ዓይኑሞ ማፃኣፖ 141

¹ ናንጊና ናንጋ ጎዳሢዮ! ታ ኔ ዋይዞም ዒላታኔ፤ ኔጉዋዖ ዑኬና ታና ማኣዴ፤ ታኣኒ ኔ ዋይዞም ዒላታሢ ዋይዜ።

² ታኣኒ ሺኢቃ ሺኢጲፃ ዑንጄ ኔኤም ጩቢሾያጉዲ ኔ ባንሢ ዔቂሳ ኩጫኣ ዒባናኣና ዒንጎ ዒንጊፆጉዲ ማዖም።

³ ናንጊና ናንጋ ጎዳሢዮ! ታ ዻንጎ ካፓ ዓሲ ጌሤ፤ ታ ሙሱሮዋ ቃዛንዳ ዓሲ ዔቂሴ።

⁴ ፑርቶ ዓሶና ዎላ ፑርታ ማዾ ታ ማዹዋጉዱ ታኣኮ ዒኖ ፑርቱሞ ባንሢ ማሊሲፖ፤ ዔያቶና ዎላ ዴይ ሙዎ ሙኡዚያ ታና ሙዒሲፖ።

⁵ ፂሎ ዓሲ ታና ፁንቆንጎ፥ ዬይ ታና ሚጪንቲሢኬ፤ ዒዚ ታና ጎሮንጎ፥ ዬይ ታ ቶኦኮ ዖይሲና ቲሽኪሢኬ፤ ጋዓንቴ ታ ቢያ ዎዴ ፑርቶ ዓሶ ማዾ ማኪ ማኪ ሺኢቃኔ።

⁶ ሱኡጋ ዔያቶኮ ዼኤፖ ላሎ ማጋ ኬኤሪንታኣና ታ ጋዓ ባካ ጎኔታሢ ዔያታ ዔራንዳኔ።

⁷ ሳዓ ጎሽኪንታኣና ቦኪ ቡርሺንታሢጉዲ ዔያቶኮ ሜጌፃ ዱኡፖ ካራ ካራ ዜርቂንታንዳኔ።

⁸ ናንጊና ናንጋ ጎዳ ማዔ ታ ፆኦዛሢዮ! ታኣኒ ጋዓንቴ ኔና ጉሙርቂፆ ሃሻዓኬ፤ ኔ ታና ዓኣቻንዳጉዲ ታ ኮዓሢሮ ሃይቆም ጌይ ታና ሃሺፖ።

⁹ ዔያታ ዓኣቺ ፒሬ ፒራስካፓ ታና ቶሊሴ፤ ፑርቶ ማዻ ዓሶኮ ዹቃስካፓ ታና ዓይሴ።

¹⁰ ታኣኒ ኮሺና ዖኦኪ ዴንዳዛ ፑርቶ ዓሳ ዔያታ ፒሬ ፒራስካ ፔኤሮ ዓዺንቶንጎ።