Onger Akaba 53
PBT1 Gumazamizir onganiba uan navir averiabar aven nɨghnɨgha ghaze, “God itir puvatɨ.” Gumazamizir kaba me bar gumazamizir kurabara. Me bar moghɨra arazir aghuitam gamir puvatɨ. 2 God uan Nguibamɨn pɨn ikia nguazimɨn itir gumazamizibar gari, men tav ti nɨghnɨzir aghuim ikia a gɨfofoghasa a buri, ti puvatɨ. 3 Me bar tuavir aghuim ataki. Me bar moghɨra ikuvigha magh gari. Men tav arazir aghuitam bar a gamizir pu. Bar puvatɨ. 4 God kamaghɨn mɨgɨa ghaze, “Gumazamizir arazir kuram gamiba, nɨghnɨzir aghuitam men itir puvatɨ. Me bret apava anegevi moghɨn, me nan gumazamiziba a gefi. Egha me tong na ko mɨgeir puvatɨ." 5 Gumazamizir kamaghɨn amiba atiatir bar dafam me bativam. Fomɨra atiatir kamaghɨn garitam me batozir puvatɨ. Guizbangɨra, God bar uan gumazamizibar apanibar aghua. Me ariaghirezɨ, a men aghariba tintinibar da kavkɨnizɨ, da irezɨ, me bar aghumsɨki. Kamaghɨn, a bar me gafiragha gɨfa. 6 Kɨ kamaghɨn ifonge, Israelian akurvaghamin gumazitam Saionɨn nguibamɨn ikegh azenan izɨ. God uan gumazamizibar akuraghtɨ me deravɨra ikɨtɨ, Jekopɨn ovaviba bar akuegham. Guizbangɨra, Israelian naviba deragham.