ؤُفُّوغْ 15

1 ڒخْذنِّي إِزهّذْ مُوسَا جْمِيعْ أَكْ-ذ أَيْثْ ن إِسْرَائِيل زْهِيذْ-أَ إِ سِيذِي، نَّانْ: “أَذْ زهّْذغْ إِ سِيذِي، مِينْزِي نتَّا يُوعْڒَا ذِي ڒُوعْڒَا! أَيِيسْ ذ ونِّي خَاسْ ينْيِينْ إِنْضَارْ إِ-ثنْ ذِي ڒبْحَارْ. 2 سِيذِي ذ جّهْذْ إِنُو ذ أَزهّذْ إِنُو. نتَّا إِذْوڒْ ذ أَسنْجمْ إِنُو. وَا ذ أَربِّي إِنُو، نشّْ أَذْ ث سّمْغَارغْ. نتَّا ذ أَربِّي ن بَابَا، نشّْ أَذْ ث سّْعُودْجغْ! 3 سِيذِي ذ أَرْيَازْ ن ؤُمنْغِي، سِيذِي ذ إِسمْ نّسْ! 4 إِكَارُّوثنْ ن فِيرْعُونْ ذ ڒْعسْكَارْ نّسْ إِنْضَارْ إِ-ثنْ ذِي ڒبْحَارْ ؤُ أَشوَّارْ ن إِنغْرَافنْ نّسْ ن ڒْعسْكَارْ غَارْقنْ ذِي ڒبْحَارْ ن ثلْڭَا. 5 أَمَانْ إِهوْڒنْ ذْڒِينْ إِ-ثنْ. أَمشْنَاوْ أَژْرُو، هْوَانْ غَارْ ڒَادْجَاغْ. 6 أَ سِيذِي، أَفُوسْ أَفُوسِي نّشْ إِتّْوَاعزّْ س جّهْذْ، أَفُوسْ أَفُوسِي نّشْ، أَ سِيذِي، أَقَا إِڒْبزْ ڒعْذُو. 7 س ڒمْغَارثْ ن ؤُعُودْجِي نّشْ ثثحِّيذْ إِنِّي كِيكْ إِتّمْعَاڒَانْ. مَاڒَا ثسّكّذْ ڒْحَاذُوقْ ن وغْضَابْ نّشْ، أَذْ ثنْ يشّْ وَانِيثَا أَمشْنَاوْ إِغدْجْ. 8 س ؤُسُوضِي ن ونْزَارنْ نّشْ عُورّْشنْ وَامَانْ، تّْوَاسّْبدّنْ ثْسدْجْيَا أَمْ وغْبَارْ، أَمَانْ إِهوْڒنْ جمْذنْ ذِي ڒْوسْطْ ن ڒبْحَارْ. 9 إِنَّا ڒعْذُو: ‘أَذْ ثنْ أَرذْفغْ، أَذْ ثنْ عْذُوغْ، أَذْ بْضِيغْ ڒْمُورْ، ڒعْمَارْ إِنُو أَذْ زَّايْسنْ إِجِّيونْ، أَذْ د-جبْذغْ سِّيفْ إِنُو، أَفُوسْ إِنُو أَذْ زَّايْسنْ إِكّسْ ڒْوَارْثْ نْسنْ.’ 10 ثْسُوضذْ س نّفْسْ نّشْ ؤُشَا إِذڒْ إِ-ثنْ ڒبْحَارْ. نِيثْنِي هْوَانْ-د أَمْ ڒخْفِيفْ ذڭْ وَامَانْ إِمْغَارنْ. 11 أَ سِيذِي، مَانْ ونْ إِ إِدْجَانْ أَمْ شكْ جَارْ إِربِّيثنْ؟ وِي إِدْجَانْ أَمْ شكْ، ذ ونِّي إِتّْوَاسّْعُودْجنْ ذِي ثْقدَّاسْثْ، أَمْوقَّارْ ذڭْ إِزْڒَانْ ن ؤُصبّحْ، مَانْ ونْ إِتّڭّنْ ڒعْجَايبْ أَمْ شكْ؟ 12 ثسّْوِيژّْضذْ أَفُوسْ أَفُوسِي نّشْ، ثْسَارْضْ إِ-ثنْ ثمُّورْثْ. 13 شكْ ثْڭوّْذذْ ڒْڭنْسْ-أَ س ثْمخْسِيوْثْ نّشْ إِشُووَّارنْ، أَقَا ثفْذِيذْ ث، س جّهْذْ نّشْ ثْنذْهذْ ثنْ غَارْ ثْزذِّيغْثْ إِقدّْسنْ نّشْ. 14 ڒڭْنُوسْ سْڒِينْ خْ ؤُيَا ؤُشَا أَرْجِيجنْ. ثطّفْ ثڭّْوُوذِي ذڭْ إِمزْذَاغْ ن فِيلِيشِيثْ. 15 ڒخْذنِّي إِمقّْرَاننْ ن ثْقبَّاڒْ ن إِذُومْ تّْبهْثنْ، إِنِّي غَارْ ثدْجَا صُّولْطَا ذِي مُوآبَ تَّارْجِيجنْ، ؤُ مَارَّا إِمزْذَاغْ ن كنْعَانْ أَقَا فسْينْ! 