उत्पत्ति 15

¹ इन बातों को बाद प्रभु को यो वचन दर्शन म अब्राम को जवर पहुंच्यो : “हे अब्राम, मत डर; मय तोरी ढाल अऊर बड़ो प्रतिफल आय।”

² अब्राम न कह्यो, “हे प्रभु यहोवा, मोरी त कोयी सन्तान नहाय, अऊर मोरो घर को वारिस यो दमिश्कवासी एलीएजेर होयेंन, बल्की तय मोख का देजो?”

³ अऊर अब्राम न कह्यो, “मोख त तय न सन्तान नहीं दियो, अऊर का देखू हय, कि मोरो घर म पैदा भयो एक जन मोरो वारिस होयेंन।”

⁴ तब प्रभु को यो वचन ओको जवर पहुंच्यो, “यो तोरो वारिस नहीं होयेंन, तोरो जो खुद को बेटा होयेंन, उच तोरो वारिस होयेंन।”

⁵ अऊर प्रभु न अब्राम ख बाहेर लिजाय क कह्यो, “आसमान को तरफ नजर कर क् तारा ख, तय गिन सकय हय?” तब प्रभु न अब्राम सी कह्यो, “तोरो वंश असोच होयेंन।”

⁶ अब्राम न परमेश्वर पर विश्वास करयो; अऊर परमेश्वर न अब्राम को यो विश्वास ख उन्की सच्चायी मान्यो।

⁷ अऊर परमेश्वर न अब्राम सी कह्यो, “मय उच परमेश्वर आय, जो तोख कसदियों को ऊर नगर सी बाहेर ले आयो, कि तोख यो देश को अधिकार देऊं।”

⁸ अब्राम न कह्यो, “हे परमेश्वर यहोवा, मय कसो जानु कि यो देश पर मोरो अधिकार होयेंन?”

⁹ परमेश्वर न अब्राम सी कह्यो, “मोरो लायी तीन तीन साल की एक गाय, अऊर एक शेरी, अऊर एक मेंढा, अऊर एक पण्डुक, अऊर एक कबूत्तर को बच्चा भी लाजो।”

¹⁰ अऊर इन पूरो ख ले क, अब्राम न बीच सी दोय टुकड़ा कर दियो अऊर टुकड़ा ख आमने सामने रख्यो पर चिड़ियां को ओन टुकड़ा नहीं करयो।

¹¹ जब शिकारी पक्षी उन टुकड़ा पर झपट्यो, तब अब्राम न उन्ख उड़ाय दियो।

¹² जब सूरज डुबन लग्यो, तब अब्राम ख गहरी नींद आय गयी; अऊर देखो, बहुत जादा डर अऊर अन्धकार ओको ऊपर आय गयो।

¹³ तब प्रभु न अब्राम सी कह्यो, “यो अच्छो सी जान ले कि तोरो वंश परायो देश म परदेशी होय क रहेंन, अऊर ऊ देश को लोगों को दास होय जायेंन; अऊर हि उन्ख चार सौ साल तक दु:ख देयेंन।

¹⁴ तब जो देश को हि दास होयेंन ओख मय दण्ड देऊं : अऊर ओको बाद हि बड़ो धन उत सी ले क निकल आयेंन।

¹⁵ तय त अपनो मरयो हुयो पूर्वजों को जवर जाजो; अऊर तोख पूरो बुढ़ापा म माटी दी जायेंन।

¹⁶ पर हि चौथी पीढ़ी म इत फिर आयेंन : कहालीकि अब तक एमोरी जाति को अधर्म पूरो नहीं भयो हंय।”

¹⁷ अऊर असो भयो कि जब सूरज डुब गयो अऊर घोर अन्धारो छाय गयो, तब एक आग भट्टी जेको म सी धुवा निकलत होतो अऊर एक जरती हुयी मशाल दिखायी दी जो उन टुकड़ा को बीच म सी होय क निकल गयी।

¹⁸ उच दिन परमेश्वर न अब्राम को संग यो वाचा बान्धी, “मिस्र की महा नदी सी ले क फरात नाम की बड़ी नदी तक जितनो देश हय,

¹⁹ मतलब केनियों, कनिज्जियों, कदमोनियों,

²⁰ हित्तियों, परिज्जियों, रपाइयों

²¹ एमोरियों, कनानियों, गिर्गाशियों अऊर यबूसियों को देश, मय न तोरो वंश ख दियो हय।”