Ncaza niya ke aBiraniyawa 3

1 Wərike nongo, aruwanke ham hare nsano, haremay sa are bidii ne aməmo ngaasa me Ashini, yanen ndunkinze ne ashini ha Yeso, awaasa ᐩticuwana a wo ure bituma ne Borewono wo mPiris. 2 ˂Ukuyane kiwenden ne aməmo apuwa sa awaasa ˂ukuzangneke-wo utare, tantaasa Mosa ˂ukuyane kiwenden ne aməmo ukura wo Ashini. 3 Bigana bee sa ᐩutiya ukura, umənu woo umaane wo ukuraw, anongo umənu wo Yeso umaane wo Mosa. 4 Kuwede uje ukura uciye awaasa ᐩutiya una, ama Ashini a wo ᐩutiya kuwede yina. 5 Mosa biriyare bo Ashini, ˂ukuyane kiwenden ne unaafase wo ukura wo Ashini, ˂ukudonkize apuwa sa Ashini uta udonke niya ubusa. 6 Ama Animasihu sa wo a Vana, ˂ukuyane kiwenden ne ashini ha ukura wo Ashini. Haro a agana ha ukura woo ka ꞊tipiti ugaso wo iruwa yooro ne uwuna wo iruwa yee sa tire ne ubuwerinze ne. 7 Wərike nongo, tantaasa Bidiri Bisanobo ˃ugose, «Yenəy, ka ᐩigofe niviyaw newo, 8 kate iyane unyif wo iruwa tantaasa ˂ikiyane agabaa sa ˂ikigaa-ye udafe wom, ne agabaa sa ˂ikinaase iyiyame baa me a ana ne aməmo ndare, 9 kitiya sa ncaaran maye ˂akanaase ayiyame baa me a ana, hane ᐩanay apuwa amənsuha sa ˂nkiyane ndare tinay akuri anaaze. 10 A ana ᐩawuna ˂nkiyane ukara ne ha, hane ᐩnkuna, <Iruwa yeha izaw kom kuwede aje agaba, adaake ayiyama apuwa sa ntare-ha ayane.> 11 Wərike nongo ᐩn-yane ituna ne aməmo ukara wom, » 12 Gbənken a inay, aruwanke ham, kate bigi ne aməmo keye ure bore araa ne uzira wo une wo iruwa sa ᐩuhangareko ᐩujese udafe wo Ashini bore uray. 13 Ama sa iniyaze aciye haye ugaso wo iruwa kuwede uje uweng, sa iyane nituma ne kuwede aje agaba sa ꞊agaase ana a yenəy wərike kate bigi ne aməmo haye ucuge ne unyif wərike kiriyange ke apuwa araa. 14 Haro ticiye apuwa nidii ne aməmo ke Animasihu ka ꞊tipiti apuwa sa ˂kitikpaa ne uciba, niya umanne. 15 Tantaasa ᐩakuna, «Yenəy, ka ᐩigofe niviyaw newo, kate iyane unyif wo iruwa tantaasa ˂ikiyane agabaa sa ˂ikigaa-ye udafe wom.» 16 A aje zeno ˂akagofe hane ᐩagaa-ha udafe woo? Haza unaafase wo haremay sa Mosa ˂ukudafe ne ha nikaane uMasar? 17 A ne aje ˂ukukuri ᐩuyane ukara ne tinay akuri anaaze? Haza a ne haremay sa ˂akayane apuwa araa, hane ᐩangməəze ndare? 18 A aje Ashini ˂ukutuna a aza anugi-ha ne aməmo nivankanzo newo, ka haza haremay sa ˂akayane ugbara wo ato? 19 Wərike nongo ᐩtinay ˂akadaake aciye unugi, wərike uzira wo une wo iruwa yeha.