ዓይኑሞ ማፃኣፖ 138

¹ ናንጊና ናንጋ ጎዳሢዮ! ጉቤ ዒኔፓ ታ ኔና ጋላታኔ፤ ሜሌ ፆኦዛ ዛጋንቴ ኔኤም ታኣኒ ጋላታ ዓይኑሞ ዓይናዻኔ።

² ኔኤኮ ናንጊና ናንጋ ናሹሞንታ ፒዙሞንታ ኔኤኮ ሱንፆ ዼኤፑሞንታ፥ ሃሣ ኔ ዓይሢፆ ፑኡፑሞንታ ፔጋሲ ኔኤኒ ታኣም ዻዌሢሮ ኔኤም ዱማዼ ኔኤኮ ጌኤዦ ማኣሮ ባንሢ ሺሪ ሂርኪ ጌይ ዚጊ ዚጊ ታ ኔና ጋላታኔ።

³ ታ ኔና ዔኤላዛ ኔ ታኣኮ ሺኢጲፆ ዋይዜኔ፤ ኔ ዶዱሞና ኔኤኒ ታና ዶዲሼኔ።

⁴ ናንጊና ናንጋ ጎዳሢዮ! ኔ ጌዔ ቃኣሎ ዔያታ ዋይዜሢሮ ዓጮ ካኣታ ቢያ ኔና ጋላታኔ።

⁵ ኔ ማዼ ባኮ ቢያሢንታ ኔኤኮ ዼኤፖ ቦንቾንታሮ ዓይናዺ ዔያታ ዼኤፒሳኔ።

⁶ ኔኤኒ ሌካ ዼጌ ቤዛ ዓኣያ ማዔቴያ ሂርኬ ማዔ ቦሂንቴዞንሢ ኔ ዛጋኔ፤ ዖቶሮ ዓሶ ሃኬ ዓኣ ቤዛ ዓኣዖ ኔኤኒ ዔራኔ።

⁷ ታኣኒ ሜቶኮ ባኣኮ ጌሌቴያ ኔኤኒ ሼምፔና ታና ጌሣኔ። ዻጋዺ ታጊዳ ዔቄ ሞርኮ ኔኤኒ ማካኔ፤ ኔኤኮ ዼኤፖ ዎልቆና ኔ ታና ዓውሳኔ።

⁸ ናንጊና ናንጋ ጎዳ ታኣም ማሌ ማሊፆ ኩንሣንዳኔ፤ ናንጊና ናንጋ ጎዳሢዮ! ኔኤኮ ናሹማ ናንጊና ናንጋያኬ፤ ኔ ኩጮና ኔኤኒ ማዤሢ ዋሊ ሃሺፖ።