SALMOS 61

1 NoTeco Dios, techtacaquili quema nimitztzajtzilía. Techtacaquili quema nimotatajtía. 2 Masque niitztosquía campa hueli o hasta campa ontantoc taltipacti, na nimitztzajtzilisquía para nimitztajtanis motapalehuil. Quema nimajmahui o nimotequipachohua, techyacana huan techtatía ipan se huejcapantic tet, campa amo teno huelis nechajsis. 3 Pampa san ipan ta nimotemachía para amo teno nopantis. Ta tiitztoc quej se huejcapantic cali cati nechmanahuía, para amo huelis nechajsise nocualancaitacahua. 4 Nijnequi niitztos para nochipa ipan motiopa para techmocuitahuis. Nopona niitztos temachti quej se pilpiyotzi cati itztoc ieltapaltzala inana. 5 Ta tinoTeco Dios, tijcactoc cati nimitztajtolcahuilijtoc para nijchihuas. Huan techmacatoc nopa tatiochihualisti cati ticajoctoc para tiquinmacas masehualme cati mitzimacasij huan mitztepanitaj. 6 Xijchihuas para na nitanahuatijquet ma niitzto miyac xihuit, huan para nonemilis ma eli cuajcualtzi. 7 Techcahuili ma nitanahuatis moixpa para nochipa. Techmanahui huan techmocuitahui ica motaicnelijcayo. 8 Quej nopa nimitzhuicatis huan nimitzpaquilismacas mojmosta. Quena, sesen tonal nijtamichihuas cati nimitztencahuilijtoc para nijchihuas para ta.