A Umana Kakailai 47

1 Avat a tarai par avat a papar; Avat a ngenge tadav God ma ra gugu. 2 Tago ra Luluai, a Ngala Kakit, a tena ongor tuna, Ia iat ra ngala na King ta ra rakarakan a gunagunan. 3 I tar vamolo tar ra tarai ta dat, Ma ra umana Tematana ta ra vavai na kau i dat. 4 I pilak pa ra tiniba upi kadat, A gunan ba i ngala tuna tana ra nuknuk i Iakob nina i mari ia. Sela. 5 God i tutua ma ra kalukal, RA Luluai ma ra nilai ra tavur. 6 Avat a kakailai na pite varpa tadav God, Avat a kakailai na pite varpa; Avat a kakailai na pite varpa tadav kada King, Avat a kakailai na pite varpa. 7 Tago God i king ta ra rakarakan a gunagunan par, Avat a kakailai na pite varpa ma ra mari na kakailai. 8 God i varkurai na king pire ra lavur vuna tarai. God i tar ki ta kana kiki gomgom. 9 A umana luluai kai ra tarai dia tar ki varurung, Diat ma ra tarai kai ra God kai Abaraam; Tago God i kure ra lavur luluai ta ra rakarakan a gunagunan; Ia iat i tar ngala kakit.