Menge Salmo 56
WBT1 He Megbevayà, kehizuwi a kenikew, su edsurungen a te menge kuntada ku. Layun e zan edresaya. 2 Layun a edsurunga te menge kuntada ku. Utew Lavew he Megbevayà, mahabet is egkuntada kediey. 3 Emun ebpekeǥezam a te kegkahandek, ne edsarig a ziyà te kenikew. 4 He Megbevayà, edeliǥen ku sikew tenged te penaad nu. Kenà a egkahandek su edsarig a kenikew. Wazà etew he ebpekezezaat kedì. 5 Layun ibpesuwey te menge kuntada ku is menge lalag ku. Layun dan ebpelanu te kedezaat kedì. 6 Ed-eles-eles dan edtigum, ne ebentayan dan is langun he ebeelan ku su iyan tuyù dan is kedhimetayi zan kedì. 7 He Megbevayà, kenè nu ituǥut he mekelikey sikandan te silut tenged te kelelalung dan. Dèdeeti nu sikandan tenged te pauk nu kandan. 8 Netuenan nu is menge keseengan ku. Edtentenuzan nu is menge timpu he zutun nekesineǥew a. Kenè be inlista nu heini ziyà te libru nu? 9 He Megbevayà, dutun te ked-umawa ku kenikew ebpemekepelaǥuy is menge kuntada ku. Neseǥazan ku heini tenged te edlevanan a kenikew te Megbevayè ku. 10 Nengazen he Megbevayà, edeliǥen ku sikew tenged te saad nu. 11 Kenà a egkahandek su edsarig a kenikew. Wazà etew he ebpekezezaat kedì. 12 Edtumanen ku, Megbevayè ku, is pesarig ku kenikew. Ibpemuhat ku is pemuhat te kebpeselamat kenikew. 13 Su midlibri a kenikew te kemetayen, ne wazè nu mehimuwa he mezaag a, su wey a mekepengungubpaan diyà te etuvangan nu, Megbevayà, te kebpengungubpaan he merayag.