Jon 7

1 Wote Jisas ni, Galili kona orunga andpa kÊn, Juriya kona ila pi naprÊm. Ei nambuⱡ emel, Jura wu mat ndi, elim rok kunding pilik etÊng. 2 Jura wamp mbÊ nga manga kouwÊ rok, kor mormÊn ui ou ei, nondpa elinga, Jisas nga ÊngÊnÊl mbÊ ndi, elim kundÊk, nÊk mel, “Nim ya kona ei, wak rokÊn, Juriya kona ila pi! Wote, nim pep rormin wamp mbÊ ndi, nim uⱡ rÊpndi mbÊ itana kÊneing. 4 Wamp ti ndi, elim kandÊk, neing nimba pÊtÊm. Wote elim ndi, uⱡ mbÊ tÊpa pena ila, pendpa etÊm. Nim ndi, i etkÊn uⱡ mbÊ in ndam, muⱡ uⱡ mbila, nim nga mbi ei piling,” nÊtÊng. 5 Wote, elim nga ÊngÊnÊl nimbÊ ndi, i ku etÊk, elim kÊn mondÊk pili napÊtÊng. 6 Jisas ndi, nimba mel, “Na mbi ei nga ui mendpÊⱡ ei, ekit ui nawÊm. Wote ui nant mbila, enim kapⱡa ping mint. 7 MÊi kona wamp mbÊ ndi, enim numan nguing, wote na numan ngui ngÊnging. Nambuⱡ emel, na ndi, wamp mbÊ nga uⱡ etmin mbÊ, nÊmp kit mondÊr. 8 Enim wÊl rÊng nok mormÊn kona ila, muⱡeing pÊi! Wote na pi nÊpimp. Ei nambuⱡ emel, na nga ui ei kokila,” nitim. 9 Ik ei mel nimba pendpa, kelpa wÊl Galili kona ila, int murum. 10 Wote, elim nga ÊngÊnÊl mbÊ, kor morung ila puⱡÊngina, Jisas ila purum ku. Mot nga pi nÊprÊm, wote mo ropa purum. 11 Kor morung ui ou ni kÊn, Jura wu nimbÊ ndi, wamp mbÊ waldÊk nÊk mel, “Jisas ni, nil morum?” nÊk, andÊk kurÊrÊng. 12 Ni kÊn, wamp minal ndi, ol wal tek nÊk mel, “Wu ei, wu kai ei,” nÊtÊng. Mat ndi, nÊk mel, “Wu ei ndi, wamp mbÊ tÊpa wÊlÊ mundrum,” nÊtÊng. 13 Wamp morung nimbÊ ndi, Jura wu nuim mbÊ nga mundmong etÊk, ik ei, mot nga ni nandÊtÊng. 14 Kor morung ui ni omba, rÊk ting ila pelinga, Jisas ni manga wingti ou nila, murÊk mba wamp mbÊ kÊn, puⱡ mondpa ik mbo inditim. 15 Jura rÊp wu nimbÊ ndi, min ngÊn mundÊk nÊk mel, “Wu ei ndi, ik wengÊndÊpa, ronduⱡ mat ninim mbÊ, nam ndi, mbo rondum nda?” nÊtÊng. 16 Wote Jisas ndi, punt ropa, nimba mel, “Na ndi, enim ik mbo endint mbÊ, nanim nga numan ila pilip ni nanÊnt, mon. Wote na tÊpa mundrum Wuta ei ndi, ik mbo endilinga nÊnt. 17 Wamp ti ndi, Got nga numan pÊtÊm ei mel, pep rop itimp nimba, pilim ndam, na ndi, ik mbo endÊnt mbÊ, Got kÊn pepa onum, muna na nga numan ila pilip nÊnt nda? Ei pilpa, mbi ndumba. 