1 Timoteo 6

1 Ngats’iì xi̱ta̱ na̱xa̱ndáâla̱ Nainá xi chi̱’nda títsa̱jna’ñó, ndaà kàteèxkón neiâla̱ méâne nga mì yá xi ch’o ki̱chja̱jnoâla̱ Nainá ko̱ ‘én xi okoòyaá i̱t’aà ts’e̱ Cristo. 2 Jñà xi̱ta̱ chi̱’nda xi mokjeiínâla̱ neiâla̱ i̱t’aà ts’e̱ Cristo, mochjeénâné nga ngásòn ndaà kàteèxkón neiâla̱ nga ’ndse̱é joó i̱t’aà ts’e̱ Cristo. Ãsa̱á ndaà kàtasíxáâla̱ nga ngásòn mokjeiínâla̱ ‘énâla̱ Nainá ti̱koa̱ tsjakeè xíkjín. Jñà ‘én koi, ta̱kóyi ti̱koa̱ ti̱nókjoa̱yi. 3 Tsà tjín xi̱ta̱ xi kj’ei̱í tsò ‘én xi okóya nga mì tíjngoò ikon koni tsò ‘én ndaàâla̱ Na̱’ènâná Jesucristo ti̱koa̱ mìkiì tíjngoò ikon i̱t’aà ts’e̱ kjo̱tíxoma koni s’ín yaxkoán Nainá. 4 Xi̱ta̱ koi, xi̱ta̱ ’nga takònâné, ni̱mé machi̱yaâla̱. ‘Ãó tsjakeè nga ótiyaâne ‘én xi nìmé chjíâla̱. Ya̱á nchrobát’aàâne nga maxìtakònâchaá xinguia̱á, nga bixkánâkjoaá, nga nokjoàjnoâlá xinguia̱á ‘én xi ch’o tsò, ti̱koa̱ ch’o nìkítsjeèn i̱t’aà ts’e̱ xi̱ta̱ xi kj’ei̱í. 5 Ti̱koa̱á ya̱á nchrobát’aàâne nga kjit’aà na̱chrjein nchikjaánâkjoò jñà xi̱ta̱ xi mì kixi̱ síkjeén kjo̱hítsjeènâla̱ ko̱ mì kjoa̱kixi̱ fìt’aàâla̱. K’oa̱á s’ín síkítsjeèn, tsòâné: tsà ndaà jcha̱xkoán Nainá, ya̱á sakóâná to̱n. Ngaji̱, kì k’oa̱á tjín kjoa̱ xi nìkítsjiìn. 6 Kixi̱í kjoa̱, tseé kjo̱ndaà sakóâla̱ xi̱ta̱ k’e̱ nga beèxkón Nainá tsà ti̱koa̱ tsja tjínâla̱ ini̱ma̱âla̱ mé xi tjínâla̱. 7 Nga ni̱mé xi kich’á k’e̱ nga kits’iaán i̱ i̱sò’nde. Ti̱koa̱á ni̱mé xi kjikoa̱á k’e̱ nga ki̱yá. 8 Tsà tjínâná tsojmì xi chineé koa̱ tjínâná nikje xi chíkjá, mochjeénâné nga tsjaá kíjngoòâlá takoán. 9 Ta̱nga jñà xi̱ta̱ xi mejènâla̱ kjoa̱nchi̱ná, nga mìkiì chíkjoa̱ko̱âla̱ kjo̱hítsjeèn xi ch’o tjín nga kjìn tsojmì mejènâla̱, ya̱á ki̱xo̱ngui ch’a̱n koa̱ ya̱á si̱ngui’ñó. ‘Ãó mejènâla̱ kjoa̱ xi ni̱mé chjíâla̱ koa̱ xi ch’o síko̱âná, kjoa̱ xi síkits’ón xi̱ta̱ koa̱ ya̱á chi̱jajiìn. 10 K’e̱ nga to̱n matsjachaá, ya̱á mats’ia̱âne kjoa̱ ts’e̱ jé ko̱ ngats’iì kjoa̱ xi ch’o tjín. Tjín i’nga xi̱ta̱ xi jye chinchat’aàxìnâla̱ kjoa̱ xi mokjeiínâná i̱t’aà ts’e̱ Cristo jè nga̱tjìâla̱ nga tse to̱n mejènâla̱. K’oa̱á s’ín maâne nga ti̱jñàâne tse kjo̱’in tsjáâla̱ yijoâla̱. 