SALMOS 70

1 ¡NoTeco Dios, xihuala techmanahuiqui ininmaco nocualancaitacahua! ¡Quena, ximoisihuilti, Toteco Dios! ¡Xihuala techpalehuiqui! 2 Inijuanti nentinemij notepotzco huan paquij quema nechtlaijiyohuiltíaj. Yeca nimitztlajtlanía xiquinpinahualti, huan xiquincuepalti para ayacmo ma nechchihuilica catli fiero. 3 Xiquincuepa ica pinahualistli huan ayacmo xiquincahuili ma nechpinajtica. 4 Pero nochi masehualme catli mitztemohuaj, xiquinmaca miyac paquilistli. Nochi catli paquij pampa tiquinmaquixtijtoc, ma quiijtoca: “Ma tijhueyitlalica Toteco Dios." 5 Pero na catli tlahuel nitlaijiyohuía, nimitztlajtlanía xihuala nimantzi huan techmanahuiqui, pampa san ta hueli techpalehuis huan techmaquixtis. ¡NoTeco Dios, amo xihuejcahua!