Tinata Valavalar 3

1 Natugu, koko una valubane kaugu tinata na vartovo, Ma ra balam na toratorom ta kaugu lavur vartuluai; 2 Tago diat a valolovina kaum kini ati ra pia, Ma diat a vapealane kaum lavur kilala na nilaun, ma ra malmal piram. 3 A varmari ma ra dovotina koko dir a vana kan u; Una kurkurue dir, ma una tumu dir ta ra mapina balam. 4 Damana God na mari u, ma na manane u, Ma ra tarai bula. 5 Una nurnur tai God ma ra balam par, Ma koko una tur bokon ta kaum kabinana iat. 6 Una gire ilam ia ta kaum lavur vinavana, Ma na mal vado kaum lavur nga. 7 Koko una malamala tena kabinana; Una ru ra Luluai, ma una vana kan ra kaina. 8 Damana ta pakam na ongor, Ma ra lavur urum diat a lagar tana. 9 Una ru ra Luluai ma kaum tabarikik, Ma una tabar ia ma ra luaina vuai e par ta kaum uma; 10 Damana kaum umana pal na vuvuvung diat a kor, Ma kaum umana tung na vain diat a buka leke ma ra polo na vain. 11 Natugu, koko una pidimuane ra varvapagumanene kai ra Luluai, Ma koko una talanguan ta kana varpit; 12 Tago ra Luluai i pit nina i mari ia, Da ra tutana i pit natuna, a bul na vakak. 13 I ti doan nam ra tutana ba i tikan tadav ra kabinana, Ma nam bula ra tutana ba i vatur vake ra minatoto; 14 Tago ra magit da vatur vake tana i boina, ma nam ba da vatur vake ure ra mani pata, Ma ra magit da pie pa ia tana i kat, ma ra ngatngat na goled pata. 15 I ngatngat tuna ma ra umana kiau na kalagi pata, Ma ra lavur tabarikik ba u anan upi ia pa i varogop me. 16 Ta ra limana tuna i vatur vake ra kini lolokon ati ra pia; Ta ra mairana i vatur vake ra peal tabarikik ma ra variru. 17 Kana lavur nga dia mamar, Ma kana lavur pal a nga dia malmal. 18 I da ra davai na nilaun pire diat dia vatur vake; Ma diat par dia vatur vake dia ti doan. 19 A Luluai i ga vung ra vunapai ra rakarakan a gunagunan ma ra kabinana; Ma i ga page ra bala na bakut ma ra kapa na ninunuk; 20 A lamanana i ga vuvuai rikai ta kana minatoto, Ma ra mavoko i tua kan ra bakut. 21 Natugu, koko una lingan kan diat; Una vatur vake ra dovot na kabinana ma ra kapa na ninunuk; 22 Damana diat a valagar pa ra balam, Ma diat a da ra magit na marmar ta ra inoam. 23 Una ga vana bulu ta kaum nga, Ma vakir una ga tuke ra kaum. 24 Ba u va, pa una burut; Ma ba u va mat, kaum nidiop na kalakalami piram. 25 Koko una burut ure ta magit na kinaian. Ba ure ra vinirua kai ra tena varpiam, ba i tadav ia; 26 Tago una nurnur tai ra Luluai, Ma na balaure ra kakim upi koko na papa ta ra kun. 27 Koko una muie ra bo na magit ta diat i topa diat, Ona i tale u ba una tul tar ia ta diat. 28 Koko una biti tai talaim, Una vana ka boko, ma una vana mulai uti, ma ningene ina tabar u, Ma go u tar vung ra magit. 29 Koko una nuk upi ta kaina magit ure talaim, Tago i kiki bulu piram. 30 Koko amur a varngangar vakuku ma ta tutana, Ona pa i ga pait ta kaina magit piram. 31 Koko una pin ra tena vakavakaina, Ma koko una pilak pa kana ta mangamangana; 32 Tago nina i gegagege ra maukuana i da ra magit na milmilikuan pire ra Luluai, Ma ra dovot na tutana dir ki na bartalaina me. 33 A Luluai i tata vabilak ra kuba i ra tena varpiam, Ma i tata vadoane ra kuba i ra tena takodo. 34 A dovotina i kulume ra umana tena varkulumai, Ma i mari diat i madu ra nuknuk i diat. 35 A umana tena kabinana diat a kale pa ra variru boko, Ma ra umana lunga diat a vatur vake ra vavirvir.