IOBU 32

1 Taunabunai unu tatau tatoiosi ese Iobu ihaere-henina e hadokoa, badina be ia na sibona maorona e gwaurai. 2 Bena Elihu Barakele, tau Busu, Ram iduhuna tauna, na e badu. Ia ese Iobu e badu henia, badina be ia sibona maorona e gwaurai, a Dirava maorona se gwaurai. 3 Ia ese danu Iobu turana tatoiosi e badu henidia, badina ena be Iobu na kererena e gwaurai to haere ta asie laloa davari. 4 Elihu na Iobu ihaere-henina ai e halahe, badina be idia na ereguna, a ia na eregabe. 5 A Elihu ese unu tatau tatoiosi e itadia, ududia ai na asi edia haere herevana ta; bena ia na e badu. 6 Bena Elihu Barakele, tau Busu, e hereva, eto: Lau na eregabe, a umui na ereguna. Una dainai kudougu e hetaha, bona egu lalo-hadai emui ai baina gwaurai hedinarai na na gari. 7 Nato “Dina momo bae hereva, bona laḡani momo ese aonega bae hahedibalai”. 8 A ḡau be tau ta laumana, Siahu-idoinai Diravana laḡana ia lalonai, ese ia lalona e hapararaiamu. 9 Aonega na dia ereguna taudia ediai, bona tatau burukadia na hereva maoromaorodia asi dibadia. 10 Taunabunai lau na tomamu: A hakala henigu; lau danu egu lalo-hadai mani aina gwauraia hedinarai. 11 A itaia, emui hereva na naridia; na hakala, emui aonega herevadia baina kamonai nato, ba gwaurai herevadia o tahudiava negana ai. 12 Na hakala henimui, bena na itaia, umui ta ese Iobu ena hereva se lao ahu, eiava ena hereva se haere henidia. 13 Metaira ba hereva, baoto: Ai na aonega vada a davaria; Dirava ese baine hadarerea, dia taunimanima ese. 14 Iena hereva matadia na dia lauegu ai, bona umui emui hereva amo basina haere henia. 15 Idia na e hemaraimu, asie haeremu; asi edia hereva ta. 16 Idia asie herevamu, e ginimu asi edia haere, una dainai lau do baina henari a? 17 Lau danu baina haere; lau danu egu lalo-hadai baina gwauraia; 18 badina be lau na hereva ai na honumu, bona lalogu ese e haduagumu. 19 A itaia, lalogu na vine ranuna asi ena lasi dalana na heto, eiava kopi matamatadia kahira-kahira be poumu na heto. 20 Do baina hereva, bena lalogu baine keru; bibinagu baina hapapaia, baina haere. 21 Lau na taunimanima ta enai basina tao, eiava tau ta basina hanamoa koikoi; 22 badina be hahenamo koikoi daladia na asi dibagu. Unu bama kara toma, ikaragu Diravana ese bema hamasegu haraḡa.