18 Wote wamp ti, elim nga numan ila pilpa ik nÊtÊm ni, elim nga mbi paka rundeing nimba etÊm. Wote, wamp ti ndi, elim tÊpa mundrum wamp ei nga mbi, paka rundeing nimba, pÊtÊm wamp ei, kun kai morum. Uⱡ ⱡawa ti mon. 19 Unt, Moses ndi, enim mi ik nimba ngurum pÊtmÊn. Ni kÊn wote, enim wamp ti ndi, pep rui narÊrmin. Ei nga, nambuⱡ emel, enim ndi, na rok kunding enmin?” nitim. 20 Wote, wamp nimbÊ ndi, punt rok nÊk mel, “Nim kur kit ti, mondkÊn morÊn! Nam ndi, nim ropa kondÊmba enim?” nÊtÊng. 21 Ni kÊn, Jisas ndi, nimba mel, “Na ndi unt, uⱡ rÊpndi ou ti elimba, enim kandÊk rut nÊtÊng. 22 Moses ndi, wamp kÊng kupti uⱡ ei nga iteing nitim. Ei Moses ndi, iti nÊtÊtÊm. Uⱡ ei, unt anda kouwÊmÊn mbÊ nga etÊng. Ei nga, enim ndi, mowi kor kÊn, kang mbÊ kÊn, kÊng kupti uⱡ ei etmin. 23 Enim ndi, Moses nga mi ik ei, ropÊn puⱡa rui nÊrmÊn. NÊk kÊn, wamp kÊn kÊng kupti uⱡ ei, mowi kor kÊn etmin. Wote na ndi, wu ti nga kÊng ei, mowi kor kÊn, etÊp kai mundunt. Ei nga, nambuⱡ emel, popÊⱡ kÊnmin? 24 Enim ndi, mong raⱡ ndi mendpÊⱡ, kandÊk kÊmp ti nÊtÊi! Uⱡ kupa mendpÊⱡ ila, kandÊk kÊmp tÊi!” nitim. 25 Ni kÊn, Jerusalem wamp mat ndi, molk waldÊk nÊk mel, “Wu ei, ruing nÊtmin wu ndi nda? 26 KÊnÊiya! Wamp nga num ila ik ninim mat ndi, ik punt rui narÊnmin ei ka! Got Nga Ngurum Wu ei, Kraist pilik kun enmin nda? 27 Wote, Got Nga Ngurum Wu ei, om ndam, kona nant ila moⱡpa omba uⱡ ei, wamp ti ndi, pili napilmba. Wu ei moⱡpa, onum kona ei, tÊn pora pÊtmÊn,” nÊtÊng. 28 Jisas ndi, manga wingti ou ila wamp mbÊ, ik mbo endpa, ik ronduⱡ mundpa, nimba mel, “Enim ndi, na kandÊrmin. Wote, na nga mang kona enim pÊtmÊn. Wote, na omp mor uⱡ ei, na nga ronduⱡ ila mon. Wuta, muⱡ ila wu kupa morum ei ndi, na tÊpa mundrum. Wu ei, enim ndi, pili napÊtmÊn. Wote na pilip mor. Ei nambuⱡ emel, na wu ei kÊn moⱡÊp ur. Wote wu ei ndi, na tÊpa munduⱡnga ur,” nitim. 30 Wote, tÊp imp muⱡmin nÊk etÊng. Ei nga wote, elim nga ui ei, kokila itim ila, wamp ti ndi, imp muⱡi nÊmbrÊng. 31 Wamp num pitim nila mat ndi, ik nitim ni, pilik tÊk nÊk mel, “Wote Got nga ngurum wu ei, om ndam, ya wu ei, enim ei mel, uⱡ rÊpndi mat minal etmba nda?” nÊtÊng. 32 Wamp minal nimbÊ, Jisas nga nitim ik nimbÊ wamp ndi, ol wal tek nÊtÊng. Perisi na, wu Pris kuimbal nimbÊ ndi pilik, Jisas tÊk imp muⱡeing nÊk, el wu nimbÊ, tÊk mundrÊng. 33 Jisas ndi, nimba mel, “Na ui orunga kot, enim kÊn moⱡÊp, wote na tÊpa mundrum wu ei kÊn, kelip mbi. 34 Enim ndi, na andÊk kurung. Wote, na kandÊk ti nÊtÊng. Na mbi ent kona ila, enim pi nÊping,” nitim. 