إِزهِّيذنْ 102

1 ثَاژَادْجِيثْ ن إِجّْ ن ڒْمسْكْسِينْ مَاڒَا مَانَاينِّي ذ أَطَّاسْ خَاسْ، ؤُشَا خنِّي إِتّْفَارّغْ إِمُونَاسْ نّسْ زَّاثْ إِ سِيذِي. 2 أَ سِيذِي، سڒْ غَارْ ثْژَادْجِيثْ إِنُو، أجّْ أَغُويِّي إِنُو أَذْ غَاركْ د-يَاوضْ. 3 وَارْ تّفَّارْ ؤُذمْ نّشْ خَافِي ذڭْ وَاسّْ إِ ذِي تّْوَاحْصَارغْ. أَرّْ-د غَارِي أَمزُّوغْ نّشْ ذڭْ وَاسّْ إِ ذِي ڒَاغِيغْ، سڒْ-د خنِّي غَارِي ذغْيَا. 4 مِينْزِي ؤُسَّانْ إِنُو عْذُونْ أَمْ دّخَّانْ، إِخْسَانْ إِنُو أَمْ ثفْقُونْثْ إِشمْضنْ. 5 ؤُڒْ إِنُو إِتِّيسْڒَاوْ ؤُ يُوژغْ أَمْ أَرْبِيعْ، أَڒَامِي تُّوغْ أَذْ شّغْ أَغْرُومْ إِنُو. 6 زِي سِّيبّثْ ن ؤُزهَّارْ يُودْجْغنْ إِنُو، ڒصْقنْ إِغْسَانْ إِنُو غَارْ ثڒْمشْثْ إِنُو. 7 نشّْ أَمْ يِيجّْ بُو-ؤُعُوقِّي ن ؤُجْضِيضْ ذِي ڒخْڒَا، ذوْڒغْ أَمْ يِيجّْ ن مُوكَا جَارْ ڒْخِيرْبَاثْ. 8 تّْغِيمغْ فَاقغْ س ڒفْثَانثْ، ذوْڒغْ أَمْ يِيجّْ ن وجْضِيضْ إِ إِقِّيمنْ وحّْذسْ خْ ثْزقَّا. 9 ڒْعذْيَانْ إِنُو تّكّْوَارنْ أَيِي أَسّْ مَارَّا. إِنِّي خَافِي إِتّْعدَّانْ، نعّْڒنْ أَمْ قَّارنْ إِسمْ إِنُو. 10 مَاغَارْ تّتّغْ إِغّضْ أَمْ وغْرُومْ ؤُ خدْجْضغْ ثِيسسِّيثْ إِنُو س إِمطَّاونْ إِنُو 11 زِي سِّيبّثْ ن وسْخضْ نّشْ ذ ؤُذُوقّزْ ن وغْضَابْ نّشْ، مَاغَارْ شكْ ثسّْڭعّْذذْ أَيِي ؤُ ثنْضَارذْ أَيِي عَاوذْ غَارْ ثمُّورْثْ. 12 ؤُسَّانْ إِنُو أَمْ يِيشْثْ ن ثِيڒِي إِزُّوڭَّارْثنْ، ؤُ نشّْ ثَاژْغغْ أَمْ ثُوڭَا. 13 مَاشَا شكْ، أَ سِيذِي، أَذْ ثقِّيمذْ خْ ڒْكُورْسِي نّكْ إِ ڒبْذَا، زِي جِّيڒْ أَڒْ جِّيڒْ أَذْ ذَايكْ خَارّْصنْ. 14 شكْ أَذْ ثكَّارذْ أَذْ ثَارْحْمذْ خْ صِيهْيُونْ، مَاغَارْ أَقَا ذ ڒْوقْثْ مَاحنْذْ أَذْ خَاسْ ثْحِينّذْ، مِينْزِي ڒْوقْثْ إِتّْوَاڭّنْ أَقَا ثِيوضْ-د. 15 مَاغَارْ إِژْرَا نّسْ ؤُسِينْ-د خْ ڒْخَاضَارْ ن إِمْسخَّارنْ نّشْ ؤُ نِيثْنِي كْسِينْ س وسْحِيسّفْ ذِي ثْعجَّاجْثْ نْسنْ. 