MELKAHKA KAN 29

1 Kapinga KAUN-O, kumwail sapwellimen Koht kan me pato pahnlahng; kumwail kapinga sapwellime lingan oh manaman. 2 Kumwail kapinga mwar lingaling en KAUN-O; kumwail poaridihsang Me Sarawio ni eh pahn ketin pwarodo. 3 Kapitien KAUN-O peipeido sang pohn pihl akan; Koht lingaling wie ngirisek rasehng nansapwe, kapitie ikiparpesengehr pohn madau. 4 Kapitien KAUN-O me manaman. Kapitien KAUN-O me diren roson. 5 Kapitien KAUN-O kin karaukehdi tuhke sidar kan, oh pil tuhke sidar kan en Lepanon. 6 E ketin kalusseli nahna kan en Lepanon rasehng koupwul kan oh kalus nahna Ermon rasehng kouwol pwulopwul men. 7 Kapitien KAUN-O kin kahrehda lioal eh kin piripir. 8 Kapitie kin kahrehda rerrer en nan sapwtehn; e kin itikada sapwtehn en Kades. 9 Kapitien KAUN-O kin itikada tuhke lap akan en nanwel, oh kin kamwerehsang tehn tuhke kan, nindokon aramas koaros me pato nan Tehnpaso kin weriwerki, “Kaping ong Koht!" 10 KAUN-O kin ketin kakaun pihl loal akan; e kin ketin kakaun nin duwen nanmwarki men kohkohlahte. 11 KAUN-O kin ketin kakehlahda sapwellime aramas akan oh kupwuramwahwih kin irail popohl.