Tite 16

1 Sarayi, mālá Ibǝram ngga, ɓǝlî wi kǝ muna ɗang. Sǝama yì ka ndanǝ muna-ɓwama mǝ’bwali wi túró a ɓala, ɓwama Masar na, lùllǝì ama, Hajara. 2 Acemani ka, Sarayi ne Ibǝram ama, «Sǝni, Mǝtalabangŋo gìrnam nǝ ɓǝlmuna. Ida kyane, kúti atà muna-ɓala mem, yakǝla mǝ nǝ kum amuna nǝ njarbaní.» Ibǝram pǝlǝa ear nǝ cau mana Sarayi ne wi ka. 3 Anzǝm mana Ibǝram dumǝna pǝlǝa lum a nzali Kan’ana ka, Sarayi twal Hajara, muna-ɓala male, ɓwa Masar, sǝ pè burí Ibǝram, ɓǝ̀ duk māmí. 4 Ibǝram kùtí atà Hajara, sǝ kum muna a bumi. Lang Hajara sǝni muna kpana a bumi ka, tita būrǝce Sarayi mǝtala-ɓala male. 5 Sarayi pǝlǝa ne Ibǝram ama, «A nda a yinǝ mǝnia yì ɓǝsǝkiban ǝn nggǝ kumi ka amuram. Ən twal muna-ɓala mem ǝn po wu pak-ɓwama nǝi, sǝ lang yi sǝni kumna muna a bumi ka, kǝ nyesǝcem-ɓà. Ɓǝ̀ Mǝtalabangŋo pak ɓashi a nre sǝm sǝnǝ we.» 6 Pǝlǝa Ibǝram ne wi ama, «Yì ka mǝguro mò na aɓata rǝcandǝa mò. Pang nǝi kǝla mǝnana a sǝni nda ɓoaro kutibanì ka.» Pǝlǝa Sarayi kùtí a ɓìkî Hajara nǝ patanni, nda Hajara ɓangŋa o nying ɓala ka. 7 Mǝturonjar mala Mǝtalabangŋo kum Hajara tù a ban ɓe mgbeɗe mùr aɓa pǝɗanban a njenza; mǝno ka nda mgbeɗe mùr mǝnana a gírí njargula ká a Shur ka. 8 Ne wi ama, «Hajara, mǝguro mala Sarayi, a pur ake, sǝ a nǝ ká ake?» Eari wi ama, «Mǝ nda aban ɓangŋa mǝ nǝ upi ban Mǝtala-ɓala mem, Sarayi.» 9 Pǝlǝa Mǝturonjar mala Mǝtalabangŋo banggi wi ama, «Nyare aban mǝtala-ɓala mò, kya pa ɓamuro aɓata rǝcandǝa male.» 10 Mǝturonjar mala Mǝtalabangŋo lidǝmba nǝ cau ama, «Mǝ nǝ hatǝki amunio andǝ amǝ’keò, yàle làkkì malea ka kǝ ɓwa pà nǝ̀ gandǝ ɓallia ɗàng.» 11 Mǝturonjar mala Mǝtalabangŋo ne wi ɗǝm ama, «We ka a ndanǝ muna a bumo ado, sǝ awu nǝ ɓǝl muna-ɓwabura. Awu nǝ tsǝki wi lullǝ ama Ishmayel, acemǝnana Mǝtalabangŋo ongŋǝna ɓua andǝ pǝ́lǝ́kí nǝ ɓalǝu mô. 12 Yì ka nǝ̀ pa kǝla mǝdambǝriso bondo; nǝ̀ do nǝ bumɓikea arǝ koya ɓwa, sǝ koya ɓwa ka nǝ̀ do nǝ bumɓikea arǝì. Nǝ̀ ɓìkìdo aban aɓǝla male kat.» 13 Acemani ka Hajara pe Mǝtalabangŋo man bangcau nǝi ka lullǝu ama: El Roi; yì ka bang ama, «Ən sǝna Ɓwa mǝnana sǝngiyiam ngga.» 14 Nda gìr mǝnana tsǝa sǝ à tunǝ tūli-mùr mǝno ka ama «Biya-Lahai-Royi. » Tūli-mùrnî nakam yalung a nre Kadesh andǝ Bered. 15 Hajara yi ɓǝlì Ibǝram muna-ɓwabura, sǝ Ibǝram tsǝki muna lullǝu ama Ishmayel. 16 Ibǝram adyan ngga ndanǝ apǝlǝa lumi-tongno-nong-tàrú bwamdǝ tongno-nong-mwashat [86] mana Hajara ɓǝlì wi Ishmayel ka.