MEHĨ TIAKU MINÃPIN 3
WBT1 Uiwyria’in eiwe’eg wo o — Uito po’og torania kawiat wo’omu’e hat ei’e hap wywo katupono miit’in mu’e haria kape yn Tupana po’og iha’at sio ta’atumu’e hap ewy ta’atunug sio yt te’eropyhu’at sio ta’atunug ta’atuepiat miit’in nãpin hap ewy sio yt hap kape teha’at kahato Tupana. Ma’ato yt watunug i ahepiat miit’in nãpin hap mi’i pote po’og ai’apiheg hap topyhu’at aipotmu’eria kai katupono yt watunug i Tupana ainãpin hap ko’i pote mi’i pote ti — Typy ihay haria eipe e aru ahepe Tupana mekewat e’at pe karãpe Tupana timoherep yne miit’in me uwe waku uwe yt naku i hap airo hap e’at pe. Mi’i tupono waku perup’i puo wati’atumu’e miit’in are. Waku wato’e aiwanẽtup hawe — Yt hãpyk i ahenoi pote ati’aparap kahato Tupana pe waku wato’e aipy’a pe. 2 Pyno torania aito i’aparap haria watoĩne’en. Ma’ato ahehay wo ahẽku wo yt wati’aparap i pote yt karãpe i sa’ag nug hano watoĩne’en katupono aipy’a piat aiwanẽtup hap moherep hap ahehay topyhu’at. Karãpe yt wati’aparap i ahehay wo pote hãpyk pe kahato watoĩne’en aheĩne’en hap tote. Ahehay hãpyk takat watunug kuap pote watuwepo’oro kuap yne aipiit wakuap nug hamo. 3 Aihũ Kawaru wẽ sakpo watikytyt saity hawyi mi’i ete watimohãpyk aikotã hewyry aimiky’esat ewy hamo. Kurin kat ete pyi watimoewyry aihũ iwato sese pytkai. 4 I’ewyte ahe’yara iwato kahato rakat pytkai watimohãpyk kahato y’y puo apukuita kurin kat no. Mi’i hawyi aimiky’esat ewy toto ahe’yara iwato kahato pytkai. Imohãpyk hap kurin hetu’a pe toĩne’en wen ma’ato totomoesaika kuap yne wasere wato pytkai waku ahewyry. 5 Mi’i hap ewy ahẽku topyhu’at kurin aipiit kai mekewat saity aihũ Kawaru wẽ sakpuat ewy mekewat imohãpyk hap kurin hetu’a piat ahe’yara etiat hap ewy. Ta’i ahẽku ti yt iwato i pytkai — Uito po’og torania kai wato’e ahẽku hit no. I’ewyte aikotã aria hit ta’at go iwato rakat rote igag nakat rote hap ewy meremo aria iwato kahato topyhu’at itote. Mi’i hap ewy ahẽku hit kaipyi iwato kahato sa’ag tuwenug. 6 Ahehay sa’ag ni aiwanẽtup hap ma’at kuap hat toĩne’en. Aima’at hat kahato ti rat ahẽku. Wo’oeremopusu hap tuwẽtem ahẽku pyi aiwo’oma’at’i ma’at’i hamo. Aikotã aria ahekare’en wuk hap ewy ahehay toĩne’en. Ahehay aikotã mekewat sa’ag nug hat eiam wyti aria wato yn toĩne’en. Ahehay sa’ag ahẽku kaipywiat miit’in wuk hap ewy topyhu’at. Ahehay wo miit’in ma’at hap topyhu’at katupono aheĩne’en hap moko’i moko’i hap aiwanẽtup hap pyi tuwẽtem ahẽku pyi are. Ta’i aimohun hap wyti ahehay sa’ag. 7 Ta’i watikuap kahato haiwot rakaria ga’apy piaria moperup’i aihũ wuat hap i’ewyte weitaria aihũ wo atimoperup’i kuap i’ewyte topyhu’at hewyry rakaria aihũ wo watunug. I’ewyte piraria watimoperup’i kuap aito. 8 Ma’ato mi’i pytkai ahẽku yt watimoperup i kuap i katupono ahẽku miit’in auka kuap hap topyhu’at. Ahehay wo watima’at kuap kahato miit’in. Moi haiwot rakat ewy ahẽku toĩne’en katupono mi’i wo wati’atu’uka kuap miit’in aimima’at ko’i. 9 Ahehay sa’ag ahẽku pyi gu’uro hy ewy toĩne’en katupono — Waku kahato en wato’e