2 Juan 1

1 Ji̱ ndí chjo̱ón xi xó jaàjiìnâlè Nainá, ko̱ jñà i̱xtiâlè, tìkjiìânò Xo̱jo̱n jè ‘a̱n xi xi̱ta̱ jchínga ‘mìâna ya̱ i̱ngo̱. Nguì o̱kixi̱âné nga matsjake̱ânò; mìtsà ta ‘a̱n xi matsjake̱ânò, ti̱koa̱á matsjakeèânò ngats’iì jñà xi̱ta̱ xi jye beè kós’ín tjín xi kjoa̱kixi̱. 2 Koií k’oa̱s’ín matsjake̱ânò, nga̱ jyeé ndaà tíjiìn ya̱ ini̱ma̱âná jè xi nguì kjoa̱ kixi̱, ko̱ ya̱á kíjnajiìn kjit’aà skanda ni̱ta̱ mé na̱chrjeinâne. 3 Nainá xi Na̱’èn ‘mìâlaà ko̱ Na̱’ènâná Jesucristo xi Ki’ndíâla̱ Nainá ma, kàtatsjáânò kjo̱ndaà, kàtahi̱ma̱keèânò, ’nchán kàtasíkíjna i̱jiìn ini̱ma̱ânò, xi nguì ko̱ kjoa̱kixi̱ ko̱ kjo̱tsjachaâla̱. 4 ‘Ãó kjòtsjaâna k’e̱ nga kijtseè xkoaàn i’nga i̱xtiâlè, nga̱ k’oa̱á s’ín nchisíjchá yijoâla̱ koni s’ín tjín kjoa̱ kixi̱ ts’e̱ Nainá, koni s’ín jye tsatíxomaâná jè Nainá xi Na̱’èn ‘mìâlaà. 5 K’oa̱á s’ín tìbitsi’bàânò i̱’ndei̱ jñò ndí ’ndsè xi ‘ñó matsjake̱ânò, nga mochjeénâné nga ‘ñó ko̱tsjachaá xinguia̱á nga jngó íjngoá. Ko̱ mìtsà kjo̱tíxoma xi̱tse̱ xi tìkjiìânò, ti̱jéâne jè kjo̱tíxoma xi kitjoéâná skanda ti̱sa̱ tàts’enâla̱ kjoa̱. 6 K’oa̱á s’ín tjín xi i̱t’aà ts’e̱ kjo̱tsjacha, jéâné nga k’oa̱s’ín si̱kitasoán koni s’ín tjín kjo̱tíxomaâla̱ Nainá; jyeé kina’yà nga ti̱sa̱ ‘ñó kjòtseé kós’ín tíchja̱ kjo̱tíxoma nga ‘ñó mochjeén nga ko̱tsjachaá xinguia̱á nga jngó íjngoá. 7 Nga̱ kjín maâne xi̱ta̱ xi tjímasòn nga tíjngoò i̱sò’nde xi nchikona̱cha̱nâla̱ xi̱ta̱, nga tsò: “Mìtsà ‘én kixi̱ nga k’oa̱s’ín kits’iìn Jesucristo nga xi̱ta̱ komà koni jñá.” Jè xi̱ta̱ xi ko̱tsò, ta tíkona̱cha̱nâné ko̱ jèâné xi tíjna ítjòn nga kondra̱ fìâla̱ Cristo. 8 Ndaà t’e̱en kinda̱ yijoânò, méâne nga mìkiì si̱chjaàânò jè kjo̱tjò xi tjoéânò i̱t’aà ts’e̱ xá xi titsa̱’nè. Nga̱ mochjeénâné nga kàtatjoé yijeânò jè chjíâla̱ xá xi titsa̱’nè. 9 Ngats’iì xi̱ta̱ xi otonèâla̱ koni s’ín tjín ‘én xi tsakóya jè Cristo nga xìn ndi̱yá kjoé, mìtsà Nainá tíjnako̱; ta̱nga jè xi kixi̱ tíjna nga̱ k’oa̱s’ín tís’ín koni s’ín tsakóya Cristo, ya̱á tíjnako̱ Nainá xi Na̱’èn ‘mìâlaà ko̱ jè xi Ki’ndíâla̱ ma. 10 Tsà k’e̱ jngoò xi̱ta̱ ki̱jchòkonânò xi mejènâla̱ nga ‘énâla̱ Nainá ke̱èno̱jmíânò ta̱nga tsà mì k’oa̱s’ín okóya koni tsò ‘énâla̱ Cristo, kì kiì biì’ndeâlaà nga ni’yaânò fahas’en ko̱ kì ‘mìâlaà: “Ti̱kjáyi." 11 Nga̱ jè xi tsjá’ndeâla̱ nga si̱ìkas’en ni’yaâla̱, ti̱koa̱á ya̱á tísíngásònâko̱ kjo̱hítsjeènâla̱ jñà xi̱ta̱ xi ta kjoa̱ ndiso nchihokóya. 12 Tjín jchánâìsa mé ‘én xi mejènâna nga ko̱xánânò, ta̱nga majìnâna nga tà Xo̱jo̱n kit’aàânò. Jè xi mejènâna nga kjíkon xátíânò. K’e̱é ìsa̱ ndaà jchi̱bá méâne nga ngats’iaá ngásòn ngáya kàtas’eâla̱ kjo̱tsja ini̱ma̱âná. 13 Jñà i̱xtiâla̱ chjo̱ón tichji xi ti̱koa̱ xó jaàjiìnâne Nainá nchisíkasénâlè ‘én nga síhixat’aàâlè. K’oa̱s’ín kàtama.