ROOMAꞌ 9

1 Enang kara minkuampainung masikung, Karistooꞌkoo kuung oꞌnoi, nkaang onoue pankaruntoong-eta masikaꞌantamumaunge Tanuaang Meekunge kuung deemuioꞌ. 2 Tee kara eeꞌpinaꞌ: Ning bakei aaꞌnaꞌ orarunsimaramaung, nkaang domang-koo uatepa orakaꞌ deeꞌmomaꞌnomaung eeꞌkoo: Isireeli-nupoong domampariaꞌ otoromaung-koo. 3 Barakosiꞌmarama Karistooꞌketa tontaꞌmarapeuꞌnung-pinaꞌ noruꞌmaramaung teing mmarang niꞌninka narung ereng mooꞌariainaꞌ makosi deekoꞌ. 4 Teing Kumponing bakaning miruꞌuruꞌning, baurukaaꞌ deempuruꞌning eeꞌnoko bakaang meenasi avuruꞌning. Teing amutemuꞌke kara tampaꞌ naroompevuruꞌning eeꞌnoko avuruꞌ tee boto eeꞌnoko tee dootuuꞌ masikung; 5 Teinge nkavauꞌ tee Kumponing bakaang maramaraka, biikaang muuꞌ okoꞌbosi-nupoong biurukaaꞌ deemparira. Eeꞌnoko tee Domang-anta, Karistooꞌ tee biikanamuiaang-koonge, eeꞌnara Kumponing, ookara-koo dau basi deempari daangang-poꞌnung oꞌpaaꞌnaꞌ. Eeꞌ, masikung. 6 Kumponing bakaang maraka-anta teing-eta Isireeli-nupoong totoꞌpari otoing minkuampaꞌ niiꞌning Isireeli-nupoong mooꞌariaꞌ otoroining-koo, aiꞌ baruꞌ ookara Isireeli-nupoong Kumponinge miruꞌniiꞌnuka naing deeaꞌ. 7 Ooveriai: Eebaraamiꞌ baurukaaꞌ ookara miruꞌariaꞌ. Teing naing Kumponinge tampuruꞌning deekoꞌ, Daari Meekung-koo aaꞌpuuꞌnaꞌ, “Aisakeꞌ narung-eta doonko miruꞌniiꞌnuka tamparampaing.” (Pupuꞌ 21:12) 8 Miruꞌnooꞌ eeꞌ: Tamung monoi para-koo Kumponing baurukaaꞌ tampariarupeuꞌ, teka teeꞌ nariꞌ Kumponinge tampuuꞌnaꞌkoo miruꞌuma deekoꞌ baurukaaꞌ tamparipeuꞌ. 9 Aiꞌ Kumponinge marakavarama Eebaraamiꞌ Eekaaꞌ ninka beuring bataꞌuma eeꞌ tampuuꞌ, “Enanung batei-pinaꞌ daunamareꞌkoo tee ning toromaravaing eeꞌnoko Seeraꞌ eeꞌnani tee enang bauring-poꞌnani deemparavaing.” (Pupuꞌ 18:10,14) Teketaꞌ tee narung-koo miruꞌuuꞌnaꞌ bera Aisakeꞌ pontoꞌaruꞌ. 10 Eeꞌnoko napoꞌ damaꞌke Kumponinge niiꞌning naing miruꞌurimanaꞌ siraꞌpuuꞌ tenang Rebekaꞌ kempoꞌkui otoko pauroonka nkavuresitaaꞌ tee ninka baꞌung niikaaka Aisakeꞌ ninka. 11 Bane tee keꞌde-koo otoresi pontoꞌareaꞌ, kapooꞌ orara eeꞌnoko tampara-pinaꞌ oroꞌ nkovureaꞌ, Kumponinge teni-koo eeꞌ tampuuꞌ, “Bataata baaraꞌmaꞌnung-koo boong otoaing.” (Pupuꞌ 25:23) 13 Niiꞌnooꞌ napoꞌ eeꞌ daariari otong Kumponinge temainta minkuvuretuꞌnaꞌ, “Jeekopiꞌ tee ninge piaavansi otong, eeꞌnoko Iiso munteꞌansi otong.” (Malakai 1:2,3) Teeꞌ nkoaruꞌ Kumponinge nantoong miruꞌurimanaꞌ tasiꞌanta-koo; nko-nkoi deeaꞌ, bokue narunge. 14 Enang ee eeꞌ noruꞌampiiꞌnaang: Kumponing koontoꞌ deeaꞌ ookamainta nariꞌ nkovurearuuꞌnung-koo? Bakei makotuaꞌ. 15 Moosesi nauvuma eeꞌ minkuvuuꞌ, “Ninge tee naning tampaꞌ nkoampaing deekoꞌ tampaꞌ nkoampaing, eeꞌnoko tee naning piaavampaing deekoꞌ piaavampainge.” (Toro 33:19) 16 Enang tee Kumponing bakaang miruꞌ eeꞌ oroꞌpari otong: Naning bakaang piai deeaꞌ, bakaang nko-nkoi deeaꞌ, teka Kumponing bakaang piaa-koo narung-koo deekoꞌ makosi. 17 Niiꞌnooꞌka napoꞌ Daari Meekunge Moosesie daarivuuꞌnung-koo Kumponinge tee daurarong˜ Peeroꞌ turampuarura eeꞌ nauvuuꞌ, “Ninge tee daꞌ donkong-antaransinung daꞌkoo nkaang iriꞌ oroꞌparaaꞌnaang ning nkaang miring noruꞌaavainaꞌ ookara kansiꞌkoo.” (Toro 9:16) 18 Teeꞌ minkuvuioꞌ aaꞌpamaang: Naning tee Kumponinge baka piaavuaing deekoꞌ piaavuaing. Eeꞌnoko napoꞌ baa naning piaavuaru-peuꞌnung deekoꞌ konte-antavuma sipuaing makosi. 