SALMOS 36

¹ Juchasapacunaga yarpan imanöpapis mana allita rurayllatami. Manami imaypis yarpanchu Tayta Diosta manchacuytaga.

² Paycunaga yarpan waquinpita mas alli caycashanta. Mana allita rurarpis manami imatapis gocunchu.

³ Paycunaga mana allita parlajllami, llullacojmi. Yarpaynin mana captinnami allitaga mana rurannachu.

⁴ Cämanchöpis yarpaycan mana allita rurayllatana. Llutan nänicho purejnöllami purircaycan. Mana alli ruraytaga manami cachaycunchu.

⁵ Tayta Dios, cuyacoj cashayquimi ichanga syëlucama chayan. Alli cumlej cashayquega pucutaypita mas janajcamami chayan.

⁶ Alli arriglaj cashayquega altunnin puntacunanömi. Imano cananpaj nishayquipis jatun lamarno rurimi. Tayta Dios, gammi ricaycanqui runacunata, animalcunatapis.

⁷ Tayta Dios, gamga fiyupa cuyacojmi canqui. Runacunaga älayqui rurinmanmi pacacuyta ashircaycan.

⁸ Wasiquicho aypalla micuy captinmi llapanpis sacsan. Gamga yacutapis upuchinqui mishquej mayupitami.

⁹ Yacu pashtamoj-jinami gamlla pï-maytapis cawachinqui. Gam alli ricaptiquimi pï-maypis alli cawan.

¹⁰ Gamman yäracamojcunata, alli runacunataga cuyapaycuy, alli ricaycuy.

¹¹ Ama camacächiychu munayniyoj-tucojcuna lluchcacamänanta, mana alli runacunapa maquinman chayanätapis.

¹² Masqui ricay chay fiyu runacunata. Cananga mana allimanmi chayasha carcaycan. Chaypitaga mananami llojshenganachu.