إِزهِّيذنْ 21

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 أَ سِيذِي، أَجدْجِيذْ إِفَارْحْ س جّهْذْ نّشْ، مَامّشْ إِفَارْحْ أَطَّاسْ س ؤُسنْجمْ نّشْ! 3 ثوْشِيذْ أَسْ مژْرِي ن وُوڒْ نّسْ، شكْ وَارْ ثُوڭِيذْ شَا أَزَاوڭْ ن إِينْشِيشنْ نّسْ. سِيلَاهْ. 4 مَاغَارْ شكْ ثُوسِيذْ-د إِ ؤُمْسَاڭَارْ أَكِيذسْ س لْبَارَاكَاثْ شُّورنْثْ س ڒْخَارْ، ثقّْنذْ أَسْ تَّاجْ ن وُورغْ إِتّْوَاصفَّانْ خْ ؤُزدْجِيفْ نّسْ. 5 إِتَّارْ أَشْ ثُوذَارْثْ، ثوْشِيذْ أَسْ ت، ثُوزّڭَّارْثْ ن وُوسَّانْ إِ ڒبْذَا قَاعْ. 6 إِمْغَارْ ؤُعُودْجِي نّسْ س ؤُسنْجمْ نّشْ، ثسّْزهّْجذْ ث س ثِيسِّيقْثْ ذ ڒْعزّْ. 7 مِينْزِي شكْ ثَارِّيذْ إِ-ث ذ لْبَارَاكَا ثَامقّْرَانْثْ إِ ڒبْذَا، شكْ ثشُّورذْ ث س ڒفْرَاحثْ غَارْ وُوذمْ نّشْ. 8 مَاغَارْ أَجدْجِيذْ إِتّْشَاڒْ خْ سِيذِي، وَارْ إِتّفْرِيغْ س ثْمخْسِيوْثْ إِشوَّارنْ ن ؤُمْعُودْجِي خْ كُوڒْشِي. 9 أَفُوسْ نّشْ أَذْ يَافْ مَارَّا ڒْعذْيَانْ نّشْ، أَفُوسْ أَفُوسِي نّشْ أَذْ يَافْ مَارَّا إِنِّي شكْ إِشَارّْهنْ. 10 شكْ أَذْ ثنْ ثَارِّيذْ أَمْ ثفْقُونْثْ إِشمّْضنْ ذِي ڒْوقْثْ ن وضْحَارْ نّشْ، سِيذِي أَذْ ثنْ إِسَارْضْ س وغْضَابْ نّسْ، ثِيمسِّي أَذْ ثنْ ثشّْ. 11 أَذْ ثمْحِيذْ ڒْغِيدْجثْ نْسنْ زِي ثمُّورْثْ، زَّارِيعثْ نْسنْ زِي ثَارْوَا ن بْنَاذمْ. 12 مَاغَارْ نِيثْنِي نذْينْ أَشْ ڒْغَارْ، ڭِّينْ إِشْثْ ن ثْمعْمُوتْشْ، مَاشَا وَارْ زمَّارنْ وَالُو. 13 مَاغَارْ شكْ أَذْ ثنْ ثڭّذْ جَارْ ثِيطَّاوِينْ، س إِفِيڒَانْ ن ڒْقوْسْ نّشْ أَذْ ثْنيّْشذْ خْ وُوذْمَاونْ نْسنْ. 14 سْڭعّذْ إِخفْ نّشْ، أَ سِيذِي، س جّْهذْ نّشْ! أجّْ أَنغْ أَذْ نْغنّجْ ؤُ أَذْ نْزهّذْ إِ ثْزمَّارْ نّشْ.