35 Jura wu nimbÊ ndi, en enim nÊk mel, “Wu ei, nant tila pangga, tÊn ndi, kurmin ei nga ninim nda? TÊn nga Jura wamp mat, wÊl Grik kona ila petmin wamp mbÊ kÊn, mba Grik wamp ik mbo endÊmba, ninim nda? 36 Elim ndi nimba mel, ‘TÊn ndi, elim andÊp kurmin, wote kandÊp ti nÊtmin,’ nitim. Wote, ‘Elim mbo munt kona ila, kapⱡa ui nÊwing,’ nitim. Ik ei, etpa ninim mel nant nda?” nÊtÊng. 37 Kor molk munding etÊng ui ou ila, Jisas oⱡa anggilpa, ik oⱡa mundpa, nimba mel, “Wamp ti, nu waka em ndam, na kÊn omba nu nangga! 38 Buk Wingti ei ndi, nimba mel, ‘Na mondÊk pÊtmÊn wamp mbÊ nga numan ila, kont mba mul nu ei, rÊk rÊk pukpa omba, mint morum,’” nitim. 39 Jisas ndi, ik nitim ei, elim mondÊk pÊtÊng wamp mbÊ, Muⱡnga Wingti nguimp nimba nitim. Ui ni kÊn, Muⱡnga Wingti ei, ti natÊtÊng. Nambuⱡ emel, Jisas koⱡpa wote, mul kona pi nÊpÊrÊm. 40 Jisas nitim ik ei, wamp mbÊ ila mat ndi, pilik nÊk mel, “Wu ei kupa, Painui Wu ei,” nÊtÊng. 41 Wamp mat ndi, wu ei, Got Nga Ngurum Wu ei Kraist, nÊtÊng. Wote wamp mat ndi nÊk mel, “Got nga ngurum wu ei, Galili kona orunga ui nawÊmba ei ka!” nÊtÊng. 42 Buk Wingti ei ndi, nimba mel, “Got nga ngurum wu ei, King Depit nga pundÊn ei, Betelem kona ila, Depit nga mÊi mang kona ila ming,” nitim. 43 Ni kÊn, wamp mindil nila, Jisas nga nÊk oi nduk mu raⱡ rorung. 44 Wamp mat ndi, tÊp kan nguimin nÊtÊng. Wote ambulk ti natÊtÊng. 45 El wu ni kÊⱡ, int purung kÊn, Perisi wu na, Pris kuimbal nimbÊ ndi, waldÊk nÊk mel, “Nambuⱡ emel, wu ei, tÊk mek ui nawÊnmÊn?” nÊtÊng. 46 Wote, el wu ni kÊⱡ ndi, punt rok, nÊk mel, “Wamp ti ndi, wu ei, ik nim ei mel ni nanim, ei ka!” nÊtÊng. 47 Perisi wu nimbÊ ndi, nÊk mel, “Enim i ku etpa, tÊpa kum ngi randum ei? 48 TÊn nga Pris Kuimbal na, Perisi wu mbÊ nga mat ndi, wu ei nga ik ei, pilik tÊtmÊn ei? 49 Wamp nimbÊ ndi, Moses nga mi ik ei, pep rui narÊrmin. Ei kÊn, wamp mbÊ, Got nga kuimp keta ila, kit molk pora ndurung,” nÊtÊng. 50 Perisi wu kÊⱡ nga wu ti ni, Nikondimas wu ei, unt Jisas mba kÊndrÊm. Ei ndi kat, kundpa nimba mel, “Wu ti nga puⱡ ei, kÊni nakÊndpÊn. Ik ndo ngonmin ei, tÊn nga mi ik ila petÊm nda?” nitim. 52 Wote, Perisi wu kat ndi, punt rok, nÊk mel, “Nim Galili wu ei ku? Buk Wingti ila, kÊmp rokÊn pilkÊn, kun iti Galili kona ila, painui wu ti, ui nawÊmba,” nÊtÊng. 53 Wote wamp nimbÊ, elpa elpa mang kona purung