2 Corintios 5

1 Yijoâná k’oa̱á s’ín ngayaâla̱ koni ni’ya xi tjín i̱ i̱t’aà nangui xi chiba na̱chrjein maâla̱ nga bixòña. Tsà ki̱xo̱ña ni’ya jè, Nainá tjíndaà jngoòâla̱ ni’ya ján ngajmiì, xi tíjna ni̱ta̱ kjéâne, nga mìtsà tsja xi̱ta̱ kisindaàâne. 2 K’oa̱á maâne nga i̱ma̱á fahatseâla̱ ini̱ma̱âná i̱ i̱sò’nde nga jè xi mejènâná nga ni̱to̱n ki̱tsa̱jnayaá ni’yaâná ján ngajmiì. 3 Na̱s’ín si̱jna yijoâná xi tsjach’á i̱’ndei̱, Nainá tsjá ìjngoòâná xi yijo xi̱tse̱. Jè ini̱ma̱âná mìtsà chi̱ja, yijo xi̱tse̱é ko̱ma. 4 K’e̱ nga tákó tíjnakon yijoâná koni jngoò ni’ya xi ma bixòña, i̱ma̱á fahatseâná, mabaâná, mìkiì tsò takoán nga nìkíjna ni’yaâná. Majìnâná nga tjáxìnâná ni’ya jè, jè xi mejènâná nga kàtaxi̱tse̱ya yijoâná méâne nga yijoâná xi ma biyaà jngoò k’aá jchi̱ja nga jè kjoa̱binachon si̱ìkijneâla̱. 5 Jè Nainá xi xó k’oa̱s’ín tsibíndaàâná ko̱ kitsjaàâná Ini̱ma̱ Tsjeèâla̱ méâne tjíkixi̱âne kjoa̱ nga i̱skan tsjá yijeâná koni s’ín kitsjaà tso’ba. 6 Kjit’aá na̱chrjein k’oa̱s’ín tíjngoò takoán i̱t’aà ts’e̱ Nainá ko̱ k’oa̱á s’ín tíjiìnâná, k’e̱ nga tákó tíjnakon yijoâná i̱ i̱t’aà nangui koni jngoò ni’ya ñánda titsa̱jnaá, kjiìn titsa̱jnaâlá ni’yaâla̱ Na̱’ènâná ján ngajmiì. 7 K’oa̱á s’ín titsa̱nìjchá yijoâná koni s’ín mokjeiínâná i̱t’aà ts’e̱ Nainá, mì k’oa̱á s’ín mochjeén nga ko̱s’ín si̱jchá yijoâná koni s’ín beè xkoaán. 8 Tíjngoò takoán i̱t’aà ts’e̱ Nainá, ìsa̱áâla ndaà tjín tsà si̱kíjnaá yijoâná, méâne nga ján ki̱tsa̱jnakoa̱á Na̱’ènâná ngajmiì. 9 Koií kjoa̱âla̱ nga ndaà si̱kitasoán koni s’ín sasénâla̱ Na̱’ènâná, a i̱ titsa̱jnaá i̱t’aà nangui a xi ján titsa̱jnaá ján ngajmiì. 10 Mochjeénâné nga ngats’iaá kìjchoaá nguixko̱n ñánda tíhotíxoma Cristo nga k’oi̱âlá kinda̱ nga jngoò jngoaá; tjoéâná chjíâná mé kjoa̱ xi ki’né nga titsa̱jnaá i̱sò’nde, a ndaà ki’né, o xi ch’o ki’né. 11 Nga yaxkónâje̱n Nainá koni s’ín ok’ìnâla̱, k’oa̱á maâne bèno̱jmíâla̱je̱n xi̱ta̱ xi kj’ei̱í, méâne ko̱kjeiínâla̱ i̱t’aà ts’e̱ Cristo. Nga nguixko̱n Nainá ndaà beèxkonâna̱je̱n nga ndaà ’nèâje̱n, ‘a̱n k’oa̱á ti̱s’ín mejènâna̱ nga ti̱koa̱ jñò jyeé ndaà yaxkonânáje̱n. 12 Mìtsà ‘mìânòje̱n nga ti̱ji̱n ndaà nìkítsa̱jnaânáje̱n yijoânaje̱n ta̱nga jè xi mejènânaje̱n nga tsja kàtamaânò i̱t’aà tsa̱je̱n, méâne ko̱ma ki̱nókjoa̱âlà jñà xi̱ta̱ xi ti̱jñà ndaà síkítsa̱jnaâne yijoâla̱ koni s’ín tsejènâla̱, ta̱nga jè ini̱ma̱âla̱ mìkiì ndaà síkinda̱. 