MELKAHKA KAN 2

1 Dahme wehi kan koasoakoasone re en ketiwohkihla? Dahme aramas akan wiewiahki arail koasoandi so-katepe? 2 Ar nanmwarki kan kahngohdilahr; ar kaun akan koasoakoasone nanpwungarail re en uhwong KAUN-O oh pil uhwong sapwellime nanmwarki me e ketin piladahr. 3 Re ahpw nda, “Kitail kasaledengkitailla sang pahn ara kosonned, oh keseweisang kitail ara manaman." 4 KAUN-O ahpw ketin kiparamat sang nan mwoale nanleng, oh ketin kumwuski arail koasoandi kan. 5 Ih eri ketin engiengda oh mahseniong irail, oh kamasangkinirailda sapwellime engieng. 6 E ketin mahsanih, “I kasapwiladahr nei nanmwarki pohn ei dohl sarawio Saion." 7 Nanmwarkio ahpw mahsanih, “I pahn kasalehda dahme KAUN-O ketin mahsanih. KAUN-O mahsanihong ie: ‘Kowe nei pwutak; rahnwet I wialahr semomw. 8 Peki rehi, a I pahn kihong uhk wehi kan koaros; oh ke pahn limankihla sampah pwon. 9 Ke pahn kauwehkinirailla sokon mete; ke pahn kamwereirailpeseng duwehte omw kin pwalangpeseng dahl pleit.’" 10 Eri, kumwail nanmwarki kan, kumwail rong ie; kumwail kaunen sampah kan, kumwail rong duwen met: 11 Kumwail papah KAUN-O ni lammwin; kumwail rerrer 12 oh poaridihsang; pwe e dehr ketin mwadang engiengda, oh kumwail pahn mwadangete mehkihla. Meid pai irail koaros me kin wiahki KAUN-O sileparail.