିୱୁନ୍ ପ୍ରଣାଲି ବେଲାନ୍ କ୍ରିଷ୍ଟନାଦ୍ ସୁସମାଚାର୍ ଲେକାମ୍ ଆଦ୍‍ତେ ନାନ୍ ବେଲାନ୍‍କି କେଞ୍ଜ୍‍ ପାର୍‍ତାନ୍, ମିଡ଼୍ ଇଦ୍ ଲେକାମ୍ ଆସ୍ ଦୃଡ଼ତେ ନିତ୍‍ତିଡ଼୍ ନୁ ୱେରଡ଼୍ ଆକାଂକ୍ଷା ଆସ୍ ସୁସମାଚାର୍ ବିଶ୍ୱାସ୍ ସେଙ୍ଗେ ୱେରଡ଼୍ ସଂଗ୍ରାମ୍ ମାଡ଼ୁତିଡ଼୍ ।

²⁸ ଶତ୍ରୁଡ଼୍ ନଡ଼କ୍ ୱେର୍‍ମାଟ୍, ସାହାସ୍‍ତେ ଡୁଟ୍‍ଟାଙ୍କ୍ ମାନୁଟ୍ । ଆଲେକେ, ଅଡ଼୍‌ ପୁନ୍ଦେପାର୍‍ତଡ଼୍ ଯେ, ଅଡ଼୍‌‍ ନିଜାମ୍ ହାରେମ୍‍ ଆଦ୍‍ତଡ଼୍‍ ନୁ ମିଡ଼୍ ଜିଡ଼ିତିଡ଼୍, ବାତେଙ୍କ୍ ଇତ୍‍କେ ଇଶ୍ୱର୍‍କେ ମିକିଂଙ୍କ୍ ପରିତ୍ରାଣ ମାଡ଼ିତଣ୍ଡ୍ ।

²⁹ ମାତର୍ କ୍ରିଷ୍ଟନାଗେ ବିଶ୍ୱାସ୍ ମାଡ଼ାନାଦ୍ ଆୟ୍‍ୟ, ଅନ୍‌ ସେଙ୍ଗେ ଦୁଃକାମ୍ କଷ୍ଟ ମାଡ଼ାନ୍ ସେଙ୍ଗେ ମିକିଂଙ୍କ୍ କ୍ରିଷ୍ଟନାଦ୍ ସେବା ମାଡ଼ାନ୍ ସେଙ୍ଗେ ସୁଜଗ୍ ଇତ୍‍ତଣ୍ଡ ।

³⁰ ଇଞ୍ଜେ ଇଦ୍ ଯୁଦ୍‌ ମିଡ଼୍ ନାୟାଦ୍ ପାଡ଼୍‍ୟି ଗ୍ରହନ୍ ମାଡ଼୍‍ଡ଼େ ପାର୍‍ଦ୍‍ତିଡ଼୍ । ମୁନେଙ୍କ୍ ମିଇଡ଼୍ ନାକିଂଙ୍କ୍ ବେନ୍ ଯୁଦ୍‌ ମାଡ଼ାନାଦ୍ ଉଡ଼ିମାତ୍‍ତିଡ଼୍, ଇଞ୍ଜେ ମିକା ନାନ୍ ଆଦ୍ ଯୁଦ୍‍ତାଗ୍ ମିକା ମିନ୍ଦେନ୍ ଇନା ମିଇଡ଼୍ କେଞ୍ଜିତିଡ଼୍ ।