1 Juan 5

1 Jyeé i̱xtiâla̱ Naináâné ngats’iì xi̱ta̱ xi nguì ko̱ ini̱ma̱âla̱ mokjeiínâla̱ nga jè Jesús, [jèâné xi Nainá kisìkasén], jèâné xi Cristo. Ko̱ ngats’iì xi̱ta̱ xi tsjakeè xi na̱’èn tíjnaâla̱, tjínèâla̱ nga ti̱koa̱ ko̱tsjakeè ngats’iì i̱xtiâla̱ na̱’ènâla̱. 2 K’e̱ nga matsjachaá Nainá, ko̱ ti̱koa̱ nìkitasoán kjo̱tíxomaâla̱, ‘yaâná nga ti̱koa̱ matsjachaá jñà xi i̱xtiâla̱ Nainá ma. 3 K’oa̱á s’ín tjín tsà kixi̱ kjoa̱ nga matsjachaá Nainá, jèâné nga ndaà si̱kitasoán kjo̱tíxomaâla̱. Ko̱ jè kjo̱tíxomaâla̱, mìtsà ‘ñó ‘in bitasòn. 4 Nga̱ ngats’iì xi̱ta̱ xi i̱xtiâla̱ Nainá ma, síkijneéâla̱ ngats’iì kjoa̱ ch’o xi tjín i̱sò’nde. Koií ma nìkijneâlá kjoa̱ xi tjín i̱sò’nde nga̱ mokjeiínâná i̱t’aà ts’e̱ Cristo. 5 Ni̱yá xi ma síkijneâla̱ jè kjoa̱ ch’o xi tjín i̱sò’nde, ta̱jngoòâné jè xi̱ta̱ xi mokjeiínâla̱ i̱t’aà ts’e̱ Jesús, nga jèâné xi Ki’ndíâla̱ Nainá ma. Jèâné xi chíkjoa̱âla̱ nga si̱ìkijne. 6 Jéâné Jesucristo xi j’iì i̱ i̱sò’nde. Ko̱ k’e̱ nga j’iì, jè nandá ko̱ jní xi ndaà tsakó. Ko̱ mìtsà tà jè nandá xi tsakó, ti̱koa̱á jè jní. Ko̱ jè Ini̱ma̱ Tsjeèâla̱ Nainá xi béno̱jmí kixi̱ yáâne xi jè. Nga̱ jè Ini̱ma̱ Tsjeèâla̱ Nainá, nguì kjoa̱ kixi̱âné. 7 Jàn maâne xi nguì tsjá kixi̱ ‘énâla̱ xi i̱t’aà ts’e̱ kjoa̱ koi: 8 jè Ini̱ma̱ Tsjeèâla̱ Nainá, jè nandá, ko̱ jè jní. Ko̱ ngajàn koi, ngásòn tsò. 9 Tsà mokjeiínâná jñà ‘én xi tsjá xi̱ta̱ i̱sò’nde, mochjeénâné nga ìsa̱ ndaà ko̱kjeiínâná jè ‘én xi jè sobà Nainá títsjá. Nga̱ jè ‘én xi títsjá, jè tíbéno̱jmí, yáâne xi Ki’ndíâla̱ Nainá. 10 Jè xi nguì ko̱ ini̱ma̱âla̱ mokjeiínâla̱ i̱t’aà ts’e̱ Ki’ndíâla̱ Nainá, ya̱á tíjiìn ini̱ma̱âla̱ nga kixi̱í kjoa̱ jè ‘én xi tsjá Nainá. Ta̱nga jè xi mìkiì mokjeiínâla̱ i̱t’aà ts’e̱ Nainá, jè Nainá, ndiso tíhochrjengui, koií kjoa̱âla̱ nga mìkiì mokjeiínâla̱ ‘én xi tsjá Nainá xi i̱t’aà ts’e̱ Ki’ndíâla̱. 11 Jè ‘én xi kitsjaà Nainá, jèâné nga jè Nainá tsjáâná kjoa̱binachon xi mì fehet’aà ni̱ta̱ kjéâne. Ko̱ jè kjoa̱binachon jè, ya̱á sakóâná i̱t’aà ts’e̱ Ki’ndíâla̱. 