KOLOSAI 2

1 No ŋazape mananiŋ, ŋoŋe mecne â Laodikea haeonec â ŋic gâcne šâŋe mai-nane mi honembiŋ, ŋoŋere šâic afecne mi manaekopac. 2 Ŋoŋe maŋŋeŋiczi âte tâcnerâ roroc efâreme Anutu dâŋsoŋ-ticnere fuŋne, Kristo hâcne, mana maŋ ehuc mana utuckerâ mana taranšepieŋ. 3 Erao hâcne maŋɋârâŋ â mamana tara irec šâkâŋne soŋkekicne fokac. 4 Moczi moc mu hemiriŋ eŋarehuc maŋ bâsifuc eŋarenšipiŋte dâŋ mukopac. 5 No sahac-nanezi wiwicko juekopac, maŋnanezi ine ŋoŋehec juhuc ŋoŋe Kristo manasiŋkehuc šišimic erâ sosoŋaŋko domapie honec-ŋoparâ bunane biaŋkekac. 6 Ŋoŋe Kristo Jesu Wofuŋ eŋareocte rombiŋ erao qohotahuc junšepieŋ, 7 ehuc eraoa gâtâ barâ fua-hâmonšepieŋ, â mamanasiŋte hata ŋaza ŋowatuc ekicne ijaha âte sanaŋkerâ daŋge mumuteŋ ecnehuc jupie ferâ fe ehuc fozejec. 8 Moczi moc ŋickonec mamana dâŋ, eeatuc dâŋ racne hâcne, qazu-ŋarehuc maŋŋeŋic bawisenšipiŋte rucŋeŋic banšepieŋ. Dâŋ iŋucne i mimiŋne jaŋere maŋko fuac dâŋ â mâreŋte wiac tâpirihec ira roweckehuc mueŋgopieŋ, Kristorao siŋkehuc mâcne. 9 Manaŋgopieŋ, Anuture sâc i Kristo maŋ sahac-ticnao qaja fuserâ qâniniwerâ fokac. 10 Irec ŋoŋe erao wiac moc mi basaniŋmu, eki hâcne micne â fekicne sasawa jaŋere qizecne. 11 Eraonec maŋeŋic wâc rombiŋ, mezi sahacko ma bapa i mâcne, juju-ŋeŋic raŋɋane heunuckehuc Kristore maqâreŋhec embiŋ hâcne. 12 Ihec eniŋte Miti Opâ rua-ŋarehuc ere hâmocko šuhuc-ŋopakicne, erâ Anutu e tâpiri-ticnezi Kristo hâmockonec bâɋârewec, tâpiri ijaha manasiŋkepie ŋoŋerao fotâcneme fafahare-ticnao wâc šuhuc-ŋopakicne. 13 Ŋoŋe mârâc jaha ma tâmiric juhuc sâqocne kosa barâ hâmocne juhapie Anutu e kiŋŋeŋic behehuc Kristohec bâɋârec-ŋopawec. 14 Erâ dâŋ qaqatara-nâŋec qâreŋkekicne i âke sifuckehuc irec kiŋ papia i bâsuckerâ maripoŋko ɋetickeme arictâc ewec. 15 Iŋuc ehuc fekicne â tâpirihec hâbi-jeŋic bâŋgoroŋkerâ saoreŋ qahuc fuŋne-jeŋic bataniŋkewec. 16 Ŋic moczi nânâ qowi soware me sabata hombaŋ me mosa hombaŋ i me i ŋeŋere me mi ŋeŋere mu supaic mi eŋarezejec. 17 Wiac iŋucnere nâkumucne muzo, fârine šâhec fuaocte irec nâkumucnezi qanaŋ bâniewec. Á fârine ine Kristorao fuawec fokac. 18 Ŋic gâcnezi maŋhuhuŋ hawari erâ juhuc aŋelo araŋ bajareeŋgopieŋ, â maŋnâŋec ŋerisieme wiac honeeŋgopeneŋ muhuc irec manapie fârine eme sahac-jeŋic maŋgâŋ mušoraeŋgopieŋ, ŋic iŋucne jaŋe boreŋ fâri-ŋeŋic mi ŋowac ronšepieŋ. 19 Jaŋe hâcne Kristorao sâcne mi siŋkeeŋgopieŋ. Eki qizec-nâŋec â nâŋâc me sahac-ticne. Eme qizeckonec ruazi fâuckerâ wahahuc me kike fâri ombâŋ-ticne basanaŋ-nâpohuc bândeŋ-nâpoekac. Ehuc gume hesiwiŋ enâreme soka sanaŋte tâpiri Anuturaonec fua-nâreekac. 20 Ŋoŋe Kristore hâmocko šuhuckehuc mâreŋte wiac tâpirihec râpeckembiŋko wemocte mâreŋte hae fâri juhuc tinac sâcmutâc dâŋticne reŋkeeŋgo-pieŋ? 21 Dâŋ kecšiŋuc: “Keci mi bâuac, keci mi nâc, keci mi roc." 22 Wiac nâ bac erâ bebehene hâcne, irec kibâtâc dâŋ i ŋiczi maŋjeŋicte manasurâ mu qaqazuc eeŋgopieŋ. 23 Ŋic iŋucnezi maŋɋârâŋ hawari erâ “bâtâcko â sowa juhuc sahac bâpitiwazo” iŋuc mupie dâŋ izi fârine tinac eekac. Erâ wiac iŋucnezi fârine aricne, izi sasec aka sâcne mi hecneocmu.