ዓይኑሞ ማፃኣፖ 129

¹ ናኣቶፓ ዓርቃዖ ፑርታ ባኣዚ ታና ሄሌኔ፤ ዒስራዔኤሌ ዓሳ ሂዚ ጎዖንጎ፦

² «ታኣኒ ናኣቶ ዓኣንቴ ዓርቃዖ ታኣኮ ሞርካ ታና ሚጪንቲቃይዶ ዳውሳኔ፤ ጋዓንቴ ታና ዔያታ ባሺባኣሴ።

³ ታኣኮ ዙሎ ዔያታ ዢራፓና ጳርቂ ጎሺ ጎሽኮማጉዲ ሹኬኔ።

⁴ ናንጊና ናንጋ ጎዳ ቢያ ዎዴ ፒዜኬ፤ ዬያቶ ሚጪንቱዋ ፑርቶ ዓሶ ቱኡዛፓ ታና ዒ ቡሌኔ።»

⁵ ፂዮኔ ዒፃ ዓሲ ቢያ ቦርሲንቲ ጊንሢም ማዖም።

⁶ ማኣሪ ዑሢዳ ባቃሌ ማኣቲጉዲ ሃጊ ዑጉዋዖ ሹሊ ባይቃያ ማዖም።

⁷ ዬያጉዴ ማኣታ ዎዻ ዓሲኮ ኩጮ ኩሙዋያ ጌኤቴ ማሂ ቱካኒ ጋዓሢማኣ ኮኦማ ኩሙዋያ ማዖም።

⁸ ዔያቶኮ ኮይሊና ዴንዳ ዓሲ ቢያ ፂዮኔኮ ሞርኮ፦ «ናንጊና ናንጋ ጎዳ ዒንሢ ዓንጆንጎ! ኑኡኒያ ናንጊና ናንጋ ጎዳ ሱንፆና ዒንሢ ዓንጃኔ!» ዔያቶ ጋዓዓኬ።