Tito 2

1 Ngaji̱, Tito, k’oa̱á s’ín ti̱nókjoi̱i koni s’ín ok’ìnâla̱ ‘én ndaà xi jñá okoòyaá 2 nga jñà xi̱ta̱ jchínga ts’e̱ na̱xa̱ndáâla̱ Nainá, indaàkjoa̱ kàtas’ín; ndaà kàtayaxkón; ndaà kjo̱hítsjeèn kàtas’eâla̱; ndaà kàtìtsa̱jnako̱ kjoa̱ xi mokjeiínâla̱, ko̱ kjoa̱tjòchaâla̱ ko̱ kjoa̱tsejtaâla̱ méâne nga ki̱chìkjoa̱ko̱âla̱ kjo̱’in. 3 Jñà íchjín jchínga, k’oa̱s’ín kàtasíjchá yijoâla̱ koni xi̱ta̱âla̱ Nainá. Kì xi̱ta̱ chja̱jnoâla̱. Kì xán báhijtako̱. Koií kàtakóya kjoa̱ xi ndaà tjín. 4 K’oa̱á s’ín kàtakóyaâla̱ íchjín i̱xti nga tjòkeè kàtas’ín íchjáâla̱, ti̱koa̱ tjòkeè kàtas’ín i̱xtiâla̱. 5 K’oa̱á s’ín ndaà kàtakóya nga ndaà kàtasíjchá yijoâla̱; tsjeè kàtìtsa̱jnako̱ yijoâla̱; ndaà kàtasíkinda̱ ni’yaâla̱; ndaà xi̱ta̱ kàtama; kàta’nchréñijonâla̱ íchjáâla̱, méâne nga mì yá xi ki̱chja̱jnoâla̱ ‘énâla̱ Nainá. 6 K’oa̱ ti̱s’ín tìnèâla̱ jñà íchjá xi i̱xtiâìsa nga ndaà kàtasíjchá yijoâla̱. 7 Ni̱ta̱ mé kjoa̱ xi tjín, ji̱ ti̱jna ítjoìn nga ndaà t’i̱in. K’e̱ nga ko̱kóyaâla̱ xi̱ta̱, kixi̱ ti̱kíjni kjo̱hítsjeènâlè; ‘én kixi̱ ti̱nókjoi̱i; 8 ndaà tsò ‘én xi ti̱nókjoi̱i xi mì yá ko̱chrjekàngui méâne k’e̱ nga kji̱’nchréâla̱ jñà xi xi̱ta̱ kondra̱, ko̱sobàâla̱; ni̱mé sa̱kòt’aàâla̱ xi ch’o ki̱tso̱âná. 9 Koa̱tìnâla̱ jñà xi̱ta̱ xi chi̱’nda títsa̱jna’ñó, ndaà kàtasíkitasòn yijeâla̱ neiâla̱, ndaà kàtasís’inâla̱ méâne nga tsja s’e̱âla̱, kì kjinguì’aâjèn; 10 kì síchijét’aàâla̱ neiâla̱. Tà sa̱á ndaà kàtas’ín nga kàta’yaâla̱ nga xi̱ta̱ kixi̱. K’oa̱á s’ín skoe̱âne xi̱ta̱ xi kj’ei̱í nga ndaà tjín kjo̱tíxomaâla̱ Nainá xi ochrjekàjiìnâná kjo̱’in. 11 Nainá jyeé tsakó kjo̱ndaàâla̱ nga ngats’iì xi̱ta̱ xi tjín nga tíjtsa i̱sò’nde ko̱ma ki̱tjokàjiìn kjo̱’in. 12 Jè kjo̱ndaàâla̱ Nainá k’oa̱á s’ín okóyaâná nga mì ti̱ kiì k’oa̱ s’e̱nâná nga mì ndaà yaxkoán Nainá ti̱koa̱ mì ti̱ kiì k’oa̱ s’e̱nâná kjoa̱ch’o xi síjé yijoâná xi ts’e̱ i̱sò’nde. K’e̱ nga jye si̱kítsa̱jnaá kjoa̱ koi, indaàkjoa̱ si̱kíjnaá kjo̱hítsjeènâná, xi̱ta̱ kixi̱ ko̱maá, ti̱koa̱ ndaà jcha̱xkoán Nainá na̱chrjein xi titsa̱jnaá i̱’ndei̱. 13 K’oa̱á s’ín s’e̱én kjoa̱ koi nga titsa̱chiñáâlá kjo̱ndaà xi ‘ñó ndaà tjín nga jcha̱á kjoa̱jeyaâla̱ Jesucristo k’e̱ nga kjoi̱í ìjngoò k’a. Jesucristo xi Nainá nga ‘ñó ’nga tíjna nga jè xi ochrjekàjiìnâná kjo̱’in. 14 Jè Na̱’ènâná Jesucristo kitsjaà yijoâla̱ nga k’en ngajoâná. Jè tsibíchjítjìâná méâne ko̱ma ki̱tjokàjñaá ngats’iì kjoa̱ ts’e̱ jé ti̱koa̱ jngoò k’a si̱ìtsjeèâná nga nguì xi̱ta̱ na̱xa̱ndá ts’e̱ ko̱maá. Ko̱ nguì tíjngoò takoán nga si̱kitasoán ni̱ta̱ mé kjoa̱ xi ndaà tjín. 15 K’oa̱á s’ín ta̱kóyi ti̱koa̱ tìt’inâla̱ xi̱ta̱. ‘Ãó ti̱nókjoa̱koi̱i koni s’ín tjí’ndeâlè nga ko̱ti̱xomai. Kì yá xi ochrjekànguiâlè.