Santiago 1

1 ‘A̱n, Santiago, xi chi̱’ndaâla̱ Nainá ma, ko̱ ts’e̱ Na̱’ènâná Jesucristo, tisìhixat’aàânò, jñò, xi ya̱ inchrobàt’aàânò xi tejò tje̱âla̱ na̱xa̱ndá Israel xi xki̱ xi ján nangui titsa̱jnaà nga tíjtsa i̱sò’nde. 2 Jñò, xi ’ndsè chibá i̱t’aà ts’e̱ Cristo, nguì tsja t’èâlà ini̱ma̱ânò k’e̱ nga ni̱ta̱ mé kjoa̱ xi ko̱mat’ioòn. 3 ‘Yaânò k’e̱ nga tsà mé kjoa̱ xi ko̱mat’ioòn nga chít’aàânò koni s’ín mokjeiínânò, jñà kjoa̱ xi ko̱tojñoò, ya̱á sa̱kòânò nga’ñó nga ki̱chìkjoa̱ko̱ânò ni̱ta̱ mé kjoa̱ xi ko̱tojñoò. 4 K’oa̱á maâne jè nga’ñó xi sa̱kòânò, ndaà kàtasíxájiìn ini̱ma̱ânò méâne nga ndaà ko̱jchíngaâne ko̱ tíjngoòâne kjo̱hítsjeènâla̱ ini̱ma̱ânò nga ni̱mé si̱chijat’aàâla̱. 5 Tsà tjín i’nga xi̱ta̱ xi chijat’aàâla̱ kjo̱hítsjeèn, ti̱jét’aàâlà Nainá; jè tsjáânò. Nga̱ jè Nainá nguì ko̱ó ini̱ma̱âla̱ nga tsjá ko̱ mìtsà ch’o tsòâla̱ xi̱ta̱ k’e̱ nga síjé. 6 Ta̱nga nguì ndaà kàtakjeiínânò k’e̱ nga si̱jé. Kì jò ‘beéâlà takòn. Jè xi̱ta̱ xi jò ‘beéâla̱ ikon, k’oa̱á s’ín ngayaâla̱ koni ndáchikon k’e̱ nga ‘ba tjo̱, fìjen fìkjáko̱. 7 Jè xi̱ta̱ xi jò ‘beéâla̱ ikon, kì k’oa̱á s’ín síkítsjeèn nga tjín xi tjoéâla̱ i̱t’aà ts’e̱ Na̱’ènâná, 8 nga mìkiì tíjngoò ikon. Na̱chrjein i̱’ndei̱ kj’ei̱í s’ín tísíkítsjeèn, nchijònâlè ti̱koa̱á kj’ei̱í kjo̱hítsjeèn tjínâla̱. Mìtsà nguì jngoò ndi̱yá kjoé. 9 Jñà xi̱ta̱ xi ’ndsè chibá i̱t’aà ts’e̱ Cristo xi i̱ma̱ títsa̱jna, tsja kàtas’eâla̱ nga ’nga títsa̱jna nga nguixko̱n Nainá. 10 Ta̱nga jñà xi̱ta̱ nchi̱ná, tsja kàtas’eâla̱ nga nangui kítsa̱jna ya̱ nguixko̱n Nainá, nga jè xi̱ta̱ nchi̱ná, k’oa̱á s’ín ko̱mat’in koni jngoò naxó xi mìkiì fìchrjeinâla̱. 11 K’e̱ nga ‘ñó matsjè ndobá, jñà ijñá, xìâné, i̱kjoàn bixòjen jè naxóâla̱; chi̱ja i̱sénâla̱ nga ndaà kjoàn. K’oa̱á ti̱s’ín ko̱mat’in jñà xi̱ta̱ nchi̱ná, k’e̱ nga ‘ñó nchisíxáko̱ xá xi tjínâla̱, ta ni̱to̱ón ki̱yá. 12 Mé ta ndaàâla̱ jè xi̱ta̱ xi chíkjoa̱ko̱âla̱ k’e̱ nga chìt’aà, méâne k’e̱ nga jye si̱ìkijne, tjoéâla̱ kjoa̱binachon koni s’ín kitsjaàâla̱ ‘én Nainá, ngats’iì xi̱ta̱ xi jè matsjakeè. Tjoéâla̱ kjoa̱binachon k’oa̱á ngayaâla̱ koni jngoò corona si’a sko̱ xi̱ta̱ xi síkijne k’e̱ nga síská. 