مِيخَا 7

1 “ؤُشْثْ إِنُو، مَاغَارْ أَقَا أَيِي غَارِي أَمشْنَاوْ غَارْ ثْميْرَا ن ثِينِي ن ؤُنبْذُو، أَمشْنَاوْ غَارْ ثْوَاڒَا وِيسّْ ثْنَاينْ ن وڒْقَاضْ ن ؤُضِيڒْ: وَارْ ذِينْ ؤُڒَا ذ إِجّْ ن ؤُزكُّونْ ن ؤُضِيڒْ إِ مَاشَّا، وَارْ ذِينْ إِدْجِي ؤُڒَا ذ إِجّْ ن ڒْبَاشُورْ قْبڒْ ڒْوقْثْ إِ ذَايسْ مژْرِي ڒعْمَارْ إِنُو. 2 أَمدُّوكَّاڒْ إِ ذَايسْ ثَامخْسِيوْثْ إِشوَّارنْ وَارْ إِقِّيمْ ذِي ثمُّورْثْ، ؤُشَا وَارْ ذِينْ ؤُڒَا ذ إِجّْ ن ؤُصبْحَانْ جَارْ إِوْذَانْ. نِيثْنِي مَارَّا تّْحَامَانْ خْ إِذَامّنْ، إِجّنْ إِيمَّارْ ونّغْنِي س ثْرَاشَّا. 3 إِفَاسّنْ نْسنْ وجْذنْ س ثْنَاينْ مَاحنْذْ أَذْ ڭّنْ ڒْغَارْ. ڒْحَاكمْ إِتَّارْ ؤُ ڒْقَاضِي إِتّڭّْ إِ-ت ذِي طّْوعْ ن ؤُخدْجصْ، ؤُ ونِّي أَمقّْرَانْ إِسَّاوَاڒْ عْلَاحْسَابْ مژْرِي أَعفَّانْ ن ڒعْمَارْ نّسْ ؤُ أَمُّو إِ سّْفَارْغنْ نِيثْنِي ثَامسْڒَاشْثْ. 4 ونِّي زَّايْسنْ ذ أَصبْحَانْ أَطَّاسْ أَقَا-ث أَمْ يِيجّْ ن شْبَارْقْ ن إِسنَّاننْ، ونِّي ذ أَصْذِيقْ ن وُوڒْ قَاعْ زَّايْسنْ أَقَا-ث مَاهُو خْ إِجّْ ن وفْرَايْ ن شْبَارْقْ أَكْ-ذ إِسنَّاننْ. أَسّْ ن إِعسَّاسنْ نّشْ، أَسّْ ن ؤُخدْجصْ، يُوسَا-د. ڒخُّو أَذْ نْخڒْعنْ.” مِيخَا أَذْ إِرَاجَا أَسنْجمْ ن أَربِّي 5 “وَارْ ثُومِينذْ ذڭْ إِجّْ ن ؤُمدُّوكّڒْ، وَارْ ثتّشْڒذْ خْ ؤُمدُّوكّڒْ نّشْ إِعِيزّنْ. حْضَا ثِيوُّورَا ن ؤُقمُّومْ نّشْ زِي ثنِّي إِدْجَانْ غَارْ وحْسِينْ نّشْ. 6 مَاغَارْ مِّيسْ إِسّحْقَارَا بَابَاسْ، يدْجِيسْ ثتّْضَادَّا يمَّاسْ، ثَاسْڒِيثْ خْ لَالَّاسْ، ڒْْعذْيَانْ ن إِجّْ ن ورْيَازْ أَقَا ذ أَيْثْبَابْ ن ثَادَّارْثْ نّسْ." 7 “مَاشَا نشّْ أَذْ خْزَارغْ غَارْ سِيذِي، أَذْ رَاجِيغْ أَربِّي ن ؤُسنْجمْ إِنُو. أَربِّي إِنُو أَذْ غَارِي د-إِسڒْ." 8 “وَارْ ذ أَيِي سْفَارّحْ، أَ شمْ ثَامْغَارْثْ نِّي ذ ڒعْذُو إِنُو! مَاغَارْ مَاڒَا وْضِيغْ، أَذْ كَّارغْ عَاوذْ، مَاڒَا قِّيمغْ ذِي ثَادْجسْثْ، أَذْ يِيڒِي سِيذِي ذ ثَافَاوْثْ إِ نشّْ. 9 نشّْ أَذْ كْسِيغْ أَسْخضْ ن سِيذِي، مِينْزِي نشّْ خْضِيغْ أَكِيذسْ، أَڒْ خَافِي إِ غَا إِوّثْ نتَّا خْ دّعْوثْ إِنُو ؤُ أَذْ أَيِي يَاغْ ثَاسْغَارْثْ إِنُو. نتَّا أَذْ أَيِي إِسُّوفّغْ غَارْ ثْفَاوْثْ، نشّْ أَذْ ژَترغْ ثَاسڭْذَا نّسْ. 