16 ڒڭْنُوسْ أَذْ ڭّْوذنْ إِسمْ ن سِيذِي، مَارَّا إِجدْجِيذنْ ن ثمُّورْثْ أَذْ ڭّْوذنْ أَعُودْجِي نّشْ. 17 خْمِي غَا إِبْنَا سِيذِي صِيهْيُونْ ثْوَاڒَاثْ نّغْنِيثْ، أَذْ د-إِبَانْ ذڭْ ؤُعُودْجِي نّسْ. 18 أَذْ إِڒْهَا أَكْ-ذ ثْژَادْجِيثْ ن ؤُمزْڒُوضْ، وَارْ إِسّحْقَارَا شَا ثَاژَادْجِيثْ نْسنْ. 19 مَانْ أَيَا إِتّْوَارِي إِ جِّيڒْ إِ د غَا يَاسنْ، ڒْْڭنْسْ نِّي د غَا إِتّْوَاخڒْقنْ، أَذْ إِصبّحْ إِ سِيذِي، 20 مَاغَارْ نتَّا أَقَا إِسِّيجّْ-د زِي زَّاوشْثْ نّسْ إِقدّْسنْ يُوعْڒَانْ، زڭْ ؤُجنَّا إِخْزَارْ-د سِيذِي غَارْ ثمُّورْثْ سْوَادَّايْ 21 حِيمَا أَذْ إِسڒْ أَوعّضْ ن ؤُمحْبُوسْ، حِيمَا أَذْ يَارْخُو إِ يِينِّي إِدْجَانْ ذ ثَارْوَا ن ڒْموْثْ، 22 مَاحنْذْ أَذْ بَارّْحنْ س يِيسمْ ن سِيذِي ذِي صِيهْيُونْ، ذ شّنْعثْ نّسْ ذِي ؤُرْشَالِيمْ، 23 خْمِي ذِينِّي إِ غَا تّْوَاسّْمُوننْ ڒڭْنُوسْ، جْمِيعْ أَكْ-ذ ثْڭلْذِيوِينْ، حِيمَا أَذْ سخَّارنْ إِ سِيذِي. 24 نتَّا إِسَّارْخُو جّهْذْ إِنُو أَكْ-ذ وبْرِيذْ، نتَّا إِسّمْژِي ذڭْ وُوسَّانْ إِنُو. 25 نشّْ نِّيغْ: ‘وَارْ ذ أَيِي كسِّي ذڭْ وزْينْ ن وُوسَّانْ ن ثُوذَارْثْ إِنُو، أَ أَربِّي، أَقَا إِسڭّْوُوسَا نّشْ تّْغِيمَانْ زِي جِّيڒْ أَڒْ جِّيڒْ. 26 زڭْ وشْحَاڒْ ؤُيَا ثڭِّيذْ ذْسَاسْ إِ ثمُّورْثْ، إِجنْوَانْ ذ ڒْخذْمثْ ن إِفَاسّنْ نّشْ. 27 إِنَا أَذْ فْنَانْ، مَاشَا شكْ أَذْ ثْذُومذْ. نِيثْنِي مَارَّا أَذْ أَرْشَانْ أَمْ وَارُّوضْ، شكْ أَذْ ثنْ ثْبدّْڒذْ أَمْ يِيشْثْ ن ڒعْبَايثْ، أَمُّو إِ غَا تّْوَابدّْڒنْ. 28 شكْ مَاشَا ذ شكْ، إِسڭّْوُوسَا نّشْ وَارْ قطِّينْعمَّارْصْ.’ 29 إِحنْجِيرنْ ن إِمْسخَّارنْ نّشْ أَذْ ذِينْ زذْغنْ ؤُ ثَارْوَا نْسنْ أَذْ تّْوَاسّْمثْننْ زَّاثْ إِ وُوذمْ نّشْ.