3 Juan 1

1 Ji̱ ndí ’ndsè xi ‘mìâlè Gayo xi ‘ñó ndaà chibá ko̱ xi nguì ko̱ ini̱ma̱âna̱ nga matsjake̱âlè, tìkjiìâlè Xo̱jo̱n jè ‘a̱n xi xi̱ta̱ jchínga ‘mìâna ya̱ i̱ngo̱. 2 Ji̱ ndí ’ndsè, ‘a̱n, k’oa̱á s’ín tísíjéâla̱ Nainá, nga ndaà kàtitjo yije ni̱ta̱ mé kjoa̱ xi s’i̱in ji̱, koni s’ín ndaà tímachikonât’in ini̱ma̱âlè xi i̱t’aà ts’e̱ Nainá, k’oa̱á ti̱s’ín ndaà kàtìjna jè yijoâlè nga ni̱mé ch’in kàtas’eâla̱. 3 Ta̱xki̱ ‘ñó kjòtsjaâna k’e̱ nga j’iì i’nga jñà ’ndsé xi tsibéno̱jmíâna nga k’oa̱á s’ín tìnìjchí yijoâlè koni s’ín tjín kjoa̱ kixi̱ i̱t’aà ts’e̱ Cristo. 4 Nì ti̱ mé kjoa̱ tjínâne xi k’oa̱s’ín ‘ñó matsjaâla̱ ini̱ma̱âna̱, ta jèâne k’e̱ nga ’nchrè nga jñà xi ndí i̱xtiâna̱ xanâla̱ nga k’oa̱á s’ín nchisíjchá yijoâla̱ koni s’ín tjín xi kjoa̱kixi̱. 5 Ngaji̱ ndí ’ndsè xi ‘ñó matsjake̱âlè, ‘ñó kixi̱ tìnìjchí yijoâlè, k’e̱ nga k’oa̱s’ín ndaà nìs’inâla̱ ya̱ ni’yaâlè jñà xi̱ta̱ xinguia̱á xi bijchókonâlè xi ti̱koa̱ ‘énâla̱ Nainá mokjeiínâla̱; ko̱ ìsa̱á ta ndaà tjínâìsa k’e̱ nga ti̱koa̱ ndaà nìs’inâla̱ jñà xi̱ta̱ xinguia̱á xi xìn i̱’nde f’iìâne. 6 Jñà xi̱ta̱ xinguia̱á k’oa̱á s’ín tsibéno̱jmí kixi̱ ya̱ nguixko̱n xi̱ta̱ na̱xa̱ndáâla̱ Cristo, nga ngaji̱ ‘ñó matsjachi ngats’iì xi̱ta̱ xinguia̱á koi. K’oa̱s’ín ndaà ti̱si̱ko̱âìsi k’e̱ nga ki̱jchòkonâlè; tjiìâla̱ mé xi mochjeénâla̱ k’e̱ nga tjímaya ya̱ i̱ya ndi̱yá. K’oa̱á s’ín tikoi̱i koni s’ín sasénâla̱ Nainá. 7 Nga̱ i̱t’aà ts’e̱ Cristoâné nga k’oa̱s’ín jye tsibínèâla̱ yijoâla̱ jñà xi̱ta̱ xinguia̱á koi, nga k’oa̱á s’ín nchisíxáâla̱ Jesucristo, ko̱ majìnâla̱ nga jñà kiskoé tsojmì xi tsjáâla̱ xi̱ta̱ xi mìtsà i̱t’aà ts’e̱ Cristo mokjeiínâla̱. 8 Koií mochjeénâne nga jñá oko̱âná nga ki̱si̱koa̱á jñà xi̱ta̱ xinguia̱á koi. Tsà k’oa̱s’ín ki̱si̱koa̱á, tsòâne kjoa̱ nga ngásòn titsa̱nìka’bísoán jè ‘én kixi̱ xi ndaà tsò. 9 ‘A̱n jyeé kiskiaà jngoò Xo̱jo̱n nga kisìkasénâla̱ jñà xi̱ta̱ na̱xa̱ndáâla̱ Cristo, ta̱nga jè Diótrefes mìkiì sasénâla̱ koni s’ín ki’mìâla̱je̱n, nga̱ jè, koií xi mejènâla̱ nga ta jè ko̱tìxoma. 10 K’e̱ nga kìjchoa, k’e̱é ko̱xán kixi̱âla̱ i̱t’aà ts’e̱ ngats’iì kjoa̱ ch’o xi tís’ín, nga ‘ñó ch’o tsò ‘én ndiso xi tíbínèânaje̱n. Ko̱ mìtsà ta ya̱ majngoò ikon, ti̱koa̱á mìkiì maâla̱ nga sís’inâla̱ jñà xi̱ta̱ xinguia̱á xi bijchókon ya̱ ni’yaâla̱. Ko̱ jñà ’ndseé xi mejènâla̱ nga si̱ìs’inâla̱ xi̱ta̱ xinguia̱á, jé bíchjoà ikonâla̱, ko̱ ti̱koa̱á ochrjekàjiìnâné ya̱ na̱xa̱ndáâla̱ Cristo jñà ’ndsé xi k’oa̱s’ín síkitasòn kjo̱ndaà koi. 11 Ji̱ ndí ’ndsè xi ‘ñó matsjake̱âlè, kì jñà chjínguìâla̱ jñà kjoa̱ xi ch’o tjín; ji̱, jñà chjínguìâla̱ jñà kjoa̱ xi ndaà tjín. Nga̱ jè xi̱ta̱ xi ndaà s’ín, xi̱ta̱ ts’e̱ Naináâné; ta̱nga jè xi̱ta̱ xi ch’o s’ín, kj’eè kì beè yáâne xi Nainá. 12 I̱t’aà ts’e̱ Demetrio, ngats’iì xi̱ta̱ k’oa̱á tsò nga ‘ñó ndaà tjín koni s’ín tís’ín, skanda jè xi kjoa̱ kixi̱, k’oa̱á s’ín okó nga jè Demetrio, ndaá tjín koni s’ín tís’ín; k’oa̱á ti̱s’ín bixónâje̱n nga ndaá tjín koni s’ín tís’ín, ko̱ ndaá ‘yi nga ‘én kixi̱âné koni s’ín bixónâje̱n. 13 Tjínâìsaâna mé ‘én xi mejènâna nga ko̱xánâlè, ta̱nga majìnâna nga tà Xo̱jo̱n siìkasénâlè; 14 jè xi mejènâna nga kjíkon xátíâlè; k’e̱é ìsa̱ ndaà jchi̱ba̱no̱jmiá k’e̱ nga kìjchokonâlè. 15 K’oa̱s’ín ’nchán kàtìjna kjit’aà ini̱ma̱âlè. Jñà xi̱ta̱ xi ndaà óko̱âná xi i̱ i̱’ndeâla̱ tísíhixat’aàâlè. Ko̱t’ìnâla̱ jñà xi̱ta̱ xi ndaà óko̱âná xi ya̱ títsa̱jnako̱âlè, Nainá kàtasíchikonât’in nga jngoò ìjngoò.