Menu

2 Koritia 8

SPP

1 êEnajihunaêe Masatonia puni sosia vaji Godoni maiji vwihaniêina kaêene mihaji nú ja êwarave hehunaêe ura renúu. 2 êEne pu sisea êee ahija piunivara vo pu niêimaêuraêe temarasahe êee uneunecha paêarenaêe paraniana vo mavajihiêi nahunijara ura rena paraniana. 3 êEnajihunaêe na ja nahama êwaravujaho pu areri vajihuna ho pavajihunijaho pakaêavara kaivo pu puni ura ijino asisame kahaho vajihara. 4 êEne pu ea kaêene akuaviêinijihi niêajiêirono ura renaume êejahúe puni pwinanaêe reêavarono jarirume êwaruvara. 5 êEne ikaho núra icháêinaêe vwihajiêi hijujaêina pana kaivo Godira ura renujaêinaêe pu marakuêijaho puni hia Natohwi jihuni ija tahi irechamareja ijiêa nuni ija taha roara. 6 êEnavo nú Taitasi êejahaume hura nimarako aneja venana. êEnaêomo hura kúêo joni vaji kaukara mavarasaêina kaho vena vaêe urisahuna. 7 Ja nihoêo uneunecha mamaaru vejura areri nimaaroa êee ira ariraêe êwarame êee henaka rukine êee nihoêo nimaa nimaaêe vene oja mihuni êunama kaêene nú joni vaji aneja vejajaho veje rausaêamana. êEne kaukara mamaakaho êuêo veje rausaha paraêamana. 8 Na ikaho êejahie êwarahuna pana kaivo na ja ea êahoêa nimaa nimaijino oja mihu ho pana ijí kiêirono êwaravuta. 9 Ijihuni maijaho núni Natohwa Jesu Kerisora maiji vwihanúajaho ja nihena kavara. Hu nihoêo arerina kaivo Hu roe jonijihunaêe paêanaêe renana. êEjakame Hura paêana renana vajijino jara roe areri rena paraniêamarono avanana. 10 êEne vajihuri êunamijaho nuni vwiha icháêina kaêene niêajihunijaho ike êwaravu. êEne juara pina kaêene nipaêarenajaho ja amuraru pavajihara kaivo êuêo ijaêina vehuna ura renaara. 11 êEnakaivo ijí êuêo temarasahiêi aneja vene vejajaêinaêe vena vaêe paêareêavara. êEne uneunecha icháêinaêe ja areri vajihuni jaêinaêe vajiêavara. 12 Ijihunaêe ja vajihunaêe amairiaraêavajaho ijaho ea irara hununaêa areri navujaêinaêe vajiêamana kaivo hununaêa ijaêina paêajaho pavajihuna. 13 êEnajihunaêe ja mahoêo vají parave pu hami hiêeje ja sisei hihuna na parone êwaravu kaivo ahume areri renahunaêe êwaravu. 14 êEne ike vea vutuakaho jara asisame huri vajiêavajara pura pivusahujija niêajihuna. êEne pura asisame huri vajihujara êuêo jara pivusaêavajaho niêajihuna. êEjakame ijara areri rehuna. 15 êEne ikaêinaêe vejara. Ea irara nihoêo mapokaêe eiriajaho nijara areri renana. êEjume ea kaêene mapoka paeiriajaho hu êuêo nijara areri renana êúmana. 16 êEnakaivo Godi teimani êwavu. Hura Taitasi oni oja vaji vwiha nikwisuêina kaêene nara jona vwihaju jaêinaêe huni vaja ranamana. 17 Ijihuni maijaho hu núra raka kaêene jarivajiru panimaa venana kaivo hura huni ura ijino teamaêeme joni vuêana. 18 êEne nú vwea pina kaêene huni pinana ike vuêa maa maiuêina ikehuni sosia vaji êwama apene ojujaho ranavuêe hu huêúmo vuêu. 19 êEne ijiru pana kaivo sosi hu nú puêúmo êuraha ohunaêe iji pijahara. Ike kaukara maiuêinakaho núra êajohiêi Natohwiji taêarohe êee jara niêajarahuniji najahe avaju. 20 êEne hami akuaviêi ike swara mapoka mamaa kaêene núra êajoêavarono vajúhajaho êajoha. êEjakame ea pina panamuhe êwaruhuna. 21 Ijihuni maijaho nú nihoêo iraka kaêene aririjihuni hura veju. êEne Natohwi jihuni unaêeru pana kaivo ema puni unaêa êuêo hura hami veju. 22 êEnaêomo nú núni vwea pu puêúmo ranavuêe vuêu. Nú hu vena kavajaho hu uneunecha mapoka vajijaho hu ea nimaa ura rejiêinaêe kavara. êEnakaivo iviamaa hu majano ura rena paranu. Ijihuni maijaho hu niêimaêura ja nimaa vetiu. 23 êEne Taitasinaêijaho hu nuni napure êee nú huêúmo joni vaji kaukara vejiêina. êEnakaivo vwehu núpunaêijaho pu sosi puni onaêe êeke ojura êee pu ea kaêene vejuêe Kerisoho teamaviêinijina. 24 êEnajihunaêe jara vwehu núna ikihijaêe oja mihujaho samaumaa sosia puni unaêi najaêavara. êEne irakijihunaêe núra ja taêarorahu jihuni maijaho pu kaêavara.

Everything we make is available for free because of a generous community of supporters.

Donate