19 Diiꞌkoo narunge Peeroꞌpinaꞌ noruꞌdarama eeꞌ tanaꞌmepeuꞌ deeꞌma: Kumponinge aming-koo turang nkovumaang piavomanaꞌ nariꞌ nkomarako? Baie dimpaꞌupeuꞌ bakaang miruꞌ? 20 Nka baie daꞌ Kumponing makuꞌepeuꞌnung kansiꞌketa? Utaue ee tee naning taꞌnampumaung karavuma aaꞌpupeuꞌ: Dake ning aming-koo eeꞌ taꞌnamemaang? 21 Arekeeꞌ? Tee naning ee utau taꞌnampumaung makosi deeaꞌ bakaang mataue utau taꞌnang-koo? Nau-koo kansiꞌnu-koo aaꞌnopeuꞌ: Nameng-eta neraniiꞌnareng taꞌnampupeuꞌ eeꞌnoko niiꞌnameng-eta tamunsiꞌnareng taꞌnampupeuꞌ. 22 Kumponinge bakaang iira siraꞌanta-koo piavoi otong eeꞌnoko tenang ookara nantoonge ooaavaing bakaang purintoꞌ. Teing nantoong orara mooꞌ nka-koo miruꞌniiꞌnuka teroita maamuariri otoromaung orari-anta-koo, teka enang Kumponinge makenge nempuri otong orari-antavuriaꞌ. 23 Aming-koo, nnaꞌ bakaang meenasi pankaing tasiꞌanta-koo piavoi otong teing-koo nantoong bakaang piaa nka-koo miruꞌuruꞌning-koo, teroita maamu-antavuruꞌning bakaang meenasi nariꞌ kong-koo. 24 Tee-pinaꞌ niiꞌ bokumuruꞌning, Juꞌnupoong naing-eta deeaꞌ, eeꞌnoko Juꞌdeeaing-kooning nariꞌ ookara-ita. 25 Tee-pinaꞌ Kumponinge minkuvuko Oseaꞌke daarivuuꞌnaꞌ Daari Meekung-koo, “Nantoong nkaning deeaing tee nkaning tamparampaing. Eeꞌnoko teni ninge piaavampaꞌnani teni ninge piaavampaing.” (Osea 2:23) Eeꞌnoko 26 “Teka ninge aaꞌpantuꞌnooꞌka, ‘Teing nkaning nantoong deeaing,’ teke tee nantoong damaꞌke Kumponing domantooꞌ baurukaaꞌ deemparira miring kompaavaing.” (Osea 1:10) 27 Napoꞌ Aisaiaꞌke eeꞌ minkuvuuꞌ Isireeli-nupoong-koo, “Ooveriai, Isireeli-nupoong biurukaaꞌkoong deeru tee piisiꞌ pirung-koo makosi, nka tee teing-koo mmauꞌ keraꞌpariko okiꞌning naing otoroi domampariaing. 28 Bakei iriꞌnarumpui Ovoringe nkovuaing kansiꞌkoo tee kapooꞌ nkovuuꞌnaang tampuuꞌnung.” (Aisaiaꞌ 10:22,23) 29 Teeꞌ nariꞌ Aisaiaꞌke minkuvuuꞌnaꞌ temuꞌnavarang-koo eeꞌpinaꞌ, “Ovoringe paning-koonge niurukaaꞌkoo duukung sipuarui dei niiꞌ tee teing-pinaꞌ osi Sodom eeꞌnoko Komoraꞌ nkomaripeuꞌ ntaꞌke opuruꞌning-pinaꞌ.” (Aisaiaꞌ 1:9) 30 Tee-koong miruꞌnooꞌ eeꞌ oroꞌ: Teing Isireeli-nupoong deeainge koontoꞌnuka deempariiꞌnaang paaravariarukoꞌninge miring koontoꞌnuka tampuriainavung peꞌnumpaara tampaꞌ okovorouꞌ masikaꞌanta ninka. 31 Teka Isireeli-nupoong bane koontoꞌnuka deempariiꞌnaang paaravarikoꞌ botoi tampui otoinaꞌ, kaariꞌariruꞌ. 32 Aming-koo kaariꞌariruꞌ? Nnaꞌ Kumponing-koong duta-koo koontoꞌ otoꞌ tee kapooꞌ bamuruꞌnung-pinaꞌ masikaꞌantavaavaꞌ besiꞌaama, aaꞌpaama, “Moosesi-nung boto tampaꞌ tareampiko deekoꞌ makosi;" 33 Teeꞌkoo tupampariruꞌ tereꞌkoo Kumponinge tero minkuvuuꞌnaꞌ Daari Meekung-koo, eeꞌpinaꞌ, “Ooveriaing, ninge bempampaing tereꞌ manto-nareꞌ diiꞌkoo meuꞌ Saioni-namono-koo, nantoong tereꞌkoo tupamparira tee puꞌariaing. Nka tee naning tee masikaꞌantavuaing tee sirakuraꞌ oko-antavampaing tee biraanke.” (Aisaiaꞌ 8:14; 28:16)