लैव्यव्यवस्था 9

¹ आठवों दिन मूसा न हारून अऊर ओको टुरावों ख अऊर इस्राएली बुजूर्गों ख बुलाय क कह्यो।

² “पापबलि लायी एक निर्दोष बछड़ा, अऊर होमबलि लायी एक निर्दोष मेंढा लाय क परमेश्वर को सामने भेंट चढ़ाव।

³ अऊर इस्राएलियों सी यो कह्य, ‘तुम पापबलि लायी एक बकरा, अऊर होमबलि लायी एक बछड़ा अऊर एक मेंढी को बच्चा लावो, जो एक साल को हो अऊर पूर्ण स्वस्थ हो,’

⁴ अऊर मेल-मिलाप बलि लायी परमेश्वर को सामने चढ़ावन लायी एक बईल अऊर एक मेंढा, अऊर तेल सी सान्यो हुयो मैदा को एक अनाज भेंट भी लावो; कहालीकि अज परमेश्वर तुम्ख दर्शन देयेंन।”

⁵ अऊर जो-जो चिज की आज्ञा मूसा न दी उन सब ख हि मिलाप वालो तम्बू को आगु लाये; अऊर पूरी मण्डली जवर जाय क परमेश्वर को सामने खड़ी भयी।

⁶ तब मूसा न कह्यो, “यो ऊ काम आय जेक करन लायी परमेश्वर न आज्ञा दी हय कि तुम ओख करो; अऊर परमेश्वर की महिमा तुम ख दिखायी पड़ेंन।”

⁷ तब मूसा न हारून सी कह्यो, “परमेश्वर की आज्ञा को अनुसार वेदी को जवर जाय क अपनो पापबलि अऊर होमबलि ख चढ़ाय क अपनो अऊर सब जनता को पाप ख झाके करो अऊर जनता को चढ़ावा ख भी चढ़ाय क ओको पाप ख झाके।”

⁸ येकोलायी हारून न वेदी को जवर जाय क अपनो पापबलि को बछड़ा ख बलिदान करयो।

⁹ अऊर हारून को टुरा खून ख ओको जवर ले गयो, तब ओन अपनो बोट ख खून म डुबाय क वेदी को सींगो पर खून ख लगायो, अऊर बच्यो खून ख वेदी को पाया पर कुड़ाय दियो;

¹⁰ अऊर पापबलि म की चरबी अऊर गुड़दा अऊर कलेजा पर की झिल्ली ख ओन वेदी पर जलायो, जसो परमेश्वर न मूसा ख आज्ञा दी होती।

¹¹ अऊर मांस अऊर खाल ख ओन छावनी सी बाहेर आगी म जलायो।

¹² तब होमबलिपशु ख भेंट चढ़ायो; अऊर हारून को टुरावों न खून ख ओको हाथ म दियो, अऊर ओन ओख वेदी पर चारयी तरफ छिड़क दियो।

¹³ तब उन्न होमबलिपशु को तुकड़ा अऊर मुंड सहित ओको हाथ म दियो अऊर ओन ओख वेदी पर जलाय दियो।

¹⁴ अऊर ओन अतड़ियों अऊर पाय ख धोय क वेदी पर होमबलि को ऊपर जलायो।

¹⁵ तब हारून न लोगों को चढ़ावा ख आगु लाय क अऊर ऊ पापबलि को बकरा जो लोगों लायी होतो ले क ओकी बलि चढ़ायो, अऊर पहिले को जसो ओख भी पापबलि कर क् चढ़ायो।

¹⁶ अऊर ओन होमबलि ख भी जवर लिजाय क विधि को अनुसार चढ़ायो।

¹⁷ अऊर अनाज भेंट ख भी जवर लिजाय क ओको म सी मुट्ठी भर वेदी पर जलायो, यो सुबेरे को होमबलि को सहित चढ़ायो गयो।

¹⁸ बईल अऊर मेंढा, मतलब जो मेल-मिलाप बलि पशु, जनता लायी होतो हि भी बलि करयो गयो; अऊर हारून को टुरावों न खून ख उन्को हाथ म दियो,अऊर ओन ओख वेदी पर चारयी तरफ छिड़क दियो;

¹⁹ अऊर उन्न बईल की चरबी ख, अऊर मेंढा म सी चरबीदार पूछ ख, अऊर जो चरबी सी अंतड़ियां झकी रह्य हय ओख, अऊर गुड़दावो सहित कलेजा पर की झिल्ली ख भी ओको हाथ म दियो;

²⁰ अऊर उन्न चरबी ख जनावरों की छातियों पर रख्यो; अऊर ओन वा चरबी वेदी पर जलायी,

²¹ पर छातियों अऊर दायो जांघ ख हारून न मूसा की आज्ञा को अनुसार हिलावन की भेंट लायी परमेश्वर को सामने हिलायो।

²² तब हारून न लोगों को तरफ हाथ बढ़ाय क उन्ख आशीर्वाद दियो; अऊर पापबलि, होमबलि, अऊर मेल-मिलाप बलियों ख चढ़ाय क ऊ खल्लो उतर गयो।

²³ तब मूसा अऊर हारून मिलाप वालो तम्बू म गयो, अऊर बाहेर निकल क लोगों ख आशीर्वाद दियो; तब परमेश्वर को महिमा पूरी जनता ख दिखायी दियो।

²⁴ अऊर परमेश्वर को सामने सी आगी निकली अऊर चरबी सहित होमबलि ख वेदी पर भस्म कर दियो; येख देख क जनता न जय जयकार को नारा लगायो अऊर अपनो अपनो मुंह को बल गिर क दण्डवत प्रनाम करयो।