Mboe 114

1 Muŋgu zin Israel ta Yakop popoŋana kini na, tizem Aikuptu. Tizem zin wal ta tizzo kalŋan toro. 2 Indeeŋe tana, zin Yuda tiwe wal potomŋan ki Yooba. Zin Israel tiwe Yooba lene, mi ni ikamam peeze pizin. 3 Indeeŋe Tai Siŋsiŋŋana ire i na, iko ma ila lene. Mi yok Yordan ire i na, imiili ma ila, mi ipot ma imbotmbot. 4 Zin abal tiseŋeeŋe mi tilulu zin kembei ta mekmek. Mi lele mbukunbukun timorsop, mi tilulu zin kembei ta sipsip popoŋan. 5 O tai, nu tina ko pa so uunu i? Mi yok Yordan, parei ta nu miili ma la mi pot? 6 Mi niom abalabal mi lele mbukunbukun na, keseŋeeŋe mi kululu yom paso? 7 O toono, re u kek? Pa molo som, to Yooba imar. Iŋgi be Anutu ki Yakop iswe kat mburaana. 8 Ni ta ikam ma yok ipet pa pat mi irereere ma biibi. Mi ikam ma yok ipet pa raŋ, mi irereere ma isu.