Efesios 5

1 K’oa̱á maâne nga k’oa̱s’ín ti̱jchá yijoânò koni s’ín Nainá nga koi kjoa̱âla̱ nga i̱xtiâla̱ Nainá ‘mìâná nga ‘ñó matsjakeèâná. 2 K’oa̱á ti̱s’ín tjòcha chaà xinguio̱o koni Cristo tjòkeè kijtseèâná nga jè kitsjaà ngajoâná yijoâla̱ nga k’en, jngoò kjo̱tjò xi ndaà kjòtsjakeè Nainá. 3 Jè xi kjoa̱ chijngui, ngats’iì kjoa̱ ch’o xi ‘ñó tjé tjín ko̱ kjoa̱ nga maxìtakònâchaà xinguio̱o mì ti̱ k’oa̱á tjín kjoa̱ xi ko̱xki̱âne i̱t’aà tsa̱jòn. Nga̱ jñò, xi̱ta̱ tsjeèâla̱ Nainá ‘mìânò. 4 Kì ‘én tsa’a nokjoà, ko̱ ‘én nchi̱kón, ko̱ ‘én xi ch’o tsò nga bijnòkeè xi̱ta̱. Jñà kjoa̱ koi, ti̱koa̱á mìkiì ok’ìnâla̱ nga ko̱s’ín ki̱nókjoa̱a. Tà saà kjo̱ndaà tjiìâlà Nainá. 5 Jye tíjiìnânò nga mìkiì ko̱ma kjoa̱has’en ñánda tíhotíxoma Cristo ko̱ Nainá, ngats’iì xi̱ta̱ xi kjoa̱ chijngui s’ín, xi kjoa̱ xi ‘ñó tjé s’ín ko̱ nga maxìtakònâkeè xíkjín. Jñà xi̱ta̱ xi k’oa̱s’ín s’ín, ta jñà kjoa̱ koi beèxkón nga neiâla̱ ma. 6 Kì yá xi̱ta̱ xi kona̱cha̱nânò xi ta̱xki̱ ‘én béno̱jmíânò xi ni̱mé chjíâla̱ i̱t’aà ts’e̱ jé koi. Ta jè nga̱tjìâla̱ nga kjo̱’in tsjáâla̱ Nainá jñà xi̱ta̱ xi mìkiì ’nchréñijonâla̱. 7 Kì ya̱ tsjahijtako̱o xi̱ta̱ koi. 8 Jñò, nga sa̱ kjòtseé, jè kjo̱hítsjeènânò tjíjñòâla̱, ta̱nga i̱’ndei̱, jyeé iseèn titsa̱jnaà nga Na̱’ènâná Jesucristo titsa̱jnako̱o. K’oa̱á s’ín ti̱jchá yijoânò koni s’ín ok’ìnâla̱ jñà xi̱ta̱ xi ya̱ títsa̱jna ñánda iseèn choòn. 9 K’e̱ nga kjoa̱ iseèn tíjiìn ini̱ma̱âná ndaà s’e̱én, ya̱ ki̱tjáyaá ndi̱yá kixi̱, koa̱ nguì ‘én kixi̱ ki̱nókjoa̱á. 10 Ti̱nchátsjioò mé kjo̱ndaà xi sasénâla̱ Na̱’ènâná. 11 Kì ya̱ chingàjñoò kjoa̱ xi ni̱mé chjíâla̱ koni s’ín xi̱ta̱ xi tjíjñò kjo̱hítsjeènâla̱. Jñò, ta̱ saà ta̱kó nga kàta’yaâla̱ nga mìkiì ndaà tjín kjoa̱ xi s’ín. 12 Skanda masobàâná nga nokjoá jñà kjoa̱’ma xi ch’o tjín xi s’ín jñà xi̱ta̱. 13 Ni̱ta̱ mé kjoa̱âne xi si̱jna ñánda iseèn choòn, ni̱to̱ón beè xi̱ta̱ mé kjoa̱âne, a ndaà tjín, a xi mìkiì ndaà tjín. Nga jè kjoa̱ iseèn okó yije xi ndaà tjín ko̱ xi mìkiì ndaà tjín. 14 Koií ko̱tsòâne ‘én xi tsò: Ngaji̱ xi titsa̱jnafì, ti̱kjaáâla yijoâlè. Ti̱sítje̱nâjiìnâla̱ mik’en; jè Cristo si̱ìhiseènâlè. 15 Ndaà ti̱kinda̱a koni s’ín titsa̱nìjchá yijoânò; k’oa̱á s’ín ti̱tsa̱jna koni xi̱ta̱ xi tjínâla̱ kjoa̱chji̱ne̱; kì k’oa̱á ’nè koni s’ín xi tsjìnâla̱ kjo̱hítsjeèn. 