11 Ta̱nga ngaji̱ xi xi̱ta̱âla̱ Nainá ‘mìâlè, ti̱si̱t’aàxìnâla̱ ngats’iì kjoa̱ koi. Jè t’in tji̱nguiâla̱ xi kjoa̱kixi̱. Jcha̱xkoín Nainá. Ndaà kàtakjeiínâlè i̱t’aà ts’e̱ Cristo. Kàtas’eâlè kjoa̱tjòcha. Kàtas’eâlè kjoa̱tsetakòn. Indaà kjoa̱ ti̱kíjni ini̱ma̱âlè. 12 Ndaà ti̱xkàtjì kjoa̱ xi mokjeiínâná i̱t’aà ts’e̱ Cristo. Kì nìkíjnaâjèn ndi̱yá kixi̱ ts’e̱ kjoa̱binachon xi mìkiì fehet’aà ni̱ta̱ kjéâne. Nga koií xá kiìchja̱âlè Nainá. Ngaji̱ jyeé k’oa̱s’ín ndaà kits’iì ndso̱boi nga kinìkixi̱yi ‘én xi mokjeiínâlè i̱t’aà ts’e̱ Cristo nga nguixko̱n xi̱ta̱ xi kjìn maâne nga kiì’nchré. 13 I̱’ndei̱ jngoò xá tìbìnèâlè nga nguixko̱n Nainá xi síkítsa̱jnakon yije ni̱ta̱ mé xi tjín, ti̱koa̱ nguixko̱n Jesucristo xi ndaà kitsjaà tso’ba nga kisìkixi̱ya ‘én ndaàâla̱ k’e̱ nga kiìchja̱ nga nguixko̱n Poncio Pilato. 14 K’oa̱á s’ín tìhotiìxomaâlè, ndaà ti̱kitasoìn kjo̱tíxoma koi; kì nìkjatjìyaâla̱ méâne nga mì yá xi ko̱chrjenguiâlè skanda k’e̱ nga kjoi̱í ìjngoò k’a Na̱’ènâná Jesucristo. 15 K’e̱ nga ki̱jchòya na̱chrjein, Nainá, k’oa̱á s’ín si̱ìkitasòn yije kjoa̱ koi. Mé tà ndaàâla Nainá nga jè ta̱jngoò tíhotíxoma. Jè tíjna ítjònâla̱ jñà xi xi̱ta̱xá ítjòn títsa̱jna ti̱koa̱ tíjna ítjònâla̱ jñà xi xi̱ta̱ sko̱âla̱ títsa̱jna. 16 Ta̱jngoò Nainá xi xó k’oa̱s’ín tíjnaâne nga mìkiì biyaà. Ya̱á tíjnajiìn kjoa̱hiseèn ñánda mì yá xi ko̱ma ki̱jchò kinchat’aàâla̱. Ni̱ sa̱á jngoò xi̱ta̱ beèxkon ni̱ mìkiì tjí’ndeâla̱ nga skoe̱xkon. Nainá, kjit’aà na̱chrjein jeya kàtìjna. Kàtayaxkón kjo̱tíxomaâla̱ ni̱ta̱ kjéâne. K’oa̱s’ín kàtama. 17 Jñà xi̱ta̱ nchi̱ná xi tjín i̱ i̱sò’nde, k’oa̱á s’ín tìnèâla̱: “Kì bí’ngaâla̱ ikon.” Kì koií ma’ñót’aà ikon kjoa̱nchi̱ná xi tjínâla̱ nga tà ni̱to̱n fehet’aà. Jè kàtama’ñót’aà ikon Nainá xi tíjnakon nga jè tsjá yijeâná xi mochjeénâná skanda síkatonèâla̱ méâne nga ko̱ kjo̱tsja si̱kjeén tsojmì xi tsjáâná. 18 Koa̱tìnâla̱, kjo̱ndaà kàtas’ín. Kàtas’eâla̱ kjoa̱nchi̱ná nguixko̱n Nainá i̱t’aà ts’e̱ kjo̱ndaà xi s’ín. Kì kjoa̱xkon fìkjaá, ko̱ ini̱ma̱âla̱ kàtatsjá i̱tséâla̱ xíkjín mé xi tjínâla̱. 19 Tsà k’oa̱s’ín si̱ìkitasòn na̱chrjein i̱’ndei̱, s’e̱éâla̱ kjoa̱nchi̱ná xi mìkiì kjoe̱het’aà k’e̱ nga jye títsa̱jna nguixko̱n Nainá. Ti̱koa̱á tjoéâla̱ kjo̱ndaà xi nguì ts’e̱ kjoa̱binachon. 20 Ngaji̱ Timoteo, ndaà ti̱kitasoìn ‘én ndaàâla̱ Nainá xi ji̱ kjònga̱tsjei. Kì kiì na’yàâla̱ ‘én ndiso xi ni̱mé chjíâla̱. Kì kiì nìs’inâla̱ kjoa̱ xi chitiyaâná ts’e̱ kjoa̱chji̱ne̱ ndiso. 21 Tjín i’nga xi̱ta̱ xi k’oa̱ tjín kjo̱hítsjeèn fìtji̱nguiâla̱. K’oa̱á maâne nga chinchat’aàxìnâla̱ kjoa̱ xi mokjeiínâná i̱t’aà ts’e̱ Cristo. Jè kàtìjnako̱âlè kjo̱ndaàâla̱ Nainá.