Mikunga 149

1 Aleluya! Beno yimbidila Yave mukunga ya malu-malu! Beno yimbidila yandi mikunga ya nzitusu na mukangu ya bantu ya kukwikama. 2 Bika ti Isayeli kuyangalala samu na Yave yina yidikaka yandi! Bika ti bana ya Siyone kuyangalala samu na ntinu ya bawu! 3 Bika ti bawu kembila Nkumbu ya yandi na mabina. Bika ti bawu kubula bangoma ya fyoti, bawu kusika nsambi samu na yandi. 4 Samu ti Yave ke lakisaka bumbote ya yandi na bantu ya yandi, yandi ke nungisaka bantu ya kukuluka na kupesa bawu mpulusu. 5 Bika ti bantu ya kukwikama kuyangalala na nkembo, bawu kusala milolo ya nsayi na zulu ya bamfulu ya bawu. 6 Bika ti nzitusu ya Nzambi kuvwanda na bayinwa ya bawu, bika ti mbele ya mvita, ya balweka zole, kuvwanda na maboko ya bawu! 7 Samu na kuvutula yimbi yina bayinsi ya nkaka salaka, mpe nsembolo samu na makanda ya bantu. 8 Samu na kukanga bantinu ya bawu na bampanga, mpe bantwadisi ya bawu na basinga ya bisengo, 9 samu na kufundisa bawu mutindu yawu kele ya kusonama! Ya kele nkembo ya nene samu na bantu nyonso yina kele ya kukwikama na Yave. Aleluya!