KALA BAWA 34

1 E Guyau isaiki Mosese 2 kasi karaiwaga mina Isireli kawala, “Avai tuta bukusuvisi oviluwela Kenani, mapilana goli bogwa lasakaimi, e kaligeila mi valu bukuvitauwaisi baisa makawala. 3 Kaligei makaina opilibolimila bivitouula mapilana Sini Oviloupakala a bisakauloki deli Edom kaligeila. E kaligei makaina bivitouula mapilana Milaveta Pilamata okala vigimkovila makabulona opilibolimila. 4 E biuwovila bisuwa opilibolimila bila makadana Akarabim Kadaula, e bisaitaula bila mapilana Sini e bitotu wala bila mapilana Kedesi Bania opilibolimila. E biuwovila bisuwa opiliyavata bila Asari Adari, bisuwa bila Asimona. 5 E metoya baisa biuwovila bisuwa bila oitayatila okaligeila Itipita e bila wala ikayawai Bolita Kwaiveka. 6 “Bolita Kwaiveka bivigaki kaligeila mapilana opilikwaibwaga. 7 “E mapilana opiliyavata kaligeila kaiduwosisia wala metoya Bolita Kwaiveka bitotu goli bila wa Koya Ora 8 e metoya baisa bila Amati Kadaula. E metoya baisa bisaitaula wala bila Sedadi 9 bisaitaula bila Siporoni e biuvalutu goli bila itobu Asari Enani. 10 “Mapilana opilibomatu kaligeila kaiduwosisia wala, bivitouula Asari Enani bila Sepam. 11 E oluvi bisuwa opilibolimila bila Abeli, bivapupali Aini opilibomatu, e bisuwa wa koya bisalili okowolawa Milaveta Galili opilibomatu, 12 e metoya baisa bisuwa opilibolimila, bisakauloki papala Waya Yoridani bila itobu Milaveta Pilamata. “Baisa makaisina kaivasi kaligeila mi valu." 13 Mapaila Mosese iluki mina Isireli kawala, “Ka, mi valu makwaisina e kami vilavila bukuyosasi metoya okowobobuta. Valu makwaisina Guyau bogwa leisakaimi yokomi dilalima dilavasi e deli goli yuwotala dalela Manasa. 14 E matausinaga Rubeni dalela toyo Gada dalela deli goli mayuwona Manasa dalela opilibomatu, bogwa kavilaisi e leiyosasi kasi vilavila mapilana Yoridani opilibomatu piliyuwela Yeriko makawala avaka leibudoki kasi bawa litusia." 16 E Guyau iluki Mosese kawala, 17 “Ka, Eleasa tolula deli Yosuwa matauna Nuni latula matausina bivilaisi tomota si valu. 18 E tuvaila kunagi tokugwa taitala taitala metoya dala dilatala dilatala bipilasaisi matausina deli bivilaisi." 19 Baisa makawala tauwau matausina Guyau bogwa leinagi. DalaTokugwa YudaKelebaSimioniSelumieliBeniaminaElidadiDaniBukiManasaAnieliEpereimKemueliSebuloniElisapaniIsakaPalitieliAseraAiudaNapitalaiPedaeli. 29 Baisa makawala kasi bawa tauwau matausina Guyau bogwa leinagi paila bivilaisi si valu mina Isireli olumoulela Kenani.