Ai’ywot Aika’iwat Tupana pe wen ma’ato miit’in me — Motoro meiũpepyi aria wato kape wato’e sa’ag ahewanĩkaptia pe miit’in me Tupana minug toiã’ãkap ko’i pe. Ahẽku wo — Waku kahato En Tupana wato’e mi’i hawyi mekewat ahẽku wo wati’atukuasa Tupana minug miit’in ko’i. Yt naku i kahato mi’i tã are. 10 Wẽtup ahehay pyi tuwẽtem Tupana mõtypot hap i’ewyte wẽtup ahehay pyi tuwẽtem miit’in mohit hap. Yt naku i ti rat mi’i tã are. Are pãi yt aiwe’eg hin i ahẽku moperup’i hap ete aito. Aiwemõti hap kahato ahehay. 11 Yrasa pyi yt karãmuo i y’y tuwẽtem he rakat nop takat wẽtup ka’a pyi yn. Mi’i hap ewy yt naku i ahehay he rakat ahehay nop takat ahẽku pywiat. 12 I’ewyte yt karãpe i Paku’a yp kaipyi hewo muse saat ne’i. I’ewyte yt karãpe i hewo Warana yp kaipyi Wasa’i saat ne’i. I’ewyte yrasa ihy nop takat yt tum kuap i aimi’u he rakat. 13 Mi’i hap ewy kahato yt naku i ahehay sa’ag yt Tupana Pã’ãu miky’esat ewy i ahẽku wo. Waku watunug wakuat yt kat i aiwemõtypot hap wywo. Mi’i hap ewy waku aheĩne’en hap he rakat ewy aiminug wo’owese hap wywo yt kat i — Uito po’og ai’e hap aiwanẽtup hawe. Waku yne ahehay wakuap wo watimoherep aiwe’eg hap imõtypot hamuat. 14 Karãpeĩ wato’oeha’ywywi hawyi yt kat i aiwo’owese hap aikai topyhu’at. Mi’i pote yt kan hamo i — Uito ti po’og irania’in kai wato’e ne’i. Ma’ato mi’i tã mote watuwema’at ne’i. 15 Karãpeĩ watu’uka aiwo’ope Tupana piat aimu’e hap kaipyi mi’i pote yt we’eg hin haria wo i watopyhu’at. Karãpe wato’oeha’ywywi aiwo’ope watopyhu’at irania’in yt imohey i haria ewy ne’i. Aikotã ahiag potmu’eria ewy watoĩne’en. Aikotã ta’atumiky’esat yn nug haria ewy watopyhu’at. Yt naku i kahato watu’uka aiwo’ope Tupana piat aimu’e hap kaipyi. Mi’i tã watunug mote yt karãpe i Tupana mimu’eria watopyhu’at ma’ato ahiag potmu’eria watoĩne’en. 16 Karãpe wato’oeha’ywywi aiwo’ope — Uito ti po’og eikai ai’e hap aipy’a piat kaipyi mi’i hawyi meiũran wanĩkaptia wo watopyhu’at itote hawyi aiwo’oma’at’i ma’at’i hap yt ikahu hin i rakat topyhu’at aiwo’opiat. Yt naku i are. 17 Ma’ato Ai’ywot atipy piat iwe’eg sakpo toĩne’en. Mi’i ti aimu’e kahato aipy’a pe towe’eg hap yt ahiag wat ewywuat hin i. Mio tã e ahepe — Pywuat kahato eweikupte’en no Ui’ewy e ahepe. Wo’owese haria wo ro eweikupte’en e. Wo’oky’e haria wo wo’opowyro haria wo wo’owesat kahu hanuaria ui’ewy o eweikupte’en o e ahepe. Waku wo’oky’e hap moherep hanuaria wo eweikupte’en e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupte’en no e ahepe. Waku yt typy ehay rakaria wo eweikupte’en e. Waku to’o’ewy’ewy wuat’i miit’in ky’e haria wo eweikupte’en e ahepe aimu’e kahato hat atipy piat Ai’ywot. 18 Watikoi aikope aimikoi wakuat pote waku kahato hẽtyt hawyi ma’ato yt pote yt kat i aimi’u wakuat watipuẽti aru hat hawyi. Mi’i hap ewy kahato wo’oky’e hap watikoi hawyi aiwo’owese hap toĩne’en aru aiwo’ope hawyi aimowepit hap toĩne’en aiwo’ope. Mi’i hawyi hewo kahato aru waku hap ahete aimi’u he kahato hap ewy aimikoi he hap ewy. Uito eimu’e hat pot Tiaku are.