16 Ndaà ti̱kjeén na̱chrjein mé xi s’e̱en; nga na̱chrjein i̱’ndei̱, ‘ñó tjín kjoa̱ ch’o. 17 Kì ch’o onguíko̱o kjo̱hítsjeènânò; ndaà kàtachi̱yaânò mé xi mejènâla̱ Nainá. 18 Kì xán ‘yò, jè xán síkits’ónâná, tà sa̱á jè Ini̱ma̱ Tsjeèâla̱ Nainá ndaà kàtas’enâjiìn ini̱ma̱ânò nga kàtakóânò ndi̱yá kixi̱. 19 Chi̱ko̱o xinguio̱o ‘énâla̱ Nainá. Ti̱jndáâlà sò xi ‘mì salmo, himno koa̱ ti̱jndá i̱jiìn ini̱ma̱ânò jè xi okóyaânò Ini̱ma̱ Tsjeèâla̱ Nainá. Jeya ti̱kíjna Nainá nga ko̱ ini̱ma̱ânò. 20 I̱t’aà ts’e̱ ‘ínâla̱ Na̱’ènâná Jesucristo, na̱chrjein nchijòn tjiìâlà kjo̱ndaà Nainá xi Na̱’ènâná ngats’iì xi tsjáânò. 21 Nangui titsa̱jnaâlà xinguio̱o koni s’ín yaxkón Cristo. 22 Jñò, íchjín xi x’i̱n tjínânò, nangui titsa̱jnaâlà x’i̱nânò koni s’ín nangui bìtsa̱jnaâlà Cristo. 23 Nga jè x’i̱n, jè xi sko̱ tíjnaâla̱ chjo̱ón, koni Cristo, jè xi sko̱âla̱ na̱xa̱ndáâla̱. Ko̱ jè Cristo xi ochrjekàjiìn kjo̱’in na̱xa̱ndáâla̱ nga ti̱jèâne yijoâla̱. 24 Koni jè na̱xa̱ndáâla̱ Cristo nangui tíjnaâla̱, k’oa̱á ti̱s’ín jñà íchjín, nangui kàtìjnaâla̱ x’i̱nâla̱ ni̱ta̱ mé kjoa̱âne. 25 Jñò xi x’i̱n mìânò, ti̱tsjacha íchjínânò, koni jè Cristo matsjakeè na̱xa̱ndáâla̱ nga jè kitsjaàtjì yijoâla̱ nga k’en. 26 Koií ko̱s’ín kis’iìnâne nga tsjeè si̱ìkíjna na̱xa̱ndáâla̱ nga nguixko̱n Nainá. Jè jaàxìn jéâla̱ nga ko̱ ‘én ndaàâla̱ koni s’ín xi̱ta̱ nga oníjno yijoâla̱, 27 méânè nga ti̱jè ko̱kòâne nga tsjeè kji ko̱ ti̱jè skoétjòâne nga ts’e̱ ko̱ma, jngoò na̱xa̱ndá xi jeya tíjna, xi mì ch’oó kji, mì tjíyó kji, mì tjé kji, jngoò k’a tsjeè kji, ko̱ ni̱mé jé tjínâla̱. 28 Ti̱koa̱á jè x’i̱n kàtamatsjakeè chjo̱ónâla̱ koni s’ín matsjakeè xi ti yijo ts’e̱âne; nga jè xi matsjakeè chjo̱ónâla̱, ti̱jèâne yijoâla̱ tímatsjakeè. 29 Ni̱jngoò xi̱ta̱ xi ti̱jè beètoònâne yijoâla̱; ta sa̱á tsjáâla̱ nga’ñó nga síkinda̱ yijoâla̱ koni s’ín jè Cristo nga síkinda̱ na̱xa̱ndáâla̱. 30 Nga jè na̱xa̱ndáâla̱ ti̱jèâne yijoâla̱; ko̱ jñá, ti̱koa̱á ya̱á nokjoàt’aàâná yijoâla̱. 31 Koií kjoa̱âla̱ nga k’oa̱s’ín tíchja̱ Xo̱jo̱nâla̱ Nainá nga tsò: “Jè x’i̱n xi bixan si̱ìkíjna na̱’ènâla̱ ko̱ nea̱âla̱ nga kíjnako̱ chjo̱ónâla̱. Ingajò, tà jngoò xi̱ta̱ ko̱ma." 32 Jñà ‘én koi, jngoò kjoa̱ xi ‘ñó ‘in tjín skanda mìkiì fìyaâná. Ta̱nga ‘a̱n, jè tìsìkaxkia̱ Cristo ko̱ na̱xa̱ndáâla̱. 33 K’oa̱á xanânò ngats’ioò nga jngoò ìjngoò, ti̱tsjacha íchjínânò koni s’ín matsjacha yijoânò; ko̱ jè chjo̱ón kàteèxkón x’i̱nâla̱.