12 Jè xi̱ta̱ xi Ki’ndíâla̱ Nainá tíjnajiìn ini̱ma̱âla̱, tjínâla̱ kjoa̱binachon xi mìkiì fehet’aà ni̱ta̱ kjéâne; ta̱nga jè xi̱ta̱ xi mìtsà Ki’ndíâla̱ Nainá tíjnajiìn ini̱ma̱âla̱, tsjìnâla̱ kjoa̱binachon. 13 Jñò xi mokjeiínânò i̱t’aà ts’e̱ Ki’ndíâla̱ Nainá, koií xá tìkjiìânò Xo̱jo̱n jè méâne nga ndaà kàtasijiìnânò nga jyeé tjínânò kjoa̱binachon xi mìkiì fehet’aà ni̱ta̱ kjéâne. 14 K’oa̱á maâne nga ‘ñó tjín takoán k’e̱ nga nokjoát’aàâlá Nainá. K’oa̱á s’ín ndaà kji̱’nchréâná tsà k’oa̱s’ín si̱jét’aàâlá koni s’ín sasénâla̱ jè. 15 Tsà jye k’oa̱s’ín tíjiìnâná nga Nainá ’nchréâná k’e̱ nga tsà mé xi nìjéâlaá, ti̱koa̱á jyeé ‘yaá nga ti̱k’e̱éâne nga nìjéâlaá tsjáâná mé xi nìjéâlaá. 16 Tsà yá xi̱ta̱ xi skoe̱ jngoò xi̱ta̱ xíkjín xi ti̱koa̱ i̱t’aà ts’e̱ Cristo mokjeiínâla̱ nga ya̱ tíkàjiìn jñà jé xi mìtsà kjoa̱biyaà fìko̱âná, maá katítsi’batjì, ko̱ jè Nainá tsjáâla̱ kjoa̱binachon jè xi̱ta̱ xi tíhótsji jé. Ta̱nga tà jñáâné xi ko̱xanâla̱ nga ma si̱tsi’batjì jñà xi̱ta̱ xi mìtsà nguì kjoa̱biyaà kjit’aàâla̱ jñà jé xi nchihótsji. Nga̱ tjín jé xi kjoa̱biyaà fìko̱âná, ko̱ k’oa̱á xan nga mìtsà mochjeén nga si̱tsi’batjì jè xi̱ta̱ xi ko̱tjín jé xi tíhótsji. 17 Ta̱nga ngats’iì kjoa̱ ch’o xi s’ín xi̱ta̱, nguì jéâné nga nguixko̱n Nainá. Ta̱nga tjínâné jñà jé xi mìtsà kjoa̱biyaà fìko̱âná. 18 Jyeé tíjiìnâná nga jñà xi i̱xtiâla̱ Nainá ma, mìtsà ti̱ya̱ títsa̱jnajiìnâne jé, nga̱ jè Jesús xi Ki’ndíâla̱ Nainá ma, tís’ín kinda̱, ko̱ jè xi̱ta̱ nei̱í, mì ti̱ kiì mé xi ch’o síko̱âne. 19 Jyeé ‘yaâná nga i̱xtiâla̱ Nainá ‘mìâná; ta̱nga jñà xi̱ta̱ xi mìkiì mokjeiínâla̱ i̱t’aà ts’e̱ Cristo xi tjín nga tíjtsa i̱sò’nde, jè xi̱ta̱ nei̱í tíhotíxomaâla̱. 20 Ti̱koa̱á ‘yaâná nga koií xá j’iìâne jè Ki’ndíâla̱ Nainá i̱ i̱t’aà nangui nga jè ndaà kisìkichi̱yaâná méâne nga ma yaxkoaán xi nguì jè sobà Nainá. Ko̱ ya̱á titsa̱jnakoa̱á jè xi nguì jè sobà Nainá koií kjoa̱âla̱ nga ya̱ titsa̱jnakoa̱á Jesucristo xi Ki’ndíâla̱ ma, xi ti̱jè sobàâne Nainá ko̱ xi maâla̱ tsjáâná kjoa̱binachon xi mìkiì fehet’aà ni̱ta̱ kjéâne. 21 Jñò xi ndí i̱xtiâna̱ xanânò, kì jñà onguítji̱nguiâlà jñà nainá xi beèxkón xi̱ta̱ xi mìtsà kixi̱ kjoa̱ nga Nainá.