Iob 11

1 Ma Sopar ra te Nama i ga tata ma i ga biti: 2 Dave, pa da bali laka ra peal tinata? Ma ra lup tinata na tur langalanga vang? 3 Dave, a tarai diat a ki mut laka ure kaum lavur tinata, Ma pa ta tikai laka na tata varuva u ure kaum lavur varvul? 4 Tago u biti: Kaugu tinata na vartovo i takodo, Ma iau gomgom ta ra luaina matam. 5 Ea, gala God na tata, Ma na papa ra bul na ngiene bat u, 6 Ma na pala ra umana magit na pidik ai kana kabinana piram, Ma ra magit na padapada varvo ta kana nga na papalum! Damana una kapa ba God pa i bali u da i topa kaum varpiam parika. 7 Dave, i tale u laka pi una matoto ure ra umana magit na pidik kai God? Dave, kaum kabinana na tuk pa laka ra kabinana kai ra Dekdek Muka? 8 I tuk lake ra bala na bakut; una pait ra ava? I ki ura iat ta ra ruarua na tulungen; una nuk davatane? 9 Ba di valar ia, i lolovina ta dir ma ra rakarakan a gunagunan, Ma i tababa ta dir ma ra ta. 10 Ona na bolo, ma na banu bat ta tikai, Ba ona na oro varurue ra tarai, to ia na tigal ia? 11 Tago i nunure ra tarai vakuku; I gire ra varpiam, ma nina ba pa i nuk pa ia. 12 Ma ra tutana vakuku i tuptup, Di kava da ra natu i ra as, a kuabar. 13 Ona una vatakodo ra balam, Ma una tulue ra ura limam tadav ia, 14 Ona una vung vue ra varpiam kan ra limam, Ma ra magit i bilak pa i ki ta ra kubam, 15 A dovotina pa una vavirvir, tago u gomgom; Ma una tur dekdek, ma pa una burut. 16 Ma una nuk vue kaum kini na malari, Una nuk vake da ka ra tava i panie ba ra lovon i par. 17 Kaum nilaun na kapa, da ra kapa ba i keake tur; Ma ona u ki ta ra bobotoi, na da ka ra lar. 18 A ninunuk ung na ki mulai piram, ma una ki bulu tana; Una gigira vurvurbit, ma una ngo muka. 19 Una va, ma pa ta na na vaburut u; Ma mangoro diat a lul upi ta vartabar piram. 20 Ma ra kiau na mata i ra umana tena varpiam diat a pula, Ma diat a mama lop, A kopono ninunuk ung na ki pire diat, ba diat a vung vue ra tulungea i diat.