SAM 140

1 Mwa Guyau! Kukwatumovaigu metoya matausina tomitugaga. Kukolaigu metoya matausina togigasisi. 2 Matausina tuta komwaidona ikikeiwalasi paila mitugaga, tuta komwaidona deli wala si kominimani. 3 Mayesi makawala keiyuna naiyayana, e si biga makawala lou tigininila. 4 Mwa Guyau! Kutabodaigu metoya osi peula tomitugaga. Kukolaigu metoya togigasisi, matausina eikikeiwalasi paila ulo kapusi. 5 Matausina ninasi walakaiwa ileiyasi sikula paila yeigu, e isailisi agu buluva ogu keda paila biyosaigusi, e ogu keda ileiyasi tuvaila agu sikula paila mwada bawai. 6 Aluki Guyau kawagu, “Yoku wala ulo Yaubada.” Mwa Guyau! Kulagi ulo nigada paila pilasi. 7 Mwa! Guyau ulo Yaubada, yoku agu taboda topeula. Yoku bogwa lokukolaigu olopola kabilia. 8 Mwa Guyau! Gala bukusaiki tomitugaga avaka magisi. Gala bukutagwala bipeulasi metoya avaka eikikeiwalasi. 9 Gala bukutagwala agu tilaula bitomgwagasi. Avaka eikapokaigusi kukwaimilivau baisa matausina. 10 Ibodi pwanosi saina yuviyavi bidebwalisi ouwosi matausina. Ibodi bukulavi matausina bilosi olumoulela mlopu e gala avai tuta bisunapulasi. 11 Ibodi matausina totabinona bimamasi. E ibodi si mitugaga biyosi togigasisi e bikatumtuwoli matausina. 12 Mwa Guyau! Anikoli yoku kupii matausina tonamakava, e kusaiki matausina gumalawa avaka bibodi si kaisisu. 13 Tomitukwaibwaila mokwita wala biyakawolaimsi. Matausina bisisuaisi deli yoku.