SALAMO 56

1 Dirava e, ame bogagu hisi, badina be taunimanima ese e moigu taomu, dina idoinai tuari taudia ese e daḡedaḡe henigumu. 2 Inaigu na dina idoinai e moigu taomu, hutuma ese e tuari henigumu mai heaḡidia ida. 3 Lau na garimu negadia ai na oi mo na abidadama henimumu. 4 Ena hereva na imodaiamu Diravana, Dirava mo na abidadama heniamu, asi egu gari; hidio na ede baine karagu toma? 5 Dina idoinai idia ese egu hereva e hagagevadiamu, edia lalo-hadai iboudiai na lau ihadikagu mo e laloamu. 6 Idia na e heboumu, e bani taomu, egu raka marere e itaia taomu. Egu mauri iabi-ohona totona vada e narigu heḡereḡerena, 7 edia kara dika davana unu ba henidia toma. Dirava e, bese idau-idau taudia na mai badumu ida ba tahodia dobi. 8 Egu loa eva-eva vada o hagaudia, irurumatagu na emu kavabu ai ba udadia; emu buka ai e miamu, ani? 9 Baina boiboi dinana ai, lau inaigu na ba haloudia. Ina na dibagu, Dirava na lau ida: 10 Dirava, ena hereva na imodaiamu Diravana; Iehova, ena hereva na imodaiamu Diravana. 11 Ia mo na abidadama heniamu, asi egu gari; taunimanima na ede bae karagu toma? 12 Dirava e, egu gwauhamata emu ai na anidia do baina kara; egu hehenamo bouboudia na oi baina henimu. 13 Badina be oi ese lau laumagu na mase amo vada o rauaia; oibe, aegu na hetutuhi amo vada o hamauria. Dirava vairanai baina raka totona, mauri diarina lalonai.