A Umana Kakailai 12

1 Luluai, una maramaravut, tago ra tena lotu i tar panie; Tago diat i dovot ra maukua i diat dia par pire ra umana natu i ra tarai. 2 Dia tatike ra magit vakuku ka, tikatikai dir ma talaina; Dia tata na varmananai vavaongo, ma ra bala i diat dir enana ma kadia tinata. 3 Ra Luluai na nila vue ra ngie i diat par dia tata na varmananai vavaongo, Ma ra karamea i diat dia vangala vakuku kadia tinata. 4 Diat dia biti: Avet a ongaongor ma ra karamea i vevet; A ngie i vevet kavevet iat; to ia na luluai ta vevet? 5 Go ina tut, ra Luluai i biti, Tago di ra vue ra magit kai ra luveana, ma tago diat dia ki na niiba dia mamadung; Ina vaki ia ta ra rivarivan nina ba i anan upi ia. 6 A tinata kai ra Luluai a gomgom na tinata; I da ra silva ba di tar tun vagomgom ia ta ra ubu ra pia, Di valavurua ma ra varvagomgom tana. 7 Luluai, una ga mataure diat, Una ga kove diat kan go ra taun tarai vatvatikai. 8 A umana tena varpiam dia vana vurvurbit ta ra gunagunan par, Tago di nuk vangala pa ra varpiam pire ra umana natu i ra tarai.