उत्पत्ति 5

¹ आदम की वंशावली को विवरन यो तरह हय। जब परमेश्वर न आदम ख बनायो त ओन उन्ख अपनो जसो बनायो।

² ओन उन्ख नर अऊर नारी बनायो, जब हि दोयी बनायो गयो, तब ओन ओको नाम आदम रख्यो अऊर उन्ख आशीर्वाद दियो।

³ जब आदम एक सौ तीस साल को भयो, तब ओको सी ओको जसो एक टुरा पैदा भयो जो ओको समान होतो, अऊर ओन ओको नाम शेत रख्यो।

⁴ अऊर शेत को जनम को बाद आदम आठ सौ साल तक जीन्दो रह्यो, अऊर ओख अऊर भी टुरा टुरी पैदा भयो।

⁵ यो तरह आदम कुल नव सौ तीस साल जीन्दो रह्यो, तब बाद म ओकी मृत्यु भय गयी।

⁶ जब शेत एक सौ पाच साल को भयो, तब ओको सी एनोश पैदा भयो।

⁷ एनोश को जनम को बाद शेत आठ सौ सात साल तक जीन्दो रह्यो, अऊर ओख अऊर भी टुरा टुरी पैदा भयी।

⁸ यो तरह शेत कुल नव सौ बारा साल जीन्दो रह्यो; ओको बाद ओकी मृत्यु भय गयी।

⁹ जब एनोश नब्बे साल को भयो, तब ओन केनान ख पैदा करयो।

¹⁰ केनान को जनम को बाद एनोश आठ सौ पन्द्रा साल तक जीन्दो रह्यो, अऊर ओख अऊर भी टुरा टुरी पैदा भयी

¹¹ यो तरह एनोश कुल नव सौ पाच साल जीन्दो रह्यो; ओको बाद ओकी मृत्यु भय गयी।

¹² जब केनान सत्तर साल को भयो, तब ओन महल्लेल ख पैदा करयो।

¹³ महल्लेल को जनम को बाद केनान आठ सौ चालीस साल तक जीन्दो रह्यो, अऊर ओख अऊर भी टुरा टुरी पैदा भयी।

¹⁴ यो तरह केनान कुल नव सौ दस साल जीन्दो रह्यो; ओको बाद ओकी मृत्यु भय गयी।

¹⁵ जब महल्लेल पैसठ साल को भयो, तब ओन येरेद ख पैदा करयो।

¹⁶ येरेद को जनम को बाद महल्लेल आठ सौ तीस साल तक जीन्दो रह्यो, अऊर ओख अऊर भी टुरा टुरी भयी।

¹⁷ यो तरह महल्लेल कुल आठ सौ पंचानबे साल जीन्दो रह्यो; ओको बाद ओकी मृत्यु भय गयी।

¹⁸ जब येरेद एक सौ बाहसठ साल को भयो, तब ओन हनोक ख पैदा करयो।

¹⁹ हनोक को जनम को बाद येरेद आठ सौ साल तक जीन्दो रह्यो, अऊर ओख अऊर भी टुरा टुरी भयी।

²⁰ यो तरह येरेद कुल नव सौ बाहसठ साल जीन्दो रह्यो; ओको बाद ओकी मृत्यु भय गयी।

²¹ जब हनोक पैसठ साल को भयो, तब ओन मतूशेलह ख पैदा करयो।

²² मतूशेलह को जनम को बाद हनोक तीन सौ साल तक परमेश्वर को संग संग चलतो रह्यो, अऊर ओख अऊर भी टुरा टुरी भयी।

²³ यो तरह हनोक कुल तीन सौ पैसठ साल जीन्दो रह्यो।

²⁴ हनोक परमेश्वर को संग संग चलत होतो; तब ऊ गायब भय गयो, कहालीकि परमेश्वर न ओख उठाय लियो।

²⁵ जब मतूशेलह एक सौ सत्तासी साल को भयो, तब ओको सी लेमेक ख पैदा करयो।

²⁶ लेमेक को जनम को बाद मतूशेलह सात सौ बयासी साल तक जीन्दो रह्यो, अऊर ओख अऊर भी टुरा टुरी भयी।

²⁷ यो तरह मतूशेलह कुल नव सौ उनसत्तर साल जीन्दो रह्यो; ओको बाद ओकी मृत्यु भय गयी।

²⁸ जब लेमेक एक सौ बयासी साल को भयो, तब ओन एक बच्चा पैदा करयो।

²⁹ अऊर ओन ओको नाम नूह रख्यो, अऊर कह्यो, “जो जमीन ख प्रभु न श्राप दियो हय, ओको बारे म यो लड़का हमरो कार्य करतो समय हमरो कठिन कामों म जो हम करजे हंय, यो हम्ख आराम देयेंन।”

³⁰ नूह को जनम को बाद लेमेक पाच सौ पंचानबे साल तक जीन्दो रह्यो, अऊर ओख अऊर भी टुरा टुरी भयी।

³¹ यो तरह लेमेक कुल सात सौ सतहत्तर साल जीन्दो रह्यो; ओको बाद ओकी मृत्यु भय गयी।

³² अऊर जब नूह पाच सौ साल को भयो, तब ओन शेम, हाम अऊर येपेत ख पैदा करयो।