16 ثوْضَا خَاسنْ ڒْعُورّثْ ذ ثِيڭّْوُوذِي. س ڒمْغَارثْ ن ؤُغِيڒْ نّشْ سغْذنْ أَمْ وژْرُو، أَڒَامِي إِژْوَا ڒْڭنْسْ نّشْ، أَ سِيذِي، أَڒَامِي إِژْوَا ڒْڭنْسْ-أَ إِ ثْكسْبذْ إِ يِيخفْ نّشْ. 17 شكْ أَذْ ثنْ ثْنذْهذْ ؤُشَا أَذْ ثنْ ثژُّوذْ خْ وذْرَارْ ن ڒْوَارْثْ نّشْ، أَمْشَانْ إِ ثڭِّيذْ ذ ثَازذِّيغْثْ نّشْ، أَ سِيذِي، زَّاوشْثْ إِقدّْسنْ إِ إِڭِّينْ إِفَاسّنْ نّشْ، أَ سِيذِي إِنُو. 18 سِيذِي أَذْ إِحْكمْ إِ ڒبْذَا قَاعْ! 19 مِينْزِي أَيِيسْ ن فِيرْعُونْ يُوذفْ غَارْ ڒبْحَارْ س إِكَارُّوثنْ نّسْ ذ إِمْنَاينْ نّسْ ؤُشَا إِقْڒبْ خَاسنْ سِيذِي عَاوذْ أَمَانْ ن ڒبْحَارْ. مَاشَا أَيْثْ ن إِسْرَائِيل ژْوَانْ خْ ڒَاژَاغْ ذِي ڒْوسْطْ ن ڒبْحَارْ." 20 ؤُ مَارْيَامْ، ثَانَابِيثْ، ؤُتْشْمَاسْ ن هَارُونْ، ثكْسِي أَدْجُونْ ذڭْ ؤُفُوسْ نّسْ ؤُ مَارَّا ثِيمطَّا فّْغنْثْ أَوَارْنِي أَسْ س إِبنْذِيرنْ ذ شّْضِيحْ س نُّوبْثَاثْ. 21 خنِّي ثَارَّا-د خَاسنْ مَارْيَامْ سْنُّوبثْ نّسْ: “غنّْجمْ إِ سِيذِي، مِينْزِي أَقَا نتَّا يُوعْڒَانْ أَطَّاسْ! إِنْضَارْ أَيِيسْ أَكْ-ذ ونِّي خَاسْ ينْيِينْ ذِي ڒبْحَارْ." 22 خنِّي إِجَّا مُوسَا ڒْْڭنْسْ ن إِسْرَائِيل أَذْ إِفْسِي إِقِيضَانْ نْسنْ، إِنِّي إِدْجَانْ خْ ثْمَا ن ڒبْحَارْ ن ثلْڭَا، ؤُشَا رُوحنْ ذِي ڒخْڒَا ن شُورْ، ؤُيُورنْ ثْڒَاثَا ن وُوسَّانْ ذِي ڒخْڒَا بْڒَا أَذْ أَفنْ أَمَانْ. 23 ؤُشَا إِوْضنْ غَارْ مَارَا، مَاشَا وَارْ زمَّارنْ أَذْ سْونْ أَمَانْ ن مَارَا، مِينْزِي ثُوغَا أَثنْ ذ إِمرْزَاڭنْ. خْ ؤُيَا ڭِّينْ أَسْ إِ ومْشَانْ نِّي ‘مَارَا’. 24 إِنّذْقمْ ڒْڭنْسْ خْ مُوسَا، إِنَّا: “مِينْ غَا نْسُو؟" 25 نتَّا إِڒَاغَا إِ سِيذِي ؤُشَا سِيذِي إِمّڒْ أَسْ إِجّْ ن ؤُكشُّوضْ ؤُشَا إِنْضَارْ إِ-ث ذَاخڒْ ذڭْ وَامَانْ ؤُشَا ذوْڒنْ وَامَانْ ذ إِمِيژِيذنْ. ذِينْ إِ ذ أَسْ إِڭَّا إِ ڒْڭنْسْ إِشْثْ ن ثوْصيّثْ ذ إِشْثْ ن لْفَارِيضَا ؤُ ذِينِّي إِ-ثنْ إِقدْجبْ. 26 إِنَّا: “مَاڒَا ثسْڒِيذْ مْلِيحْ إِ وَاوَاڒْ ن سِيذِي، أَربِّي نّشْ، ثڭِّيذْ مِينْ إِدْجَانْ نِيشَانْ ذِي ثِيطَّاوِينْ نّسْ، أَذْ ثسْڒذْ إِ ڒُومَارَاثْ نّسْ، أَذْ ثحْضِيذْ مَارَّا ثِيوصَّا نّسْ، خنِّي نشّْ وَارْ ذ أَومْ-د سّكِّيغْ ڒهْڒَاشْ إِ د-سّكّغْ خْ مِيصْرَا، مِينْزِي نشّْ ذ سِيذِي، أَمسْڭنْفِي نّشْ!" 27 ڒخْذنِّي إِوْضنْ غَارْ إِلِيمْ، مَانِي ثُوغَا ثنْعَاشْ ن ڒْعُونْصَارَاثْ ن وَامَانْ، ذ سبْعِينْ ن ثْشجُّورَا ن ثِينِي ؤُشَا وْثِينْ إِقِيضَانْ نْسنْ ذِينِّي زَّاثْ إِ وَامَانْ.