10 ثَامْغَارْثْ ثنِّي ذ ڒعْذُو إِنُو أَذْ ثْژَارْ أَيَا. مْڒِي ذ أَسْ إِ غَا ثْذڒْ ڒحْيَا إِ ثنِّي ذ أَيِي إِقَّارنْ: ‘مَانِي إِدْجَا سِيذِي، أَربِّي نّشْ؟’ ثِيطَّاوِينْ إِنُو أَذْ غَارسْ خْزَارنْثْ! ڒخُّو أَذْ ثتّْوَادّزْ نتَّاثْ، أَمْ ؤُبدْجَاعْ ذِي زّْنَاقِي." 11 “ذڭْ وَاسّْ إِ ذِي إِ غَا إِبْنَا نتَّا ڒحْيُوضْ نّشْ عَاوذْ، ذڭْ وَاسّْ نِّي أَذْ إِرَاحْ ڒْحقّْ غَارْ ڒَاڭّْوَاجْ أَطَّاسْ. 12 ذڭْ وَاسّْ نِّي أَذْ د-أَسنْ، زِي أَشُّورْ ذ ثْندَّامْ ن مِيصْرَا، ؤُ زِي مِيصْرَا أَڒْ إِغْزَارْ ن لْفُورَاطْ، ؤُ زِي ڒبْحَارْ أَڒْ ڒبْحَارْ ؤُ زڭْ وذْرَارْ أَڒْ وذْرَارْ نّغْنِي. 13 مَاشَا دُّونشْثْ أَذْ ثذْوڒْ إِشْثْ ن ثمُّورْثْ إِتّْوَاردّْدْجنْ، زِي سِّيبّثْ ن إِمزْذَاغْ نّسْ، زِي سِّيبّثْ ن ڒْغِيدْجثْ ن ثْمڭَّا نْسنْ." 14 “أَرْوسْ ڒْڭنْسْ نّشْ س ثغَّارْشْثْ نّشْ، ؤُدْجِي ن ثسْغَارْثْ نّشْ، ثنِّي إِدْجَانْ وحّْذسْ ذڭْ وزْغَارْ، ذِي ڒْوسْطْ ن كَارْمِيلْ. أجّْ إِ-ثنْثْ أَذْ أَروْسنْ ذِي بَاشَانْ ذ جِيلْعَاذْ، أَمْ ذڭْ وُوسَّانْ ن وشْحَاڒْ ؤُيَا. 15 نشّْ أَذْ أَسْ سّشّْنغْ لْمُوعْجِيزَاثْ، أَمْ ذڭْ وُوسَّانْ ڒَْامِي د-ثفّْغذْ زِي ثمُّورْثْ ن مِيصْرَا. 16 ڒڭْنُوسْ أَذْ ث ثْوَاڒِينْ، أَذْ سضْحَانْ زِي سِّيبّثْ ن مَارَّا ثِيزمَّارْ نْسنْ، نِيثْنِي أَذْ سَّارْسنْ أَفُوسْ خْ ؤُقمُّومْ، إِمزُّوغنْ نْسنْ أَذْ دُّوهْشَارنْ. 17 نِيثْنِي أَذْ ڒسْحنْ ثَاعجَّاجْثْ أَمْ ؤُفِيغَارْ، أَذْ د-فّْغنْ زِي لْبُورْجَاثْ نْسنْ أَمْ إِمُودَّارْ ن ثمُّورْثْ إِتّْبُوعنْ. أَذْ د-أَسنْ تَّارْجِيجنْ غَارْ سِيذِي، أَربِّي نّغْ، ؤُ أَذْ زَّايكْ ڭّْوذنْ.” ثَايْرِي ن أَربِّي ذ أَرّحْمثْ نّسْ 18 “مَانْ ونْ إِدْجَانْ ذ أَربِّي أَمْ شكْ، ونِّي إِغفَّارنْ ڒْمُوعْصِييّثْ، ونِّي إِعدُّونْ خْ ؤُخطُّو ن مِينْ إِقِّيمنْ زِي ثسْغَارْثْ نّسْ؟ نتَّا وَارْ إِمنّعْ إِ ڒبْذَا ذڭْ وغْضَابْ نّسْ، مَاغَارْ يَارْضَا أَسْ ثَامخْسِيوْثْ إِشوَّارنْ. 19 نتَّا أَذْ خَانغْ يَارْحمْ عَاوذْ، نتَّا أَذْ إِعْفسْ خْ ڒْمُوعْصِييّثْ نّغْ، وَاهْ، شكْ أَذْ ثنْضَارذْ مَارَّا دّْنُوبْ نْسنْ ذِي ڒَادْجَاغْ ن ڒبْحَارْ. 20 إِڒِي شكْ أَذْ ثسّشْنذْ ڒَامَانْ إِ يَاعْقُوبْ ؤُ ثَامخْسِيوْثْ إِشوَّارنْ إِ إِبْرَاهِيمْ، أَمْ مَامّشْ ثجُّودْجذْ إِ ڒجْذُوذْ نّغْ زڭْ وُوسَّانْ ن مشْحَاڒْ ؤُيَا."