13 Tsà skáânaje̱n, koiâné nga Nainá nìxáâla̱je̱n, tsà ndaà tjín kjo̱hítsjeènânaje̱n, kjo̱ndaà tsa̱jònânò nga jñò nìxáânòje̱n. 14 Jè kjoa̱tjòchaâla̱ Cristo jè kitsobà’ñóânaje̱n nga ma fìko̱âna̱je̱n koni s’ín mejènâla̱, k’oa̱á tjín kjo̱hítsjeèn xi kjòchi̱yaâna̱je̱n nga jngoò xi̱ta̱ k’en ngajoâla̱ ngats’iì xi̱ta̱ xi tjín i̱sò’nde, k’oa̱á komàâne nga ngats’iì xi̱ta̱ k’en. 15 Jè Cristo k’en ngajoâla̱ ngats’iì xi̱ta̱ xi tjín i̱sò’nde, méâne jñà xi̱ta̱ xi títsa̱jnakon mì ti̱ k’oa̱á s’ín si̱ìjcháâne yijoâla̱ koni s’ín mejènâla̱ yijoâla̱. K’oa̱á s’ín si̱ìjchá yijoâla̱ koni s’ín mejènâla̱ Cristo nga jè k’en ngajoâla̱ koa̱ jaáyaâla̱ i̱t’aà ts’e̱ kjoa̱biyaà. 16 I̱’ndei̱ mì ti̱ kiì k’oa̱s’ín nìkítsjeènânaje̱n i̱t’aà ts’e̱ xi̱ta̱ xi kj’ei̱í kós’ín tsejèn, kó kjoàn, koni s’ín s’ín jñà xi̱ta̱ i̱sò’nde. K’e̱ nga sa̱ ítjòn k’oa̱á s’ín kinìkítsjeènâje̱n, jè Cristo, tsà ta̱xki̱ xi̱ta̱ i̱sò’ndeânè. Ta̱nga i̱’ndei̱ mì ti̱ k’oa̱á s’ín nìkítsjeènânaje̱n. 17 Jngoò xi̱ta̱, k’e̱ nga Cristo tíjnako̱, xi̱ta̱ xi̱tse̱âné i̱t’aà ts’e̱ Nainá. Jè kjoa̱ jchínga jyeé tsato, jyeé kjòxi̱tse̱ya yije. 18 Ngats’iì kjoa̱ koi i̱t’aà ts’e̱ Nainá nchrobáâne, nga i̱t’aà ts’e̱ Cristo kichibàndaàâná ko̱ Nainá. Ko̱ jè Nainá kitsjaàâna̱je̱n xá nga ko̱ma kéno̱jmíâje̱n kós’ín kjoóndaàâne xi̱ta̱ ko̱ Nainá. 19 I̱t’aà ts’e̱ Cristo kisìxá Nainá nga kisìkjoóndaàâne xi̱ta̱ i̱sò’nde. Mì ti̱ kiì kinda̱ kis’iìnâne jéâla̱ jñà xi̱ta̱. Ko̱ kitsjaàânaje̱n xá nga bèno̱jmíâje̱n kós’ín ma nga chibàndaàâná ko̱ Nainá. 20 K’oa̱á maâne ngaje̱n síkasénânaje̱n Cristo nga nokjoà ngajoâla̱je̱n. K’oa̱á ngayaâla̱ koni tsà jè Nainá tíbítsi’baânò. I̱t’aà ts’e̱ Cristo bìtsi’bàânòje̱n: jchi̱bàndaàko̱ânò Nainá. 21 Cristo, mìtsà jé tsohótsji; ta̱nga xi kjo̱ndaà tsa̱ján, Nainá, jé tsohónè yijeâla̱ ngats’iì jé xi tjín i̱sò’nde, méâne i̱t’aà ts’e̱ Cristo, xi̱ta̱ kixi̱ ko̱maá nga jè Nainá si̱ìkixi̱yaâná.