2 SAMUEL 22

1 Iehova ese David na inaina iboudiai imadia amo bona Saulo imana amo e hamauria dinana ai, David ese Iehova e hereva henia ina ane ai. 2 Ia eto: Iehova na egu nadi-gini, egu kohoro, egu hahemauri tauna; 3 egu Dirava, egu nadi-gini, na abidadama heniamu tauna; egu kesi bona egu mauri doana; egu kohoro bona egu roho-mauri gabuna; egu hahemauri tauna, oi ese daḡedaḡe karadia amo o hamaurigumu. 4 Iehova, e imodaiamu Diravana, na tai heniamu, bona inaigu edia amo e hamaurigumu. 5 Mase hurehuredia ese e ḡeḡegu ahuva, hahedika abatadia ese e hagariguva; 6 Mase gabuna ena iḡui varodia ese e idoagu, mase huodia ida na tata hedavari. 7 Egu hisihisi ai Iehova na boi henia, egu Dirava na tai henia. Ena dubu ai lau gadogu e kamonai; egu taitai na ia taiana ai e kau. 8 Una negana ai tanobada e laga, e heude-heude, guba badidia danu e heude-heude. e marere-marere, badina be ia vada e badu. 9 Kwalahu na ia uduna matudia amo e dae, Iahi siahuna na ia uduna amo e lasi, Iahi hururu-hururudia na iena amo ema. 10 Guba e beua tari, bena e diho; dibura badana na ia aena henudiai. 11 Kerubi ai e gui, e roho lao; lai hanina amo e roho haraḡa-haraga. 12 Dibura na e hekoulaia, dagadaga dubana e hetarulaia. 13 Diari na ia vairanai, unu amo Iahi hururuna e lasi. 14 Iehova ese guba-rahua ai e hereva, Herea Mikamika na e gwau isi. 15 Ena diba e kino, e hakarohodia; ena kevaru e hakevarua isi, e hadareredia. 16 Bena davara dobudobudia e heita, bona tanobada badidia e hedinarai, oi Iehova ese o gwau henidia negana ai, oi udumu matudia amo o hahodi lasi negana ai. 17 Atai amo e dau dobi, e abigu, ranu momo amo e verigu lasi. 18 Lau inaigu goadana ena amo e hamaurigu, e inai henigu taudia imadia amo e hamaurigu, badina be idia ese bema hadareregu diba. 19 Egu hisihisi dinana ai e davarigu, a Iehova na egu imuda. 20 Ia ese taora bada gabuna ai e hakaugu lasi; ia ese e hamaurigu, e moalelaigu dainai. 21 Iehova ese davagu vada e henigu, egu kara maoromaoro heḡereḡerena, vada e hanamogu, imagu edia ḡoevaḡoeva heḡereḡeredia. 22 Badina be Iehova ena dala vada na badinadia; lalo-hadai dikadia daidiai egu Dirava asina rakatania. 23 Badina be ena haheḡani iboudiai na lau vairagu ai; ena taravatu asina negedia daure. 24 Ia vairanai lau na asi egu kerere. kara dika amo na raka oho. 25 Taunabunai, Iehova ese vada e hanamogu, egu kara maoromaoro heḡereḡerena ai; egu ḡoevaḡoeva heḡereḡerena ai vada e hanamogu. 26 Heabidadama tauna oi ese o abidadama heniamu; kara maoromaoro tauna oi ese o kara maoromaoro heniamu. 27 Lalo-ḡoevaḡoeva tauna enai oi lalomu danu baine ḡoevaḡoeva; a kara gageva-gageva tauna enai oiemu kara danu bae gageva-gageva. 28 Badina be lalo-manau taudia na oi ese o hamauridiamu; a hekokoroku taudia na oi ese matadia o ha-igodia dihomu. 29 Momokani, Iehova e, oi na egu lamepa; Iehova ese egu dibura e hadiariamu. 30 Momokani, oi bagumu ai orea badana baina hadarerea diba; egu Dirava bagunai maḡu ta baina rohoa hanai diba. 31 Ina Dirava ena dala na herea dae; Iehova ena gwauhamata vada e momokani; ia na e abidadama heniamu taudia edia kesi. 32 Dirava be daika? Iehova mo. Nadi-gini be daika? Iseda Dirava mo. 33 Ina Dirava na egu roho-mauri gabuna aukana; ia na egu dala e halailaia Diravana. 34 Ia ese lau aegu na dia aedia heḡereḡeredia ai e halaodia; ia ese atai gabudia ai e haginigu kau. 35 Ia ese lau imagu e hadibadiamu, tuari karadia ai, bena imagu na mai goadadia auri-laboralabora pevana baina marea. 36 Emu hahemauri kesina vada o henigu; emu kara manada-manada ese vada e imodaigu. 37 Taora bada gabuna vada o lailaia, lau aegu bae moia tao; aegu na asie dedi. 38 Lau inaigu na hahavadia, na lasidia tao; lau asina gini kerehai ela bona idia na e bua tari. 39 Na ha-oredia, na gwadadia uru dainai asie tore isi, e keto, aegu henudiai. 40 Oi ese goada o hariolaigu, baina tuari totona; lau inaigu o tahodia dobi henugu ai. 41 Lau inaigu o hakerehaidia lau vairagu ai; e inai heniguva taudia na na habuadia tari. 42 Hekaha e noilaia, a ta ese se hamauridia; Iehova e tai henia, a ia na se haere henidia. 43 Lau ese na botadia patapata, tano ḡahuna na heto; na taodia tao, na moidia, ariara kopukopuna na heto. 44 Taunimanima edia tuari amo o hamaurigu; bese idau-idau ikwaradia ai o halaogu; asi dibagu taudia ese isiaigu e lao heniva. 45 Idau bese taudia na lau vairagu ai e igo diho; lau harigu e kamonai, bena e kamonai henigu. 46 Idau bese taudia na kudoudia e hetaha; edia komu gabudia amo e raka lasi mai heude-heudedia ida. 47 Iehova na e maurimu; egu nadi-gini na hanamoamu; egu Dirava bae imodaia, egu hahemauri nadi-ginina. 48 Dirava ese lau inaigu davadia e henidiamu; ia ese taunimanima na lau henugu ai e atodiamu, ia ese lau inaigu bogaragidia amo e hakaugu lasi. 49 Oi ese o imodaigu, lau inaigu daediai; daḡedaḡe taudia edia amo o hamaurigu. 50 Ina dainai, Iehova e, lau baina imodaimu bese idau-idau bogaragidiai; oi ladamu baina hanamoa egu ane ai. 51 Kwalimu badana ia ese ena pavapava e heniamu; e horoa tauna ia ese e bogaia hisimu; David mai garana ida baine bogadia hisi ela bona hanaihanai.