إِشَاعْيَا 25

1 “أَ سِيذِي، شكْ ذ أَربِّي إِنُو، نشّْ أَذْ شكْ سّْعُودْجغْ، أَذْ صبّْحغْ إِسمْ نّشْ، مَاغَارْ شكْ ثڭِّيذْ ڒعْجبْ، أَطَّاسْ ن شّْوَارْ نّشْ زڭْ وشْحَاڒْ ؤُيَا، أَقَا-ث ذ ثِيذتّْ ؤُ ذَايسْ ڒَامَانْ. 2 شكْ ثَارِّيذْ ثَانْذِينْثْ ذ أَعُورِّيشْ ن يژْرَا، ثَانْذِينْثْ إِتّْوَاسّْجهْذنْ ذ ڒْخِيرْبثْ، ڒقْصَارْ ن إِبَارَّانِييّنْ ذِي ثَانْذِينْثْ، وَارْ ث سّْبذِّينْعمَّارْصْ عَاوذْ. 3 خْ ؤُيَا أَذْ شكْ إِسّْعُودْجْ إِجّْ ن ڒْڭنْسْ إِجْهذْ، ثَانْذِينْثْ ن ڒڭْنُوسْ إِقسْحنْ أَطَّاسْ أَذْ زَّايكْ ثڭّْوذْ. 4 مَاغَارْ ثُوغَا شكْ ذ لْقلْعَا إِ ؤُمَارْخُو، ذ لْقلْعَا إِ ؤُمزْڒُوضْ خْمِي إِتّْنحْصَارْ، شكْ ذ أَذُورِّي إِ ونْژَارْ إِشَّاثنْ، ؤُڒَا ذ ثِيڒِي ذِي ڒحْمُو مِينْزِي لْحَارَاجْ ن أَيْثْ ن بُو-ڒخْشُونشْثْ أَقَا-ث أَمْ ونْژَارْ إِشَّاثنْ خْ ڒْحِيضْ. 5 أَمْ ڒحْمُو ذڭْ إِجّْ ن ومْشَانْ يُوژغْ، أَمُّو إِ غَا ثسّغْذذْ لْحَارَاجْ ن إِبَارَّانِييّنْ، أَمْ ثِيڒِي ن ؤُسيْنُو ثسّسْمِيضْ ڒهْمُو، أَمُّو إِ غَا إِتّْوَاسّغْذْ إِزْڒِي ن أَيْثْ ن بُو-ڒخْشُونشْثْ." 6 “سِيذِي ن ڒْعسْكَارَاثْ أَذْ إِسّوْجذْ خْ وذْرَارْ-أَ إِشْثْ ن زَّارْذثْ س مَاشَّا ثشُّورْ س ثَاذُونْثْ خْ وذْرَارْ-أَ إِ مَارَّا رڭْنُوسْ، إِشْثْ ن زَّارْذثْ س بِينُو إِصبْحنْ قَاعْ، س إِشْثْ ن مَاشَّا ثشُّورْ س ثَاذُونْثْ ذ وَاذُوفْ، س بِينُو إِصبْحنْ إِصْفَانْ. 7 نتَّا أَذْ إِبطّڒْ خْ وذْرَارْ-أَ أَڒحَّافْ إِ زِي تّْڒحَّافنْ مَارَّا ڒڭْنُوسْ ؤُڒَا ذ دُّورِي إِ زِي تّْوَاسّْذُورُّوينْ مَارَّا ڒڭْنُوسْ. 8 نتَّا أَذْ إِسَارْضْ ڒْموْثْ إِ ڒبْذَا ؤُشَا سِيذِي إِنُو، سِيذِي، أَذْ إِمْسحْ إِمطَّاونْ زِي مَارَّا إِغمْبَابْ، أَذْ إِكّسْ ڒفْضِيحثْ ن ڒْڭنْسْ نّسْ زِي مَارَّا ثَامُّورْثْ، مَاغَارْ أَمُّو إِ إِنَّا سِيذِي." 9 “ذڭْ وَاسّْ نِّي أَذْ إِنِينْ: ‘أَقَا ذَا، وَا ذ أَربِّي نّغْ، خَاسْ إِ نڭَّا أَسِيثمْ نّغْ ؤُ نتَّا أَذْ أَنغْ إِسّنْجمْ. وَا ذ سِيذِي نِّي خْ نڭَّا أَسِيثمْ نّغْ، أَذْ نسْڒِيوْڒوْ، أَذْ نْفَارْحْ خْ ؤُسنْجمْ نّسْ!’ 10 مَاغَارْ أَفُوسْ ن سِيذِي أَذْ يَارْسْ خْ وذْرَارْ-أَ، مَاشَا مُوآبَ أَذْ إِتّْوَادّزْ ذِي ثمُّورْثْ نّسْ، أَمْ مَامّشْ إِتّْوَادّزْ ؤُڒُومْ، أَذْ إِذْوڒْ ذ ثَازُوبَاشْثْ. 11 مُوآبَ أَذْ ذَايسْ إِبزّعْ س إِفَاسّنْ نّسْ، أَمْ ؤُفتَّاحْ ذڭْ وفْثَاحْ. أَربِّي أَذْ إِسَّاضَارْ نّْفَاخثْ نّسْ جْمِيعْ أَكْ-ذ مَارَّا مِينْ إِزمَّارْ أَذْ إِڭّْ س ثحْرَايْمشْثْ ن إِفَاسّنْ نّسْ. 12 نتَّا أَذْ إِهْذمْ لْبُورْجْ ن إِغبْڒَاونْ نّشْ يُوعْڒَانْ، أَذْ ثنْ إِسّهْوَا، أَذْ ثنْ إِمّنْضَارْ غَارْ ثمُّورْثْ، ذڭْ ؤُشَاڒْ."