ISAIA 29

1 Ariele e, Ariele e! David ese e noholaia hanuana e! Laḡani ta laḡani ta murina amo bainema, aria na edia nega ta ta ai bae hekara. 2 A Ariele baina hahisihisia, bae ḡanaḡana, bae tai lolololo; ia na ihaboulaina patana rahurahuna heḡereḡerena ai bainela lauegu ai. 3 Lau ese baina hataruhamu heḡeḡe, kohoro amo baina hadaimu ahu, bona tano baina larebaia, oi ihadikamu. 4 Bena tano lalona amo ba hereva, ḡahu lalona amo emu hereva bainema; oi gadomu na tano lalona amo bainema, laulau gadona na heto: oi eremu na ḡahu amo baine hemaunu. 5 Inaimu bae hutuma, tano ḡahuḡahuna na heto; bona asi edia hebogahisi taudia bae hutuma, uit momorudia lai ese e oda ohomu na heto. Bena davadavana ai 6 Iehova Sabaota ese baine vadivadi henimu taku, guba-rahu bona tano-laga bona rege-bada ida, bona koe-hirihiri bona lai-gubana bona lahi siahuna hururu-hururunaida. 7 Bena Ariele e tuari heniamu besedia loḡora iboudiai, ia bona ena gabu aukana e tuari henidiamu bona e hahisihisidiamu besedia iboudiai, na nihi eiava hanuaboi mata-hanaina heḡereḡerena ai baela. 8 Hitolo tauna na heto, e nihimu bena ena nihi ai e anianimu, a mai hitolona ida e nogamu; eiava ranu-mase tauna na heto, e nihimu bena ena nihi ai ranu e inumu, a mai manorina bona mai ranu-masena ida e nogamu, Siona ororona e tuari heniamu besedia loḡora iboudiai na unu mo bae heto. 9 Sibomui ba hahekavakava, bena mai kavakavamui ida ba noho; sibomui matamui ba hakepulu, bena mai mata-kepulumui ida banoho. Ba kekero, a dia vine-ranuna dainai; ba raraga, a dia kekero ḡauna dainai. 10 Badina be Iehova ese mahuta-hedavauhe laumana na latamui ai vadae seia kau; peroveta taudia matadia vada e hakapudia, emui mata-hanai taudia kwaradia vada e ḡovadia ahu. 11 Ina mata-hanai idoinai na vada e koua ahu bukana herevadia heḡereḡeredia ai vada ela, emui ai. Taunimanima ese duahia-duahi mai dibana tauna ta e heniamu, e tomu “Ina na a duahia”, negana ai, ia na e tomu “Basina duahia diba, badina be vada e hekou ahu”. 12 Bena buka na asi duahi-duahi dibana tauna ta e heniamu, e tomu “Ina na a duahia”, negana ai, ia na e tomu “Duahi-duahi asi dibagu”. 13 Bena Ḡaubada eto: Badina be ina bese taudia na mai udu-herevadia ida mo e rakahenigu kahimu, bona bibinadia amo mo e imodaigumu, a lalodia na dauhai; bona taunimanima edia haheḡani mo e abia dae kavamu dainai, idia ese lau garigu e garimu. 14 Taunabunai, lau ese hoa karadia badadia ma baina kara lou ina bese enai; hoa karadia, hoa bada karadia; bona edia aonega taudia edia aonega baine ore vaitani, bona edia lalo-parara taudia edia lalo-parara baine hehuni. 15 Edia hahealo na Iehova ena amo e hunia balahenimu taudia, madi ihabaidia! Edia kara dika na dibura ai e karamu, e tomu, Daika ese e itadamu? Daika ese e dibadamu? 16 Umui ese ḡau o karuhi hebubumu! Uro ikarana tauna na raro bae gwauraia a? E karaia ḡauna ese ikarana tauna baine herevalaia, baineto “Ia ese asine karagu”, a? Eiava oromana e henia ḡauna ese oromana ihenina tauna baine herevalaia, baineto “Ia na asi ena lalo-parara”, a? 17 Asi vanahana Lebanon na uma mai anina ai bainela; bona uma mai anina na imea bae gwauraia, ani? 18 Una dina ai, taia-kudima taudia ese buka herevadia bae kamonaidia, bona vaburadia bona diburadia amo matakepulu taudia matadia ese ḡau bae ita. 19 Manau taudia ese moale matamatana na Iehova enai bae abia; bona ogoḡami taudia ese Israel ena Helaḡa Diravana bae moalelaia bada. 20 Badina be asi edia hebogahisi taudia na bae baia, bona ḡonaḡona taudia na bae doko; bona kara dika ikaradia daladia e tahumu taudia iboudiai na bae negedia daure. 21 Idia ese hereva tamona amo tau ta na kerere tauna ai e halaoamu, bona hanua ikoukouna ai e hahemaoromu tauna na e idoaiamu, bona hereva asi anina amo kara maoromaoro tauna na e hakaua sirimu. 22 Taunabunai, Abraham e hamauria Diravana ese Iakob ena iduhu na ini e herevalaia tomamu: Iakob na basine hemarai lou; ia vairana na basine ḡeḡeva lou. 23 Badina be natuna, lau imagu ese e karadia taudia, na bogaraginai baine itadia negana ai, idia ese lau ladagu bae hahelaḡaia; Iakob ena Helaḡa Diravana bae hahelaḡaia, Israel ena Dirava magigina bae magigi. 24 Bena lalodia e kereremu taudia na lalodia do bae parara, bona e maumaumu taudia ese hahediba herevadia bae abi dae.