ISAÍAS 18

¹ ¡Ay imanöraj canga Etiopía nasyuncho caycaj mayucunapita mas washacho caycajcuna! Chay nasyunchöga aypalla chinrascunami inririycan.

² Gamcunaga ututupita rurasha büquicunawanmi Nilo mayunpa cachata cacharcaycanqui. Cacha aywaycajcuna fiyupa cörrishpayqui ayway jatuncaray llushwaypa-llushwaycaj runacunaman, may-chay nasyun runacunapis manchacushan runacunaman. Chay runacunaga fiyupa callpasapami, jinyumi. Nasyunninpis aypalla mayucunapa chaupillanchömi.

³ Llapayquimi, intëru munducho tiyajcunaga ricanquipaj puntacho señalta churamushanta. Llapayquimi wiyanquipaj trompëta wagamushantapis.

⁴ Tayta Dios caynömi nimaran: «Shuyashpä syëlupitami ricapäshaj usya captin alli shanashan wichan, cosëcha captin shullay pucutay llanturashan wichanpis.»

⁵ Manaräpis übas cosëcha captin waytan shicwarcuptin micuynin mullcuycaptinna Tayta Dios rämancunata cuchilluwan rämanga. Cuchurcur juc-läman witichenga.

⁶ Chay witichishancunaga jircachömi mashtaraycar quëdanga. Usya wichanga aycha micoj äbicunami micuconga. Tamya wichannami chucaru jirca animalcuna micuconga.

⁷ Chay wichanga jatuncaray llushwaypa-llushwaycaj, may-chay nasyun manchacushan runacunapis, fiyupa callpasapa munayniyoj runacunami y nasyunninpis aypalla mayucunapa chaupillancho caycaj runacunami munayniyoj Tayta Diospaj ofrendancunata apamonga. Sión lömamanmi garayninta apamonga. Chay jircachömi munayniyoj Tayta Diosta aduranga.