1 Timoti 3
SPP1 Ikaho vuêa kaêene nimaijinakúne ei pini sosi vaji ruha kaêene ea êajohauji ura reêamajaho kaukara mamaa ura venu. 2 Ijà ea kaêene êajohaêina kajaho ea hu panamahiêine êee napara nikwinune êee oriêini êajoêaraviêine êee hami hijiêine êee huni hura vejiêine êee ea suja mapoka aherame huni sei roiêine êee areri ea najahunijara reêamana. 3 Hu ea kaêene toa sisea oja pamihiêine êee paêaraêiro ohura apejiêina kaivo vivinui matauma hihuna ura rejiêine êee monia oja mihuri êunamijaho aremajara reêamana. 4 Hu ea kaêene huni kachiêina hami êajohaiêine êee hura êunama aririjino vejuêe sesahwaha huni hura vene êee huni ira hene vejiêinijara reêamana. 5 êEnakaivo ea kaêene huni kachiêina hami paêajohiêinijara reêamajaho hu êunama icháêinijino Godoni sosia êajoêena? 6 Hu ea kaêene maiêo Godoni ea renajaho pareêamana. Ijihuni maijaho ruha kaêene maêava kajihunaêe kehi kehi onareje êavena siseijara eha sisea kaêene apena jaêinaêe apeêenakúne. 7 Hu ea kaêene sosia paaruêikaêi samai hijujihi puni unaêijaho huni kara mamaaêe reêama jihunaêe ea huni vuêa paêwavakame hu êavena sisei jihuni kwavaha paaruhuna. 8 Ijà êunama nikwinuêina kajino tikoni êuêo ea puni hura vene êee mitara patukaraviêine êee toa sisea oja pamihiêine êee êunama siseijino monia êekiêinijija parehuna. 9 êEnakaivo pu hema kaêene nimaiji najahiêine êee vwiha puna ariraêe naviêinijipo rehuna. 10 êEne ea ikija marako vena kive areri vehunaêe êee panamahiêinaêe kiêavajaho ijiêa êwarave tikoni huni kaukara ijaho veêavara. 11 êEne êunama nikwinuêina kajino napahwaha epuni hura vejiêine êee ea êahopuni vuêa sisea pakosarame ojiêine êee opuipo hami êajoêaraviêine êee uneunecha mahoêo ariraru pauchauchahi vejiêina. 12 êEne veje tikoni napara kwinu kwino saviêine êee puni sesamaa êee puni kachiêina hami êajohaiêinijipo reja. 13 êEne tikoni kaêene hami kaukara vejujija puni hura vene êee Jesu Keriso oni vajijino pura nimaa rojujaho pajuma pavehuna. 14 Na ike uneunecha kija jonaêe veju vo na nimaa rojujaho maiêo josu pareêeje na roe ja kihuna. 15 êEnakaivo vejuroêi na tetama vehuni jihunaêe na ikija veju. êEjakame ja ea kwinu kwino icháêinaêe Godoni kachiêina vajijino kara icháêinaêe vejiêi hihuni êunamijaho kame hehuna. Ijà kachiêina kajija Godi kaêene majama hijiêini jihuni sosia êee pu tukeja kaêene nimaiji êunanamujina. 16 Ike aposarahuna pana vo ikaho núni nimaa roijihuni hemaka niêinijina. Hu roe haha apejume kavara. êEjume Godoni êAvenijara Hu arimaa êwamajaho êona ojiêinapo Hu kavara. êEne kwaa ara mapokakaho êwaravume hejara. Hu mweêa ikino nimaa rojara êee Hu apene akúpa êahi hanajiêina vaji vaêana.