13 Jñò, k’e̱ nga chìt’aàânò nga mejènânò nga ch’o s’e̱en, kì k’oa̱á s’ín nìkítsjeèn nga jè Nainá tíkot’aàânò. Nga jè Nainá mì yá xi ko̱maâla̱ skót’aà nga ch’o kàtas’ín Nainá. Ti̱koa̱á jè Nainá mì kì kot’aà xi̱ta̱ nga ch’o kàtas’ín. 14 Jngoò xi̱ta̱, k’e̱ nga chìt’aà, ti̱jñàâne kjoa̱ ch’oâla̱ xi matsjakeè bínga nga tsobà’ñó. 15 Ko̱ jè kjoa̱ ch’o xi matsjakeè, k’e̱ nga jye bitasòn, ya̱á sakó jé. K’e̱ nga jye bitasòn kjoa̱ ts’e̱ jé, i̱kjoàn f’iì kjoa̱ biyaà. 16 Jñò ndí ’ndsè xi matsjake̱ânò, kì yijoânò chona̱cha̱nâlà. 17 Ngats’iì kjo̱ndaà ko̱ kjo̱tjò xi tjoéâná, i̱t’aà ts’e̱ Nainá xi tíjna ngajmiì nchrobáâne, jè xi tsibíndaà ngats’iì tsojmì xi ‘yaâla̱ ngajmiì, jñà xi síhiseèn. Nainá, mì k’oa̱á s’ín fatjìyaâla̱ koni ma jñà tsojmì xi síhiseèn ngajmiì nga fatjìyaâla̱ koni ma ’nguién. 18 Nainá, k’oa̱á s’ín kjòmejènâla̱ nga kisìkítsa̱jnakon xi̱tse̱ ìjngoò k’aâná xi kjoa̱ ts’e̱ ‘én kixi̱âla̱, méâne nga jñá si̱nga̱tsjaá yijoâná Nainá koni tsojmì xi majchá ítjòn xi jè tsibíndaà. 19 Jñò, ndí ’ndsè xi matsjake̱ânò, ti̱kítsjeèn ngats’ioò, ìsa̱ ndaà titsa̱jnandaà nga ki̱ná’yaâlà xi̱ta̱ xinguia̱á xi kj’ei̱í, chiba chiba ti̱nókjoa̱a, ko̱ kì ta̱xki̱ majtiânò. 20 Jngoò xi̱ta̱ xi jti takòn, mìkiì kixi̱ síkitasòn koni s’ín mejènâla̱ Nainá. 21 Chja̱àxìnâlà yijoânò ngats’iì kjoa̱ tjé ko̱ kjoa̱ ch’o xi xki̱ xi ján tjín, méâne nga indaàjiìn chjoéânò jñà ‘én ndaàâla̱ Nainá xi jye kina’yà, jñà ‘én koi xi ko̱ma ko̱chrjekàjiìnânò kjo̱’in. 22 Ti̱kitasòn koni tsò ‘énâla̱ Nainá. Kì tà na’yàâjèn. Tsà mìkiì si̱kitasòn, ti̱ yijoânò titsa̱chona̱cha̱nâlà. 23 Ni̱ta̱ yá xi̱ta̱âne xi ’nchré ‘énâla̱ Nainá, tsà mìkiì si̱ìkitasòn, k’oa̱á ngayaâla̱ koni jngoò xi̱ta̱ xi chi̱tsín tíkotsejènâya. 24 K’e̱ nga jye beè i̱sénâla̱ kó kji, i̱kjoàn fì, ya̱á jchàajiìnâla̱ kó kji i̱sénâla̱. 25 Ta̱nga jè xi nguì ndaà kotsejènâla̱ kjo̱tíxoma kixi̱ xi síkíjnandei̱íâná, nga koií ‘én síkítsjeèn kjit’aà koni tsò kjo̱tíxoma, ko̱ mìkiì síjchàajiìn ‘én xi ’nchré nga ndaà síkitasòn, xi̱ta̱ jè, ya̱á sakóâla̱ kjoa̱ machikonât’in k’e̱ nga k’oa̱s’ín tís’ín. 26 Tsà jngoò xi̱ta̱ xi tsò: “Beèxkónâná Nainá”, koa̱ tsà mìkiì bíchjoàâla̱ ni̱je̱nâla̱ nga chja̱ ngats’iì ‘én xi ch’o tsò, yijoâla̱á tíkona̱cha̱nâla̱; ni̱mé chjíâla̱ nga tsò: “Beèxkónâná Nainá." 27 K’e̱ nga nguì kixi̱ kjoa̱ nga Nainá xi Na̱’ènâná yaxkoán, koni s’ín mejènâla̱, jéâné nga si̱chját’aàâlá xi i̱xti jcha̱n, ko̱ íchjín ka’àn xi jye k’en x’i̱nâla̱, jñà xi kjo̱’in tjínâla̱, ti̱koa̱ mì kì ki̱’ndeâlá yijoâná nga kjoa̱ ch’o jchi̱nìjñaá xi tjín i̱sò’nde.